قازاقستاندا تۇرىپ جاتقانىما 20 جىلداي بولىپ قالدى. ءتورت قىز تاربيەلەپ وتىرعان وتباسى يەسىمىن. وسى 20 جىلدا قازاقستاننىڭ كۇن ساناپ قارقىندى تۇردە دامىپ جاتقانىنا كۋا بولىپ كەلەمىن. بۇل جەتىستىكتەر مەنى ءاردايىم جىگەرلەندىرىپ ءارى مەرەيىمدى اسىرادى.
قازاق ەلىنىڭ العا ۇمتىلعان باتىل قادامدارىنا ءتانتى بولۋدامىن. اسىرەسە, مەملەكەت باسشىسىنىڭ «نۇرلى جول – بولاشاققا باستار جول» اتتى جاڭا جولداۋىمەن تانىسىپ شىققانىمدا, قازاقستاننىڭ ءورىسى كەڭەيە بەرەتىنىنە سەنىمىم ارتا ءتۇستى. ويتكەنى, پرەزيدەنت ءوزىنىڭ جولداۋىندا قازاق ەلىنىڭ ەكونوميكالىق داعدارىستارعا الدىن-الا دايىن ەكەنىن كورسەتتى جانە جاھاندىق داعدارىستان شىعۋدىڭ ناقتى جولدارىن انىقتاپ بەردى.
شىن مانىندە, پرەزيدەنت نۇرسۇلتان نازارباەۆتىڭ ەلدى باستاي ءبىلۋ قابىلەتى مەن اقىل-پاراساتى – قازاقستاندا ءومىر سۇرەتىن بارشا حالىق ءۇشىن ەرتەڭگى كۇنگە دەگەن سەنىم كەپىلى. پرەزيدەنتتىڭ جولداۋلارىندا بەلگىلەگەن ماقساتتاردىڭ ءبىرشاماسىنا قازاقستان قازىردىڭ وزىندە قول جەتكىزىپ ۇلگەردى, بىرقاتارىنىڭ جۇزەگە اسۋى ءۇشىن تاباندى قادامدار جاسالۋدا.
پرەزيدەنت نۇرسۇلتان نازارباەۆ «ەل بىرلىگى – ءبىزدىڭ بارشا تابىستارىمىزدىڭ كىلتى», دەپ اتاپ وتكەندەي, بارشا قازاقستاندىقتار تاۋەلسىزدىكتىڭ جانە بەيبىتشىلىكتىڭ قادىرىن بىلە وتىرىپ ايانباي ەڭبەك ەتسە, قازاقستاننىڭ ابىرويى بۇدان دا ارتا بەرەرى انىق.
ابدۋرراحمان سەل,
«KATEV» حالىقارالىق قوعامدىق قورىنىڭ
ۆيتسە-پرەزيدەنتى.
استانا.