ۇلتتىق كينونى قولداۋ ورتالىعى مەملەكەتتىك قولداۋعا ۇمىتكەر كينوجوبالاردى ىرىكتەۋدىڭ ءبىرىنشى كەزەڭىنە ستسەناريلەر مەن ستسەناري جوسپارلارىن قابىلداۋدىڭ اياقتالعانىن حابارلايدى. ەلەكتروندى تۇردە تىركەلگەن وتىنىمدەردىڭ جالپى سانى – 444.
بيىل انيماتسيالىق, دەرەكتى جانە ويىن فيلمدەرىنىڭ ءارتۇرلى ساناتتارى بويىنشا ءبىرشاما ءوتىنىم كەلىپ ءتۇستى. انيماتسيا سالاسىندا 42 ءوتىنىم بەرىلگەن. دەرەكتى-حرونيكالى فيلمدەر ساناتىندا 103 ءوتىنىم ءتۇستى. ويىن فيلمدەرىنە كەلەتىن بولساق, 299 ءوتىنىم كەلگەن.
«قۇجاتتاردى قابىلداۋ اياقتالعاننان كەيىن ورتالىق ءوتىنىش بەرۋشىلەر ۇسىنعان قۇجاتتاردى ساراپتاما كەڭەسىنىڭ قاراۋىنا ەنگىزەدى. ستسەناريلەردى نەمەسە ستسەناري جوسپارلارىن ساراپتاما كەڭەسىنىڭ مۇشەلەرى فيلم تۇرلەرى بويىنشا سەكتسيالاردا قاراستىرادى. كەڭەس قۇرامى 20 جۇمىس كۇنى ىشىندە باسىم تاقىرىپتارعا, سيۋجەتتىڭ قۇرىلىمى مەن دراماتۋرگيا قاعيداتتارى سەكىلدى باستى تالاپتارعا نازار اۋدارىپ, وتىنىمدەردى قاراپ شىعادى. ەكىنشى كەزەڭدە ساراپتاما كەڭەسى ۇسىنعان جوبالاردىڭ قۇجاتتار پاكەتى جيناقتالادى. بۇل رەتتە قاتە ورىن السا, ونى تۇزەۋگە 3 كۇن ۋاقىت بەرىلەدى», دەپ حابارلايدى كينو ورتالىعىنىڭ ءباسپاسوز قىزمەتى.
ايتا كەتەيىك, بيىل كونكۋرستىڭ ءبىرىنشى كەزەڭىنە قاتىسۋ ءۇشىن ءوتىنىم قابىلداۋ 5-13 ناۋرىز ارالىعىندا جۇرگىزىلدى. بۇعان دەيىن قاڭتار ايىندا كينو تۇسىرۋگە ارنالعان باسىم تاقىرىپتار جاريالاندى. سونىمەن قاتار كينو ورتالىعى جانىنان كونسۋلتاتسيالىق قولداۋ شارالارى جۇرگىزىلىپ جاتىر. كينو ورتالىعىنىڭ كەڭسەسىندە جەكە كونسۋلتاتسيالار, تەلەفون قوڭىراۋلارى ارقىلى سۇراقتارعا جاۋاپ بەرىلدى, الەۋمەتتىك جەلىدە جاڭا ەرەجەگە, كونكۋرسقا قاتىستى قاجەتتى مالىمەتتەر جاريالانىپ كەلەدى.