استاناداعى ق.مۇڭايتپاسوۆ اتىنداعى ەسكى ستاديوننىڭ ورنىنا جاڭاسىن سالۋعا ارناۋلى مەملەكەتتىك قوردان 17,3 ملرد تەڭگە قاراجات ءبولۋ تۋرالى شەشىم قابىلداندى.
اتالعان ستاديون 1936 جىلى سالىنعان. قازىرگى تاڭدا ەسكى عيمارات جارامسىز بولعاندىقتان, تولىعىمەن بولشەكتەلگەن. جاڭا ستاديوننىڭ قۇرىلىسى 2025 جىلدىڭ سوڭىندا اياقتالادى دەپ جوسپارلانىپ وتىر.
سپورت نىسانى قوزعالىس مۇمكىندىگى شەكتەۋلى ازاماتتارعا ارنالعان ورىنداردى قوسا العاندا, 3 598 ورىنعا ەسەپتەلگەن. ستاديون UEFA حالىقارالىق ستاندارتتارىنا ساي سالىنادى. قۇرىلىس اياقتالعاننان كەيىن نىساندى استانا قالاسى اكىمدىگىنىڭ №8 وليمپيادالىق رەزەرۆتەگى مامانداندىرىلعان بالالار-جاسوسپىرىمدەر سپورت مەكتەبىنىڭ بالانسىنا بەرۋ جوسپارلانىپ وتىر.
جاڭا ستاديون وقۋ-جاتتىعۋ جيىندارى ءۇشىن قولدانىسقا بەرىلەدى. ونى پايدالانۋعا بەرىلۋى وقۋ-جاتتىعۋ ۇدەرىسىن جاقسارتۋعا, سپورتشىلاردى دايىنداۋعا وڭتايلى جاعداي جاساۋعا جانە ولاردىڭ ناتيجە كورسەتۋ مۇمكىندىگىن ارتتىرۋعا سەپتىگىن تيگىزەدى.
بۇگىندە ءتۇرلى وڭىرلەردە الەۋمەتتىك ماڭىزى بار 16 نىسان سالۋعا ارناۋلى مەملەكەتتىك قوردان 82 ملرد تەڭگەدەن استام قارجى ءبولىندى. اتاپ ايتقاندا, 1 مۋزىكالىق مەكتەپتى قوسا العاندا 7 مەكتەپ, 2 سپورت كەشەنى, كوپسالالى اۋرۋحانا كەشەنى, وبلىستىق جەدەل جاردەم ستانساسى, ارناۋلى الەۋمەتتىك قىزمەت كورسەتۋ ورتالىعى, جاتاقحانا جانە 2 بالاباقشا بار. سونىمەن قاتار قاراجات قىزىلوردا وبلىسىنداعى ارال اۋدانىندا سۋمەن جابدىقتاۋ جۇيەلەرىن سالۋعا جانە جاڭعىرتۋ جۇمىستارىنا باعىتتالدى.