كوستەنكو شاحتاسىنداعى اپاتقا دەيىن كەنىشتە ۇنەمى ءورت تۇتانىپ تۇرعان. ال ونى كەنشىلەردىڭ ءوزى ءسوندىرۋى قالىپتى دۇنەگە اينالعان. وسىنىڭ ءبارىن بىلەتىن شاحتا ديرەكتورى جەر استىن كومىر شاڭى مەن مەتاننان تازارتۋدى مۇلدەم قولعا الماعان, دەپ جازادى Egemen.kz اقپارات اگەنتتىگى.
كتك جازعانداي, قاراعاندىدا 46 كەنشىنىڭ ءومىرىن جالماعان جارىلىسقا قاتىستى باستى سوت پروتسەسىندە وسىنداي تىڭ اقپاراتتار ايتىلدى.
تەرگەۋ مالىمەتىنشە, كوستەنكو شاحتاسىنىڭ ديرەكتورى قاراپايىم قاۋىپسىزدىك ەرەجەلەرىن ەستەن شىعارعان. جەر قىرتىستارىنان بولىنەتىن مەتان گازى مەن كومىر شاڭى ءار جەردەن ءبىر تۇتانىپ تۇرعان. ونى كەنشىلەر ءوز كۇشىمەن ءسوندىرىپ جۇرگەن.
سونىمەن قاتار شاحتا استىنداعى جۇمىسقا جارامايتىن قۇرىلعىلاردى ساتىپ الىپ, ونى بىلىكتى ماماندار ەمەس, كەنشىلەردىڭ ءوزى ورناتقان. وسىلايشا ءار تيىندى ۇنەمدەپ كەلىپتى.
ال كومىر ءوندىرۋ كولەمى جوسپاردان اسىپ كەتكەن. سوتتا پروكۋرورلار وسىنداي ۇزىن-سونار زاڭبۇزۋشىلىقتى ءتىزىپ شىقتى.
ايتا كەتەيىك, 2023 جىلدىڭ 28 قازانىندا كوستەنكو اتىنداعى شاحتادا اپات بولدى. الدىمەن كونۆەيەردەن شىققان ۇشقىننان كومىر شاڭى تۇتانىپ, وعان مەتان گازى ارالاسىپ الاپات جارىلىس بولدى. جارىلىس كۇشى التى شىقىرىمعا جايىلعان. سول كەزدە شاحتادا بولعان 252 كەنشىنىڭ 46-سى كوز جۇمدى.
«ارتى اۋىر اپاتقا اكەلەتىن جاعدايدىڭ بارىن, كەنشىلەردىڭ ءومىرى مەن دەنساۋلىعىنا قاۋىپ توندەرگەنىن بىلسە دە, جوسپاردى ورىنداۋ ءۇشىن №48 لاۆادا جۇمىس ءبىر ساتكە دە توقتاتىلماعان. ول جەردە ءورت ارا-تۇرا تىركەلىپ تۇرعان. شاحتا ديرەكتورى مەن وعان باعىنىشتى باسشىلار قاۋىپسىزدىك شارالارىن ساقتاۋعا ق ۇلىق تانىتپاعان», - دەيدى مەملەكەتتىك ايىپتاۋشى ءادىل سادىقوۆ.