مەملەكەت باسشى قاسىم-جومارت توقاەۆتىڭ باستاماسىمەن 2022 جىلى قۇرىلعان ۇلتتىق قۇرىلتاي قوعامدى بىرىكتىرىپ, بىرلىكتى نىعايتاتىن ماڭىزدى الاڭعا اينالدى. قۇرىلتاي ءداستۇرىنىڭ قايتا جاڭعىرۋى حالىقتىڭ ەرىك-جىگەرىن ءبىر ارنادا توپتاستىرىپ, مەملەكەتتىك ماڭىزى بار وزەكتى ماسەلەلەردى شەشۋدى كوزدەيدى, دەپ جازادى Egemen.kz.
قۇرىلتايدىڭ جىل سايىنعى جيىنىنا پرەزيدەنت ق.ك. توقاەۆ تىكەلەي توراعالىق ەتەدى. مەملەكەت باسشىسى قۇرىلتايدىڭ بىرلىك پەن ۇلتتىق قۇندىلىقتاردى نىعايتۋداعى ءرولىن ەرەكشە اتاپ وتەدى.
قۇرىلتايدىڭ قىزمەتى
ۇلتتىق قۇرىلتاي قازاقستان رەسپۋبليكاسى پرەزيدەنتى جانىنداعى كونسۋلتاتيۆتىك-كەڭەسشى ورگان رەتىندە ەلدەگى قوعامدىق كونسوليداتسيانى ودان ءارى نىعايتۋدى كوزدەيتىن ۇسىنىستار مەن ستراتەگيالاردى ازىرلەۋدە شەشۋشى ءرول اتقارادى. ۇلتتىق قۇرىلتاي ءوز قىزمەتىندە قازاقستان رەسپۋبليكاسىنىڭ كونستيتۋتسياسىن, زاڭدارىن, قازاقستان رەسپۋبليكاسى پرەزيدەنتىنىڭ اكتىلەرىن جانە وزگە دە نورماتيۆتىك قۇقىقتىق اكتىلەردى باسشىلىققا الادى.
ۇلتتىق قۇرىلتاي قوعامدىق كونسوليداتسيانى ودان ءارى دامىتۋ ءۇشىن يدەيالار مەن قادامداردى تۇجىرىمداۋدى ماقسات ەتەدى.
ۇلتتىق قۇرىلتاي ەل تۇرعىندارىنىڭ كەڭ اۋقىمدى پىكىرى مەن كوزقاراسى توعىساتىن نەگىزگى ۇلتتىق ديالوگ الاڭىنا اينالدى. بۇل پرەزيدەنتتىڭ جوسپارىنا سايكەس مەملەكەت پەن حالىق اراسىنداعى بايلانىستى نىعايتىپ, قازاقستاننىڭ دامۋ جولىندا ناتيجەلى دە ءوزارا ءتيىمدى ىنتىماقتاستىققا سەپتىگىن تيگىزەدى.
ۇلتتىق قۇرىلتايدىڭ قۇرىلىمى
ۇلتتىق قۇرىلتاي قۇرامىنا ءار وڭىردەن, ءارتۇرلى سالادان جينالعاندار ەنگەن. وندا عىلىم, ءبىلىم, مەديتسينا, مادەنيەت, سپورت سالاسىنىڭ ماماندارى, بۇقارالىق اقپارات قۇرالدارى سالاسىنىڭ وكىلدەرى, ەڭبەك جانە قۇقىق قورعاۋ سالاسىندا جۇمىس ىستەيتىن ۇكىمەتتىك ەمەس ۇيىمداردىڭ مۇشەلەرى, سونداي-اق قوعام بەلسەندىلەرى مەن جاستار قوزعالىسىنىڭ جەتەكشىلەرى بار. بۇل حالىق دەموكراتياسى مەن جاسامپاز ءپليۋراليزمنىڭ ۇلگىسى رەتىندە قوعامنىڭ كەڭ اۋقىمدى پىكىرى مەن مۇددەسىن ەسكەرۋگە مۇمكىندىك بەرەدى.
ال ۇلتتىق قۇرىلتايدىڭ العاشقى قۇرامىندا جۇزدەن اسا ادام بولدى. قۇرام روتاتسيا جۇيەسىنىڭ ارقاسىندا مەرزىمدى تۇردە جاڭارتىلىپ وتىرادى. بۇل جۇمىستىڭ ديناميكاسىن ساقتاۋعا, قوعامنىڭ جاڭا وكىلدەرىن تارتۋعا جانە ءارتۇرلى پىكىرلەردى ەسكەرۋگە مۇمكىندىك بەرەدى. بۇل ءتاسىل تالقىلاناتىن ماسەلەلەردىڭ اۋقىمىن كەڭەيتىپ, قوعامدىق مۇددەنىڭ بارلىق باعىتىن ەسەپكە الۋعا سەپ بولادى.
ۇلتتىق قۇرىلتاي ءتيىمدى جۇمىس ىستەۋى ءۇشىن ونىڭ قىزمەتىن كەڭەيتۋگە جانە ءوزارا ءىس-قيمىلدىڭ جاڭا تاسىلدەرىن ەنگىزۋگە ىقپال ەتەتىن جۇمىس وتىرىستارى وتكىزىلەدى. جۇمىس توپتارى ايماقتارداعى جيىنعا بەلسەنە قاتىسىپ, قوعامنىڭ ءتۇرلى سالالارىمەن بايلانىسىن نىعايتادى. بۇل ازاماتتىق كۇن ءتارتىبىن شەشىم قابىلداۋ پروتسەسىنە تەرەڭىرەك ەنگىزۋگە مۇمكىندىك بەرەدى.
ۇلتتىق قۇرىلتاي مەملەكەتتىڭ اشىقتىق, ينكليۋزيا جانە سىندارلى قارىم-قاتىناس قاعيداتتارىنا ادالدىعىن بىلدىرەدى. بۇل – قوعامدىق كەلىسىمدى نىعايتۋدى, ۇلتتىق مۇددەنى قولداۋدى جانە الەۋەتتى ودان ءارى ارتتىرۋ ءۇشىن تۇراقتى پلاتفورما قۇرۋدى كوزدەيتىن ماڭىزدى قادام.
تۇركىستاندا وتكەن ەكىنشى وتىرىستان باستاپ سەكتسيالارعا بولىنەتىن جۇمىس فورماتى ىسكە قوسىلدى. قازىرگى تاڭدا ۇلتتىق قۇرىلتاي اياسىندا 4 جۇمىس سەكتسياسى جۇمىس ىستەيدى: «ازاماتتىق قوعام», «مادەنيەت. ونەر. رۋحانيات», ء«بىلىم جانە عىلىم», «الەۋمەتتىك-ەكونوميكالىق جانە ايماقتىق دامۋ». سەكتسيالار ۇلتتىق قۇرىلتاي مۇشەلەرى ءوز باستامالارىن ارىپتەستەرىمەن جانە مۇددەلى مەملەكەتتىك ورگان وكىلدەرىمەن تىكەلەي تالقىلاي الاتىن ايتارلىقتاي ناتيجەلى فورماتتا وتەدى.
قۇرىلتاي قانداي ماسەلەلەردى قاۋزايدى؟
قۇرىلتاي وتىرىستارىندا ۇلتتىق جانە جاھاندىق سىن-قاتەرلەردى كورسەتەتىن ماسەلەلەر: الەۋمەتتىك ادىلەتتىلىك, ەكونوميكالىق دامۋ, ءبىلىم, مادەنيەت, تاريح, قوعامدىق جانە ۇلتتىق قاۋىپسىزدىك ماسەلەلەرى تالقىلانادى. بۇل پىكىرتالاستار اعىمداعى ۇردىستەردى قامتىپ قانا قويماي, سونىمەن قاتار ازاماتتاردىڭ مەملەكەتتىك ينستيتۋتتارعا سەنىمىن نىعايتىپ, قازاقستاننىڭ ۇزاق مەرزىمدى دامۋىن نەگىزگە الا وتىرىپ, جاڭعىرۋدىڭ جاڭا باعىتتارىن ناقتىلايدى.
ۇلتتىق قۇرىلتايدىڭ باستى ميسسياسى – قوعامنىڭ وزەكتى ماسەلەلەرىن انىقتاپ, تالقىلاۋ عانا ەمەس, ولارعا جۇيەلى شەشۋگە ساراپشىلار قاۋىمىن جۇمىلدىرۋ. ازاماتتىق ينستيتۋتتاردىڭ, مەملەكەتتىك قۇرىلىمداردىڭ جانە قوعامدىق بىرلەستىكتەردىڭ ينتەگراتسياسى ورتاق ماقسات – ازاماتتاردىڭ قۇقىقتارىن قورعاۋدى جانە قاۋىپسىزدىك پەن الەۋمەتتىك يگىلىكتى قامتاماسىز ەتۋدى كوزدەيتىن باستامالاردى ازىرلەۋگە, جۇزەگە اسىرۋعا باعىتتالادى.
ۇلتتىق قۇرىلتايدىڭ نەگىزگى قاعيداتى – مەملەكەتتىك بيلىك پەن ازاماتتىق قوعام اراسىندا ارىپتەستىك قارىم-قاتىناس قۇرۋ. ساياسي جۇيەنى جاڭعىرتۋ تاريحى تەك وسى ەكى سۋبەكتىنىڭ تىعىز ىنتىماقتاستىعى ارقىلى تۇراقتى دامۋ بولاتىنىن كورسەتتى. مەملەكەت ەكونوميكانىڭ ىلگەرىلەۋى ءۇشىن جاعداي جاساۋعا, رەفورمالاردى جۇزەگە اسىرۋعا, حالىقتى الەۋمەتتىك قورعاۋعا جانە قوعامدىق ءتارتىپتى ساقتاۋعا جاۋاپتى, بۇل يكەمدىلىكتى, ديالوگ اشىقتىعىن جانە قوعامدىق پىكىردى ەسكەرۋدى تالاپ ەتەدى.