اقش-تىڭ ينديان-ۋەللس قالاسىندا شىمىلدىعى تۇرىلگەن جۇلدە قورى 9 693 540 دوللاردى قۇرايتىن اسا ءىرى حالىقارالىق تۋرنيردە ونەر كورسەتكەن قازاقستاننىڭ ءتورت تەننيسشىسىنىڭ ۇشەۋى العاشقى اينالىمنان اسا المادى.
تۇساۋكەسەر كەزدەسۋلەرىندە الەكساندر بۋبليك (اتر №82) جاپونيالىق يۋسۋكە ۆاتۋناكيگە (اتر № 349) جانە الەكساندر شەۆچەنكو (اتر № 98) اۋستراليالىق رينكي حيدجيكاتاعا (اتر № 83) ەسە جىبەردى. قوس قىزىمىز جارىستى ەكىنشى كەزەڭنەن باستادى. يۋليا پۋتينتسەۆا (WTA № 20) چەحيالىق كاتەرينا سينياكوۆاعا (WTA № 59) جارىتىپ قارسىلىق كورسەتە المادى – 2:6, 2:6.
ەلەنا رىباكينا (WTA № 7) ءاۋ باستا فرانتسيالىق سيۋزان لاممەنسكە (WTA № 64) سان سوقتىردى – 6:3, 6:3. ودان كەيىن ۇلىبريتانيالىق كەت بۋلتەرمەن (WTA № 38) كەزدەستى. بۇل باسەكەدە دە رىباكينا ءوز قارسىلاسىنان باسىم ءتۇستى. 1 ساعات 16 مينۋتقا سوزىلعان سايىس 6:0, 7:5 ەسەبىمەن اياقتالدى. 1/8 فينالدا ول الەمنىڭ 11-راكەتكاسى, رەسەيلىك ميررا اندرەەۆامەن كۇش سىناسادى. ەلىمىزدىڭ ەڭ ۇزدىك تەننيسشىسى ءدال وسى ويىنشىمەن وسىدان ءۇش اپتا بۇرىن دۋبايداعى دودانىڭ جارتىلاي فينالىندا شەبەرلىك بايقاستى. ول كەزدەسۋدە اندرەەۆانىڭ اسىعى الشىسىنان تۇسكەن ەدى. بۇل جولى دا رىباكينانىڭ 17 جاسار قارسىلاسىنا ءالى جەتپەدى – 1:6, 2:6.
ينديان-ۋەللستەگى ءتۋرنيردىڭ العاشقى اينالىمدارىندا توسىن ناتيجەلەر دە تىركەلدى. ەڭ باستى سەنساتسيا – سەربيانىڭ داڭقتى تەننيسشىسى نوۆاك دجوكوۆيچ ويدا-جوقتا اتر تىزىمىندە 85 ورىندا تۇرعان نيدەرلاندتىڭ وكىلى بوتيك ۆان دە زاندسحۋلپتەن 2:6, 6:3, 1:6 ەسەبىمەن ۇتىلدى. سونداي-اق, 2021 جىلعى US Open دوداسىنىڭ جەڭىمپازى, ۇلىبريتانيالىق ەمما رادۋكانۋ جاپونيالىق مويۋكا ۋچيجيمادان جەڭىلدى – 3:6, 2:6. الەمنىڭ ەكىنشى راكەتكاسى, گەرمانيالىق الەكساندر زۆەرەۆ قىزعالداقتار ەلىنىڭ تاعى ءبىر ويىنشىسى تاللون گريكسپۋرگە جول بەردى – 6:4, 6:7, 6:7.