گرۋزيانىڭ بۇرىنعى پرەزيدەنتى ميحايل سااكاشۆيليگە قاتىستى تاعى ءبىر سوت ۇكىمى شىقتى. ول مەملەكەتتىك قاراجاتتى ءىرى كولەمدە تالان-تاراجعا سالدى دەگەن ايىپپەن 9 جىلعا سوتتالدى, دەپ حابارلايدى Egemen.kz.
سۋديا بادري كوچلامازاشۆيلي ەكس-پرەزيدەنتتى بيۋدجەت قاراجاتىن زاڭسىز جۇمسادى دەپ تانىپ, ونى باس بوستاندىعىنان ايىرۋ تۋرالى شەشىم شىعارعان.
سونىمەن قاتار, بۇل ىستە گرۋزيانىڭ ارنايى كۇزەت قىزمەتىنىڭ بۇرىنعى باسشىسى تەيمۋراز دجاناشياعا قىزمەتتىك وكىلەتتىگىن اسىرا پايدالاندى دەگەن ايىپ تاعىلىپ, 300 مىڭ لاري (شامامەن 110 مىڭ دوللار) كولەمىندە ايىپپۇل سالىنعان.
سااكاشۆيليگە تاعىلعان بۇل ايىپ «پيدجاكتار ءىسى» دەپ اتالىپ كەتكەن. تەرگەۋ مالىمەتتەرى بويىنشا, ول 2009-2013 جىلدار ارالىعىندا مەملەكەتتىك بيۋدجەتتەن 8,8 ميلليون لاري (شامامەن 3 ميلليون دوللار) جەكە شىعىندارىنا جۇمساعان. بۇل قاراجاتتىڭ ءبىر بولىگى لوندوندا قىمبات برەندتىك كيىمدەر ساتىپ الۋعا, ونىڭ ىشىندە جەتى پيدجاك پەن كاشەمير پالتو الۋعا, سونداي-اق شەتەلدەگى دەمالىستار مەن كوسمەتيكالىق پروتسەدۋرالارعا كەتكەن.
الايدا, سااكاشۆيلي مەن دجاناشيا تاعىلعان ايىپتاردى مويىنداماي, بۇل سوت ءىسىنىڭ ساياسي استارى بار دەپ ايتقان.
ايتا كەتەيىك, ەكس-پرەزيدەنت قازىردىڭ وزىندە باسقا قىلمىستىق ىستەر بويىنشا 6 جىلدىق جازاسىن وتەپ جاتىر. وعان ساندرو گيرگۆليانيدىڭ ولتىرۋشىلەرىن زاڭسىز كەشىردى جانە دەپۋتات ۆالەري گەلاشۆيليگە شابۋىل ۇيىمداستىرۋعا بۇيرىق بەردى دەگەن ايىپ تاعىلعان.
سااكاشۆيليدىڭ جاقتاستارى بۇل ىستەردى ساياسي قۋدالاۋ دەپ ەسەپتەيدى, ال گرۋزيا بيلىگى ەكس-پرەزيدەنتتىڭ قىلمىستىق ارەكەتتەرى ءۇشىن جاۋاپ بەرۋى ءتيىس ەكەنىن العا تارتقان.