«Halyk Finance» ساراپشىلارىنىڭ پىكىرىنشە, ناۋرىز ايىندا دوللار باعامى 505-515 تەڭگە ارالىعىندا بولۋى مۇمكىن. بۇل تەڭگەنىڭ ازداپ السىرەيتىنىن بىلدىرەدى. قازىر ايىرباستاۋ باعامى 499-500 تەڭگە شاماسىندا ەكەنىن ەسكەرسەك, كوپشىلىككە بۇل وزگەرىس اسا بايقالماۋى مۇمكىن.
ۇلتتىق بانكتىڭ ەسەبىنە سايكەس, ناۋرىز ايىندا ۇلتتىق قوردان بيۋدجەتكە شامامەن 700-800 ملن دوللار ساتىلماق. سونىمەن قاتار ەكسپورتتان تۇسكەن 500 ملن دوللار دا نارىققا شىعارىلماق. بۇل شارالار تەڭگە باعامىن قولداۋ ءۇشىن قاڭتار ايىندا ەنگىزىلگەن بولاتىن. سونداي-اق كۆازيمەملەكەتتىك سەكتورداعى كومپانيالار دا شەتەل ۆاليۋتاسىنداعى تۇسىمدەرىنىڭ 50%-ىن ساتۋعا مىندەتتەلگەن. اقپان ايىندا ولار 274 ملن دوللار ايىرباستاسا, ناۋرىزدا دا وسى كولەم ساقتالۋى ىقتيمال.
دەگەنمەن وسى ۋاقىتتا ۇلتتىق بانك بىرىڭعاي جيناقتاۋشى زەينەتاقى قورىنا 250 ملن دوللار ساتىپ الادى. ساراپشىلاردىڭ ايتۋىنشا, بۇل – تەڭگەگە قىسىم جاسايتىن نەگىزگى فاكتورلاردىڭ ءبىرى. باس بانكتىڭ ۆاليۋتا ساتىلىمى اقپانمەن سالىستىرعاندا تومەندەيدى (1,1 ملرد دوللاردان 1 ملرد دوللارعا دەيىن), سوندىقتان تەڭگە ازداپ السىرەپ, دوللار باعامى 505-515 تەڭگە دەڭگەيىندە قالىپتاسۋى مۇمكىن.
اقپان ايىندا تەڭگە 3,7%-عا نىعايىپ, 499,09 تەڭگەگە جەتكەن ەدى. بۇل كەزدە ۇلتتىق ۆاليۋتاعا قولداۋ كورسەتكەن بىرنەشە فاكتور بولدى: ۇلتتىق قوردان 600 ملن دوللار ساتىلدى, ەكسپورتتان تۇسكەن التىن ەسەبىنەن 500 ملن دوللار نارىققا شىعارىلدى, كۆازيگوسسەكتور 274 ملن دوللار ساتتى, ءارى بجزق-عا دوللار ساتىپ الىنبادى. وسى فاكتورلاردىڭ بارلىعى نارىقتاعى دوللار ۇسىنىسىن ارتتىرىپ, تەڭگەنىڭ نىعايۋىنا سەبەپكەر بولدى.
قازىردە قازاقستان قور بيرجاسىندا (KASE) دوللاردىڭ ورتاشا باعامى 499,74 تەڭگە دەڭگەيىندە تۇر. الايدا وسى ايدا جاعداي وزگەرۋى مۇمكىن. ەگەر دوللار ساتىپ الۋ جوسپارىڭىز بولسا, كۋرستىڭ كوتەرىلۋىن كۇتپەي, الدىن الا ايىرباستاپ العان ءجون. ۇلكەن سومانى ايىرباستاۋ قاجەت بولسا, بىرنەشە بولىككە ءبولىپ, ءارتۇرلى ۋاقىتتا ساتىپ الۋ ستراتەگياسىن قولدانعان دۇرىس. سونداي-اق سەنىمدى بانكتەر مەن ايىرباستاۋ بولىمشەلەرىن تاڭداپ, جاسىرىن كوميسسيالاردان ساقتانۋ كەرەك.
ناۋرىزدا ۆاليۋتا نارىعىندا ايتارلىقتاي وزگەرىستەر بولۋى ىقتيمال. سوندىقتان قارجىلىق شەشىم قابىلداماس بۇرىن, نارىقتاعى جاڭالىقتاردى مۇقيات قاداعالاعان ءجون.