قىتايدا قىلمىستىق توپ قۇرعانى جانە ادام ولتىرگەندەرى ءۇشىن ءولىم جازاسىنا كەسىلگەن ميللياردەر ليۋ حان مەن ونىڭ ءىنىسى ليۋ ۆەيگە, سونداي-اق, قىلمىستىق توپتىڭ تاعى ءۇش مۇشەسىنە قاتىستى شىعارىلعان ۇكىم ورىندالدى.
تەرگەۋ مالىمەتتەرىنە قاراعاندا, ليۋ حان 1993 جىلى ءوز ىنىسىمەن بىرگە قىلمىستىق توپ قۇرعان. قىلمىستىق توپ مۇشەلەرى نەگىزىنەن سىچۋان پروۆينتسياسىنداعى جەرگىلىكتى كاسىپكەرلەر قىزمەتىن باقىلاۋلارىنا الىپتى. سونىمەن قاتار, ولاردىڭ توعىز ادامدى ولتىرگەندەرى دالەلدەنگەن. 2014 جىلدىڭ مامىرىندا ليۋ حانمەن بىرگە, باندانىڭ ءتورت مۇشەسى ءولىم جازاسىنا كەسىلىپ, قىلمىستىق توپتىڭ 30-دان استام قاتىسۋشىسى ءارتۇرلى مەرزىمگە باس بوستاندىقتارىنان ايىرىلعان بولاتىن. «رەيتەر» اگەنتتىگىنىڭ حابارلاۋىنشا, ليۋ حاننىڭ ءىسى قكپ وك ساياسي بيۋروسى تۇراقتى كوميتەتىنىڭ بۇرىنعى مۇشەسى چجوۋ يۋنكانمەن بايلانىستى بولۋى مۇمكىن. قىلمىستىق ءىس قوزعالعانعا دەيىن ليۋ حان «حانلۋن» تاۋ-كەن ءوندىرۋ كورپوراتسياسىن باسقارعان ەدى.
باسقا جول قالماعانىن مالىمدەدى
اقش فەدەرالدىق رەزەرۆتەر جۇيەسىنىڭ بۇرىنعى باسشىسى الان گرينسپەن گرەكيا ەلىنە ەۋروايماقتان شىعۋدان باسقا جول قالماعانىن مالىمدەدى. مۇنى ول جەكسەنبى كۇنى «BBC Radio 4» راديوستانساسىنىڭ ەفيرىندە ايتقان.
الان گرينسپەننىڭ مالىمدەۋىنشە, گرەكيا سولشىل ۇكىمەتىنىڭ قارىزداردى تولەۋ شارتتارىن قاراۋعا تىرىساتىن باسقا جولدارى جوق. «مەن گرەكيانىڭ ەۋروايماعىنا قاتىسۋى جاعدايعا كومەكتەسەتىنىن كورىپ وتىرعان جوقپىن. قازىر ءبولىنۋ – ەڭ دۇرىس ستراتەگيا», دەپتى ول. سونىمەن بىرگە, ەكس-توراعا وسى ەلدىڭ ۆاليۋتالىق وداقتان شىعۋى ەۋروپانىڭ قارجى نارىعىندا تۇراقسىزدىق تۋدىراتىنىن دا اتاپ ءوتىپتى. وسى جىلدىڭ قاڭتارىندا وتكەن سايلاۋدا جەڭىسكە جەتكەن سيريزا پارتياسى «نەسيەشىلەر ۇشتىگىنەن» گرەكياعا بەرگەن 320 ميلليارد ەۋرونى قۇرايتىن قارىزدى قايتا قۇرىلىمداۋدى نەمەسە ەسەپتەن شىعارۋدى تالاپ ەتكەن بولاتىن. بۇعان ەۋروپا وداعى دا, ەۋروپالىق ورتالىق بانك تە قارسى بولىپ وتىر.
جەتى مىڭداي سودىردىڭ كوزى جويىلدى
سوڭعى اپتالاردا سيريا مەن يراكتاعى حالىقارالىق كواليتسيا كۇشتەرىنىڭ تەررورشىلدىققا قارسى جۇرگىزگەن وپەراتسيالارىنىڭ ناتيجەسىندە «يسلام مەملەكەتىنىڭ» ەڭ كەمىندە 7 مىڭ سودىرىنىڭ كوزى جويىلعان. بۇل دەرەكتى يوردانيا اسكەري اۋە كۇشتەرىنىڭ قولباسشىسى, گەنەرال مانسۇر سالەح ءال-جابۋر كەلتىردى.
«ءبىز ويلاعان ماقساتىمىزعا قول جەتكىزۋدەمىز. سودىرلاردىڭ لوگيستيكالىق ورتالىقتارىن, قارۋ قويمالارى مەن ولاردىڭ پانالايتىن جەرلەرىن تالقاندادىق. ءبىزدىڭ ەڭ باستى ماقساتىمىز – «يسلام مەملەكەتىن» جەر بەتىنەن تولىقتاي جويۋ», – دەپ اتاپ ءوتىپتى گەنەرال. سونىمەن قاتار, قولباسشى حالىقارالىق كواليتسيانىڭ ەندىگى ماقساتى – «يسلام مەملەكەتىنىڭ» جەتەكشىسى ءابۋ باكىر ءال-باعداديدىڭ كوزىن جويۋ, ولاردىڭ كوماندالىق ورتالىقتارى مەن سودىرلاردىڭ جاتتىعۋ بازارلارىن تالقانداپ, زاڭسىز مۇناي ساتۋدىڭ جولىن كەسۋ ەكەندىگىن دە ايتقان. سەبەبى, زاڭسىز مۇناي وپەراتسيالارىن جاساسۋ ەكسترەميستەردى قارجىلاندىرۋدىڭ نەگىزگى كوزى بولىپ وتىر. وتكەن ءۇش كۇندە حالىقارالىق كواليتسيا كۇشتەرى سودىرلارعا قارسى 56 اۋە شابۋىلىن جاساعان.
تارتىپسىزدىك سالدارىنان اجال قۇشتى
كايردىڭ شىعىس جاق بولىگىندە پوليتسەيلەرمەن بولعان قاقتىعىس كەزىندە جيىرمادان استام فۋتبول جانكۇيەرى اجال قۇشقان. «نوۆوستي» اقپارات اگەنتتىگى مىسىردىڭ باس پروكۋراتۋراسىنا سىلتەمە جاساي وتىرىپ, وسىلاي دەپ حابارلادى.
قاقتىعىس ەل استاناسىنىڭ تاگاممۋ حاميس اۋدانىنداعى «پۆو» ستاديونىندا مىسىرلىق «زامالەك» كلۋبى مەن «ينبي» فۋتبول كلۋبىنىڭ كەزدەسۋىنە شامالى عانا ۋاقىت قالعاندا ورىن العان. قازا تاپقانداردىڭ بارلىعى «زامالەك» كلۋبىنىڭ جانكۇيەرلەرى ەكەن. ەلدىڭ ىشكى ىستەر مينيسترلىگى وكىلىنىڭ ايتۋىنا قاراعاندا, بيلەتى جوق جانكۇيەرلەر ستاديونعا باسا-كوكتەپ كىرمەك بولىپتى. ال پوليتسەيلەر ولارعا قارسى كوزدى جاساۋراتاتىن گاز قولدانعان. قازا تاپقاندار وسى گازدان ۋلانعان.
ەلۋ ءتورت جىلدان سوڭ...
چيليدە وسىدان 54 جىل بۇرىن اپاتقا ۇشىراعان جولاۋشىلار ۇشاعىنىڭ سىنىقتارى تابىلدى. اقپارات كوزدەرىنىڭ حابارلاۋىنشا, ۇشاق سىنىقتارىنا الپينيستەر كەز بولعان.
ەكسپەديتسياعا قاتىسۋشىلار ۇشاق سىنىقتارى ەل استاناسى – سانتياگونىڭ وڭتۇستىگىندە جەردەن 3200 مەتر بيىكتىكتەن تابىلعانىن ايتادى. الپينيستەردىڭ ءبىرى – لەوناردو البورنوستىڭ ءمالىم ەتۋىنشە, ۇشاق فيۋزەلياجىنىڭ ۇلكەن بولىگى ءبۇتىن كۇيىندە جاتىر. سونداي-اق, اپات بولعان جەردەن قازا تاپقانداردىڭ سۇيەكتەرى دە كەزدەسكەن. ۇشاق سىنىقتارىنىڭ تابىلعان جەرى قازىرشە قۇپيا ساقتالىپ وتىر. چيليلىك «LAH» اۆياكومپانياسىنىڭ ۇشاعى 1961 جىلدىڭ 3 ساۋىرىندە اپاتقا ۇشىراعان ەكەن. بورتىندا 24 ادام بولىپتى.
تەررورلىق ارەكەتپەن «اتاپ ءوتتى»
وسىدان ەكى كۇن بۇرىن يراك ۇكىمەتى 2004 جىلدان بەرى باعداد قالاسىنا ەنگىزىلگەن كومەنداتتىق ساعات ۋاقىتىن الىپ تاستاعان ەدى. وسى ماسەلە تەررورلىق ارەكەتپەن «اتاپ ءوتىلىپ» وتىر.
ەل استاناسى – باعدادتا جاسالعان جارىلىستان 15 ادام مەرت بولىپ, تاعى 45 ادام جارالانعان. وقيعا بىلاي بولىپتى: تەررورشى-جانكەشتى بەلىنە بايلانعان بومبانى شيتتەر كوپ تۇراتىن اۋداندا ىسكە قوسقان. بۇل ادان الاڭىنا ادام كوپ جينالعان كەز بولسا كەرەك. قايعىلى جاعدايدىڭ جاۋاپكەرشىلىگىن ازىرگە ەشكىم موينىنا العان جوق. اتاپ وتەيىك, وتكەن جىلدىڭ جازىنان بەرى يراك اۋماعىندا «يسلام مەملەكەتىنىڭ» تەررورشىل توپتارى جۇمىس ىستەپ كەلەدى. ولاردىڭ قولىنان قازا تاپقاندار سانى بىرنەشە مىڭعا جۋىقتايدى.
قىسقا قايىرىپ ايتقاندا:
*ماسكەۋ قالاسىنىڭ سوتىنا تەرگەۋ ورىندارىنان بوريس بەرەزوۆسكيدىڭ كۇيەۋ بالاسى گەورگي شۋپپەنى سىرتتاي قاماۋعا الۋ جونىندە ءوتىنىش تۇسكەن. ونىڭ بوريس بەرەزوۆسكيدىڭ ولىمىنە قاتىسى بار بولۋى مۇمكىن.
*يندونەزيانىڭ قاۋىپسىزدىك كۇشتەرى «تارۋنا ماكمۋر» كەمەسى سۋعا باتىپ كەتۋى مۇمكىن دەگەن اقپاراتتى تەكسەرۋدە. كەيبىر دەرەك كوزدەرى كەمە بورتىندا 197 جولاۋشى بولعانىن العا تارتادى.
گرۋزيانىڭ پرەمەر-ءمينيسترى يراكلي گاريباشۆيلي ناقتى ناتيجەلەرگە قول جەتكىزۋ جاعدايىندا رەسەي باسشىسى
*ۆلاديمير پۋتينمەن ۇنقاتىسۋعا دايىن ەكەنىن مالىمدەدى.
اقش-تىڭ دجوردجيا شتاتىندا اتىس سالدارىنان بەس ادام ءولىپ, ەكى ادام جارالانعان. وقيعا دۋگلاسۆيلل قالاسىنا جاقىن ماڭدا بولعان.
ينتەرنەت ماتەريالدارى نەگىزىندە ازىرلەندى.