اۋىل ەمحاناسى جاڭعىرتىلدى

«مەردىگەر كومپانيا «داۋلەت-سەرپىن» جشس قۇرىلىس جۇمىسىن تولىعىمەن اياق­تادى. كۇردەلى جوندەۋ كەزىندە ينجەنەرلىك جەلىلەرى, شاتىرى, قازاندىعى, ەسىك-تەرەزە­لەرى تۇگەلدەي اۋىستىرىلىپ, امبۋلاتوريا­نىڭ اۋلاسى اباتتاندىرىلدى. سونداي-اق ەلىمىزدە سيرەك كەزدەسەتىن تەڭدەسسىز زەرتحانا دا وسى جەردە اشىلادى. زاما­ناۋي قۇرىلعى قىسقا ۋاقىت ىشىندە تالداۋلاردىڭ ناتيجەسىن شىعارىپ, ناۋقاستارعا دەر كەزىندە كومەك كورسەتۋگە مۇمكىندىك بەرەدى. بۇعان قوسا, مۇندا رەنتگەن اپپاراتى ىسكە قوسىلادى. كۇردەلى جوندەۋگە دەيىن ءبىر عانا كورپۋس جۇمىس ىستەسە, ەندى ەكى كورپۋس قوسىلىپ, جۇمىس اياسى كەڭىدى, حالىققا قىزمەت كورسەتۋ ساپاسى ايتارلىقتاي ارتتى», دەيدى قوناەۆ قالالىق كوپسالالى اۋرۋحانانىڭ ديرەكتورى ايمان راقىشەۆا.

نىسان ءبىر اۋىسىمدا 100 ادامدى قا­بىل­داي الادى, كۇندىزگى ەم الۋ ءبولىمى 10 ادام­عا ارنالعان. مۇندا جالپى پراكتيكا دارىگەرلەرى, پەدياتر, بالالار ءتىس دارىگەرى, مەيىربيكەلەر مەن كىشى مەيىربيكەلەر قىزمەت ەتەدى. بارلىعى 18 مامان, كادر تاپشىلىعى جوق.

انالار مەن بالالاردى قابىلداۋعا دا جاعداي جاسالعان. دارىگەر-گينەكولوگتەر قوناەۆ قالاسىنان كەلىپ, كەستەگە ساي قىز­مەت كورسەتەدى. كابينەتى زاماناۋي جابدىق­تارمەن قامتاماسىز ەتىلگەن, بارلىق قا­جەتتى قۇرالدار بار. شۇعىل جاعداي بولسا, ناۋقاستار بىردەن قوناەۆ قالا­سىنا جونەلتىلەدى.

«اۋىل تۇرعىندارى تۇگەلگە جۋىق جۇ­گى­نەتىن مەديتسينالىق نىساننىڭ كۇردە­لى جوندەۋدەن وتكەنىنە قاتتى قۋان­دىق. مەكەمەنىڭ تالاپقا ساي بولۋى اۋىرىپ كەلگەن جاننىڭ ەڭسەسىن تىكتەپ, كوڭى­لىن سەرپىلتۋگە دە سەبىن تيگىزەرى ءسوزسىز. اپ­تا سايىن باقىلاۋدان وتەتىن جۇكتى ايەل­دەرگە دە ىڭعايلى, قولايلى. اۋىلىمىز­داعى الەۋمەتتىڭ الەۋەتىن جاقسارتۋعا باعىت­تالعان جۇمىستاردى دەر كەزىندە اياقتاپ بەرگەنى ءۇشىن قۇرىلىسشى ماماندارعا العىستان باسقا ايتارىمىز جوق», دەيدى جەرگىلىكتى تۇرعىن نازگۇل ەرگەنقىزى.

بۇگىندە شەڭگەلدى اۋىلىنا قاراستى قوسقۇدىق ەلدى مەكەنىندە فەلدشەرلىك-اكۋشەرلىك پۋنكت, سارىبۇلاق پەن اقوزەكتە مەدپۋنكت اۋىل تۇرعىندارىنا تۇراقتى, ساپالى مەديتسينالىق قىزمەت كورسەتەدى.

الماتى وبلىسى