2022 جىلدىڭ ناۋرىزىندا پەتروپاۆل قالاسىنداعى جەو-2 مۇرجاسىنىڭ ورتان بەلىنەن مايىرىلا قۇلاعانىن كوپشىلىك جاقسى بىلەدى. تۇبىندەگى ديامەترى – 12, ۇشار باسىنداعى ديامەترى 7 مەتر بولعان 150 مەترلىك مۇرجا 90–95 مەتر بيىكتىك ارالىعىندا وپىرىلىپ تۇسكەن. جاۋاپتى ادامدار جازالانىپ تا ۇلگەردى. ەنەرگەتيكتەردىڭ «جەلدەن بولدى» دەگەنى جەل ءسوز بولىپ شىعىپ, ۇكىمەتتىڭ ارناۋلى كوميسسياسى اپاتتىڭ نەگىزگى سەبەبى جوبالاۋ كەزىندە جانە بەتونداۋ جۇمىسىندا جىبەرىلگەن قاتەلىكتەن, پايدالانۋ بارىسىندا تەحنولوگيالىق تالاپتار ساقتالماعاندىقتان دەگەن قورىتىندى شىعارعان.
بىلتىر كۇزدە 180 مەترلىك جاڭا مۇرجانىڭ قۇرىلىسى ءتامامدالدى. ونى پايدالانۋعا بەرۋ بيىلعى كۇزگە بەلگىلەنگەن. قۇرىلىس-مونتاجداۋ جۇمىستارىن وتاندىق «قازجىلۋقۇرىلىس» جشس مەن اۋستريانىڭ «GrunBau» فيرماسى اتقارىپ شىقتى.
جۋىردا وبلىس اكىمدىگىنىڭ وتىرىسى بولىپ, وندا قىستىڭ اياقتالىپ قالعانىنا بايلانىستى جىلۋ ورتالىعى جۇمىسىنىڭ بۇگىنگى جايى تالقىلاندى. باسشىلىقتىڭ ءۇش جىل بۇرىنعىداي تاعى دا ناۋرىزدا توتەنشە وقيعا بولىپ قالماسىن دەگەن ساقتىق جاساپ جاتقانى كورىنىپ تۇر. ەنەرگەتيكا جانە تكش باسقارماسىنىڭ باستىعى قۋاندىق شاقىباەۆتىڭ ايتۋىنا قاراعاندا, جەو-2 قازىر قالىپتى جاعدايدا. سەگىز قازاندىق اگرەگاتى مەن التى قۇبىرلىق اگرەگات جۇمىس ىستەپ تۇر. رەزەرۆتە 2 قازاندىق پەن 1 قۇبىرلىق اگرەگات بار. تاعى ءبىر قازاندىققا كۇردەلى جوندەۋ جۇرگىزىلىپ جاتىر.
ءسويتىپ, قۋاندىق شاقىباەۆ وبلىس باسشىلارىن جانە حالىقتى تىنىشتاندىرىپ قويدى. سونىمەن قاتار ول وتكەن جازدا بىلتىرعى تاسقىن بۇلدىرگەن 53 كيلومەترلىك جوعارى ءۆولتتى ەلەكتر جۇيەلەرى جانە 737 تىرەك باعانالارىنىڭ جوندەلگەنىن ايتتى. ال جامبىل, جۇماباەۆ, تيميريازەۆ, ءۋاليحانوۆ جانە شال اقىن اۋداندارىندا 7 بلوكتى-ءمودۋلدى قازاندىقتار ورناتىلعان. سولاردىڭ كومەگىمەن اۋدان ورتالىقتارىنداعى 20 كوپقاباتتى ۇيگە جىلۋ تۇراقتى بەرىلىپ تۇرعان. ال بيىل ايىرتاۋ اۋدانىنىڭ ورتالىعى ساۋمالكول مەن ع.مۇسىرەپوۆ اۋدانىنىڭ ورتالىعى نوۆويشيمكا اۋىلدارىندا ورتالىقتاندىرىلعان جىلۋ جۇيەلەرى ىسكە قوسىلماق. وسىنداي جۇمىستاردى اقجار اۋدانىنىڭ ورتالىعى تالشىقتا دا قولعا الۋ جوسپارلانعان.
ءوڭىر اۋماعى اسا ۇلكەن بولماعانىمەن ەلەكتر ەنەرگەتيكاسىن كوپ وندىرەدى, سايكەسىنشە كوپ تۇتىنادى. بۇگىندە ەلەكتر جانە جىلۋ قۋاتىن وندىرەتىن 24 ورتالىق قازاندىق جۇمىس ىستەسە, بۇلاردان باسقا 466 اۆتونومدى جۇمىس ىستەيتىن قازاندىقتار بار.
وتىرىس بارىسىندا وبلىس بويىنشا ەنەرگەتيك مامانداردىڭ جەتىسپەۋشىلىگى دە ايتىلدى. قازىر سالادا 550 بوس جۇمىس ورنى بار. اسىرەسە ينجەنەر ەنەرگەتيكتەردىڭ تاپشىلىعى قاتتى سەزىلەدى دەيدى وبلىس اكىمى.
جۋىردا وبلىسقا بۇرىن وسىندا وبلىس اكىمىنىڭ ورىنباسارى قىزمەتىن اتقارعان عاني نىعمەتوۆ ىسساپارمەن كەلىپ, قازىر ءوزى رەكتورى بولىپ ىستەيتىن الماتى ەنەرگەتيكا جانە بايلانىس ۋنيۆەرسيتەتىنە جاستاردى شاقىرعان ەدى. بىرنەشە وقۋ ورنىندا تۇلەكتەرمەن كەزدەسىپ, ەنەرگەتيكا ۋنيۆەرسيتەتىنىڭ تابىسى مەن جەتىستىگىن اڭگىمەلەگەن. ول ءتىپتى ءوز اتىنان وبلىسقا 50 گرانت بولەتىنىن دە مالىمدەگەن. بۇل سولتۇستىكتىڭ ەنەرگەتيك كادرلارى ماسەلەسىن شەشۋگە سۇبەلى ۇلەس بولارى ءسوزسىز.
ءوڭىر باسشىسى ەنەرگەتيكا سالاسىنىڭ جۇمىسشى ماماندارىن دايارلاۋ جۇمىسىن جانداندىرۋ ماسەلەسىنە نازار اۋدارادى.
«بيىلعى «جۇمىسشى ماماندىقتار جىلى» شەڭبەرىندە ەلەكترمونتەر, ەلەكترسلەسار, دانەكەرلەۋشى ماماندىقتارىن دايارلاۋدى ارتتىرۋدى تاپسىرامىن», دەدى عاۋەز نۇرمۇحامبەتوۆ.
سولتۇستىك قازاقستان وبلىسى