يىعىمەن كوك تىرەگەن تاۋ اڭعارلارىنىڭ اسەم كورىنىسىن كوزدىڭ قاراشىعىنداي ساقتاپ, ونداعى ورماننىڭ وتالماۋىن قاداعالاپ جۇرگەن تاجىريبەلى ورمانشىنىڭ ءبىرى – بولاتحان شالدىرماسوۆ. «اكە كورگەن وق جونار» دەمەكشى, تۋعان جەردىڭ تابيعاتىن قورعاۋدى بالا جاستان بويىنا ءسىڭىرىپ وسكەن ازامات وسى سالادا شيرەك عاسىردان استام ۋاقىت تاپجىلماي ەڭبەك ەتىپ كەلەدى.
«اكەم نايمانباي ەكىنشى دۇنيەجۇزىلىك سوعىس ارداگەرى, ءىى توپتاعى مۇگەدەك بولاتىن. بىراق ەشقاشان دەنساۋلىعىن سىلتاۋراتىپ جۇمىستان جالتارعان ەمەس. 4 سىنىپتىق قانا ءبىلىمى بار ەدى, سوعان قاراماستان ورمانشىلىق تۋرالى ءبىلىمى بارىنشا تەرەڭ, تاجىريبەلى كىسى بولدى. ەڭبەكقورلىعىنىڭ ارقاسىندا سارىجاز ورمان شارۋاشىلىعىن 40 جىلعا جۋىق باسقارىپ, ابىرويلى ەڭبەك ەتتى. وسكەلەڭ جاستاردى ەڭبەككە باۋلىدى. ەس بىلگەلى اكەمدى ۇنەمى ات ۇستىندە كورەتىنمىن, اتتارىن بالاسىنداي باپتاۋشى ەدى. وسى قاسيەت ماعان دا دارىعان», دەگەن ورمانشى بولاتحان نايمانباي ۇلى كوشەتتەردى كۇتىپ-باپتاۋعا بالا جاستان ماشىقتانعانىن تىلگە تيەك ەتتى.
«ول جىلدارى اۋىلداعى ەستيار بالالار دەمالىس كەزىندە بوس جۇرمەي, ۇجىمشاردا, ورمانشىلىقتا ەڭبەك ەتەتىن. بۇل ءبىر جاعىنان اتا-اناعا كومەك, ەكىنشى جاعىنان بالالاردى ەڭبەككە باۋلۋ مەكتەبى بولدى. مەن دە وسى مەكتەپتەن ءوتتىم. بۇل كەزەڭ ءارى دەمالىس, ءارى ەڭبەككە ۇيرەنۋ ەدى. بالالىق شاقتاعى تالاي قىزىق وسى تاۋ بوكتەرىندە ءوتتى. سول كەزدە وتىرعىزعان قاراعاي, شىرشالارىمىز قازىر نۋ ورمانعا اينالىپ, جايقالىپ تۇر», دەپ قايتا ورالماس جالاۋلى جىلداردى ساعىنىشپەن ەسكە الادى.
اكە جولىن جالعاستىرىپ ورمانشى بولعانىنا 25 جىلدان اسقان بولاتحان نايمانباي ۇلى ءوزى تۋىپ-وسكەن وڭىرگە اعاش وتىرعىزىپ, كۇتىپ-باپتاۋدىڭ ناعىز مامانى, مايتالمانى اتانعان. تابيعات جاناشىرى قورشاعان ورتانى قورعاۋدا كوپكە ۇلگى بولارلىق ءىس تىندىرىپ, ومىرلىك تاجىريبەسىن جاستاردىڭ بويىنا تالماي ءسىڭىرىپ كەلەدى.
ورمانشىنىڭ ەتكەن ەڭبەك, توككەن تەرى زايا كەتكەن جوق. بىرنەشە رەت وبلىستىق, اۋداندىق اكىمدىكتىڭ, ءوزى قىزمەت ەتەتىن مەكەمەنىڭ ماقتاۋ قاعاز, العىسحاتتارى مەن باعالى سىيلىقتارىنا يە بولدى. ەكولوگيا جانە تابيعي رەسۋرستار مينيسترلىگى ورمان شارۋاشىلىعى جانە جانۋارلار دۇنيەسى كوميتەتىنىڭ ءىىى دارەجەلى «قازاقستان ورمانىن قورعاۋداعى ءمىنسىز قىزمەتى ءۇشىن» مەدالىمەن ماراپاتتالعان.
«بۇل – ماعان عانا ەمەس, ءوزىم ەڭبەك ەتكەن ۇجىمعا دا ۇلكەن مارتەبە. قازىر ۇجىمدا سايدىڭ تاسىنداي ىرىكتەلگەن ورمانشى جىگىتتەر ۇزەڭگى قاعىسىپ بىرگە ەڭبەك ەتىپ ءجۇر. سوندىقتان قانداي دا ءبىر جەتىستىككە جەتۋىمە ارىپتەستەرىمنىڭ دە ۇلەسى بار. اتا-بابالارىمىز «جالعىز اعاش ورمان ەمەس, جالعىز كىرپىش قورعان ەمەس» دەپ تەگىن ايتپاعان», دەپ اعىنان جارىلدى بولاتحان.
ورمان – كەلەر ۇرپاققا قالاتىن مۇرا, ونى كۇتىپ-باپتاۋ – ءار ازاماتتىڭ مىندەتى. اكەدەن بالاعا جالعاسقان شالدىرماسوۆتار اۋلەتىنىڭ ورمانشىلىق جولى – كاسىپكە ادالدىقتىڭ جارقىن ۇلگىسى. وسىنداي ەڭبەكقور جانداردىڭ ارقاسىندا قازاقتىڭ كەڭ دالاسى مەن ايماق-اتىرابى جاسىل ورمانعا اينالىپ, تابيعات ءوز كوركىن ساقتاپ كەلەدى.
الماتى وبلىسى