پەتروپاۆل قالاسىنداعى يسلام مادەنيەتىنىڭ تاريحى مۋزەيىندە باعدات قالاسىنان اكەلىنگەن مىنا تاسپيىق تۇر. ونىڭ ءاربىر تاسى تاۋىق جۇمىرتقاسىنداي. تاسپيىق تاستارى قىشتان جاسالعان. بارلىق تاسقا ياسين سۇرەسى باسىنان اياعىنا دەيىن جازىلعان. مۋزەيدىڭ ديرەكتورى مۇرات ءامىرجاننىڭ ايتۋىنا قاراعاندا, سالماعى 2-3 كگ. ءبىر قىزىعى, ونى تاپسىرعان ادام ءوزىنىڭ اتى-ءجونىن اتاۋدى قالاماپتى.
بۇل جىگىت 2003–2008 جىلدار ارالىعىندا بىتىمگەرشىلىك ميسسياسى نەگىزىندە قۇرىلعان قازاقستاندىق ينجەنەرلىك-ساپەرلىك وتريادتىڭ قۇرامىندا باعدات قالاسىنىڭ اۋماعىن جارىلعىش زاتتاردان تازارتۋ جۇمىستارىنا قاتىسقان ەكەن. بىردە قالانىڭ ءبىر مەشىتىن تازارتۋ بارىسىندا قيراندى اراسىنان وسى تاسپيىقتى تاۋىپ الىپ, مەشىتتىڭ يمامىنا بەرەدى. ەكەۋى اعىلشىن تىلىندە سويلەسىپ, يمام جىگىتتىڭ مۇسىلمان ەلدەرىنىڭ ءبىرى – قازاقستاننان كەلگەنىن انىقتاپ, تاسپيىقتى ەلدەرىڭە اپارا عوي, سىزدەرگە بەرگەن سىيلىعىم بولسىن دەگەن ەكەن. سول تاسپيىقتى جىگىت وزىندە ءبىراز ۇستاپ, يسلام مادەنيەتىنىڭ تاريحى مۋزەيى اشىلعاندا تابىس ەتىپتى. ءسويتىپ, شامامەن ءحىح عاسىردا جاسالعان جادىگەر يسلام مادەنيەتىنىڭ تاريحى مۋزەيىنە قويىلعان.
قازىر ول كورەرمەننىڭ كوزايىمىنا اينالىپ, مۋزەيدەگى باعالى ەكسپوناتتار قاتارىنان ورىن العان. ەكسكۋرسيا جۇرگىزۋشى القاتيا احمەتبەكوۆا دا ول تۋرالى قىزىقتى باياندايدى. ونەرىن يسلام جادىگەرىن جاساۋعا ارناعان بەلگىسىز شەبەردىڭ ەسىمىنە كورەرمەندەر تاماشا تۋىندىسى ءۇشىن العىس ايتىپ, ونى قىزىعا تاماشالايدى.
پەتروپاۆل