ەڭبەكشىقازاق اۋدانىندا ەكىنشى مارتە ۇيىمداستىرىلعان «التىن ادام» رەسپۋبليكالىق ءتۋرنيرى مارەسىنە جەتتى. جاسوسپىرىمدەر اراسىندا وتكەن تاتاميدەگى تارتىسقا ەلىمىزدىڭ 10 وڭىرىنەن جاس بالۋاندار قاتىستى.
جارىستىڭ اشىلۋ سالتاناتىندا ەڭبەكشىقازاق اۋدانىنىڭ اكىمى تالعات بايەدىلوۆ, دزيۋدودان ەلىمىزدىڭ ەڭبەك سىڭىرگەن جاتتىقتىرۋشىسى تولەگەن سۇلتانوۆ, ەڭبەكشىقازاق اۋدانى اكىمىنىڭ كەڭەسشىسى, الماتى وبلىستىق سامبو فەدەراتسياسىنىڭ ۆيتسە-پرەزيدەنتى باقىتبەك ساقالوۆ, «ەسىك» مەملەكەتتىك تاريحي-مادەني مۋزەي-قورىعىنىڭ ديرەكتورى گۇلميرا مۇحتاروۆا, سپورت ارداگەرى, ەڭبەكشىقازاق اۋدانىنىڭ قۇرمەتتى ازاماتى امانبەك ساماتوۆ, ەڭبەكشىقازاق اۋداندىق №1 بالالار مەن جاسوسپىرىمدەر سپورت مەكتەبىنىڭ ديرەكتورى اباي سىرعاباەۆ ءسوز سويلەپ, جارىسقا قاتىسۋشىلارعا ساتتىلىك تىلەدى.
باسەكەگە 500 جاس بالۋاننىڭ قاتىسۋى ەلىمىزدە دزيۋدو سپورتىنا دەگەن قىزىعۋشىلىقتىڭ ارتىپ كەلە جاتقانىن اڭعارتادى. الماتى وبلىسىنىڭ سپورت ماماندارى جاسوسپىرىمدەر اراسىنداعى جارىستاردىڭ ءجيى, ساپالى وتۋىنە ەرەكشە ءمان بەرىپ كەلەدى.
ء«تۋرنيردىڭ نەگىزگى ماقساتى – جاس بالۋاندارعا ۇلكەن جارىستارعا جول اشۋ. كەز كەلگەن سپورتشى حالىقارالىق سايىستاردا ەل مەرەيىن ۇستەم ەتسەم دەپ ارماندايدى. «التىن ادام» ءتۋرنيرى الداعى ۋاقىتتا قاناتىن كەڭگە جايىپ, بولاشاق چەمپيونداردىڭ شىعۋىنا ءوز ۇلەسىن قوساتىنىنا سەنىمدىمىن», دەدى ەڭبەكشىقازاق اۋداندىق بالالار مەن جاسوسپىرىمدەر سپورت مەكتەبىنىڭ اعا جاتتىقتىرۋشىسى سەرىك ماعجان.
ءتورت كۇنگە سوزىلعان سايىس قورىتىندىسىندا الماتى وبلىسىنىڭ سپورتشىلارى 8 التىن, 9 كۇمىس, 12 قولا مەدال يەلەنىپ, ءبىرىنشى ورىن الدى. الماتى قالاسىنىڭ سپورتشىلارى 6 التىن, 5 كۇمىس, 13 قولا مەدالدى ولجالاپ, ەكىنشى ورىننان كورىندى. سونىڭ ىشىندە الماتى وبلىسىنان چەمپيون اتانعان ۇل-قىزدار – بەيبارىس ەرجان ۇلى, ابدۋسالام ورازاليەۆ, ايتمۇرات الديار, ارىستانبەك دياس, لاۋرا ۆوروپاەۆا, الۋا بالتاباي, زەرە تالعاتقىزى, ايشا سەرىكتىڭ بەلدەسۋلەرى وتە تارتىستى ءوتتى.
الماتى وبلىسى