2024 جىلدىڭ قورىتىندىسى بويىنشا قازاقستاندا مۇعالىمنىڭ ورتاشا ايلىق جالاقىسى 1 مولشەرلەمە ءۇشىن (16 ساعات) 352 مىڭ تەڭگە, دەپ حابارلايدى Egemen.kz.
ال اۋىل مۇعالىمدەرىنە 16 ساعات ءۇشىن 435 مىڭ تەڭگە تولەنەدى.
ۇلتتىق ءبىلىم بەرۋ دەرەكتەر بازاسىنىڭ مالىمەتىنشە, ەلىمىزدەگى پەداگوگتەردىڭ جارتىسى 1,5 مولشەرلەمەمەن (24 ساعات) جۇمىس جاسايدى. ولار ايىنا ورتاشا ەسەپپەن 581 مىڭ تەڭگە جالاقى الىپ وتىر.
«قازاقستان ءبىلىم بەرۋ ىسىندەگى جەتىستىكتەرى, وليمپيادا جۇلدەگەرلەرىن دايىنداعانى جانە مەملەكەتتىك ناگراداعا يە بولعانى ءۇشىن اقشالاي سىياقىمەن ماراپاتتاۋدى ۇردىسكە اينالدىرعان ساناۋلى ەلدەردىڭ ءبىرى. 2023 جىلى 89 پەداگوگ مەملەكەتتىك سىياقىنىڭ لاۋرەاتى اتاندى, سىياقى كولەمى 3,6 ملن تەڭگەنى (1000 اەك) قۇرادى. ماراپاتتالۋشىلاردىڭ اراسىندا – ەڭبەك ەرلەرى, قازاقستاننىڭ ەڭبەك سىڭىرگەن ۇستازدارى, «ۇزدىك پەداگوگ» بايقاۋىنىڭ جەڭىمپازدارى بار», دەلىنگەن مينيسترلىك حابارلاماسىندا.
وسىلايشا, كەيىنگى بەس جىلدا قازاقستان ايلىق جالاقىنىڭ ءوسۋىن عانا ەمەس, ۇستەمەاقى تولەۋ جانە ىنتالاندىرۋ جۇيەسىن قامتاماسىز ەتۋ ارقىلى پەداگوگتەردىڭ مارتەبەسى مەن قارجىلىق الەۋەتىن كوتەرۋ باعىتىندا ماڭىزدى باستامالاردى جۇزەگە اسىرىپ كەلەدى.