قىتايدا تۇراتىن بەرىك دەگەن باۋىرىمىزدىڭ وسىدان 1 اپتا بۇرىن 8 كيلو التىن تاۋىپ العانى تۋرالى ەلىمىزدىڭ بۇقارالىق اقپارات قۇرالدارى جارىسا جازعان. ەندى وسى ساتتىلىكتىڭ ارقاسىندا قانداسىمىز قوماقتى قارجىعا يە بولدى.
التاي ايماعى شىڭگىل اۋدانىندا تۇراتىن قازاق جىگىتى تاپقان التىن قىرۋار اقشاعا ساتىلعان. قىتاي زاڭى بويىنشا كەسەك كولەمدەگى التىن مەن باعالى زاتتار ۇكىمەتكە تيەسىلى بولۋى كەرەك دەگەن تارماق بار. سوعان قاراماستان, ينتەرنەت جەلىسى ارقىلى جۇرگىزىلگەن ساۋالناماعا قاتىسقان 60 مىڭ قانداسىمىزدىڭ 97 پايىزى ات باسىنداي التىن بەرىكتىڭ ەنشىسىنە بەرىلۋى كەرەك دەگەن شەشىمدى قولداعان. ناتيجەسىندە حالىقتىڭ ۇيعارىمى دۇرىس دەپ تانىلىپ, 8 كيلوعا جۋىق باعالى زات 5 ملن. قىتاي يۋانىنا (830 مىڭ اقش دوللارى) پۇلدانىپ, وسىنشا قارجى الگى قازاق ازاماتىنا بەرىلگەن.
قانداسىمىزدىڭ سوزىنە قاراعاندا, التىندى جەر بەتىندە جىلتىراپ جاتقان جەرىنەن تاۋىپ العان. ونىڭ ديامەترى 23 سم., ەنى 18 سم., ەڭ قالىڭ جەرى 8 سم. بولعان. «تابيعاتتىڭ شەبەر قولى بەدەر سالىپ, ورنەكتەگەن ساف التىننىڭ بەتى كۇن ساۋلەسىمەن الاۋلانىپ, كوزدىڭ جاۋىن الاتىنداي جارقىرايدى», – دەپتى كورگەندەر.
مامانداردىڭ ايتۋىنشا, الەمدە مۇنداي كەسەك التىندار ءجيى ۇشىراسا بەرمەيتىن كورىنەدى. ءتىپتى, كەن ورىندارىنىڭ وزىندە دە تىم سيرەك كەزدەسەدى ەكەن.
جولدىباي بازار,
«ەگەمەن قازاقستان».