اسىق ويناۋ, اسىق اتۋ كىشكەنتايلاردى ەپتىلىككە جانە مەرگەندىك پەن دالدىككە تاربيەلەي الاتىن ۇلتتىق ويىنداردىڭ ءبىرى. ونى بۇعان دەيىن نەگىزىنەن ءوز ۇلتىمىزدىڭ پەرزەنتتەرى وزدەرىنە سەرىك ەتكەنى بەلگىلى. ال ەلىمىزدەگى وزگە ەتنوس وكىلدەرىنىڭ بالالارى اسىق ويناي ما؟ بۇل ساۋالعا كىم-كىمدە بولماسىن قاپەلىمدە جاۋاپ بەرە الماي ويلانىپ قالاتىنى انىق.
بۇعان كوپ توسىلۋدىڭ قاجەتى جوق بولىپ شىقتى. ورال قالالىق ءبىلىم بولىمىنە قاراستى مەكتەپتەن تىس جۇمىس ورتالىعىنداعى «ءتىلاشار» ۇيىرمەسى وسى اسىقتىڭ ەكى بىردەي پايداسىن ورىس مەكتەپتەرىندە وقيتىن وزگە وتانداستارىمىزدىڭ بالالارىنىڭ بويىنا دارىتىپ جۇرگەنى جوعارىدا قويىلعان ساۋالدىڭ جاۋابى ىسپەتتەس.
ماسەلەنىڭ ءمانىسى مىنادا. ءتىلاشار ۇيىرمەسىنە قاتىسۋشىلار ءۇشىن اسىق ويناۋ قازاق ءتىلىن ەمىن-ەركىن ۇيرەنۋدىڭ باستى ءبىر جولى بولىپ وتىر. ءسويتىپ, وزگە ۇلت وكىلدەرىنىڭ جەتكىنشەكتەرى ۇيىرمە جۇمىسىنا قاتىسا ءجۇرىپ تۇرمىستىق ءتىلدى ءتاپ-ءتاۋىر مەڭگەرىپ الىپتى. ءتىپتى, ولار مۇندا ۇيرەنگەن سوزدەرىنىڭ ءمان-ماعىناسىن ۇيلەرىنە بارعاننان كەيىن اتا-انالارىنا دا ايتادى. تاعى ءبىر سۇيسىنەرلىگى ولار بالالارىنىڭ ايتقاندارىن جەرگە قالدىرماي ۇلتتىق بوياۋعا تولى قازاقشا سوزدەردىڭ ءتۇپ-توركىنىن بالالارىنىڭ ايتقاندارى ارقىلى ۇعىنىپ الۋعا تىرىسادى ەكەن.
ءتىلاشار ۇيىرمەسىنىڭ جەتەكشىسى نۇرگۇل مۇراتوۆانىڭ ءتىل سىندىرۋ ساباقتارىن حالقىمىزدىڭ ۇلتتىق سالت-داستۇرلەرى مەن ۇلتتىق ويىن تۇرلەرى نەگىزىندە ءوتكىزۋى وعان قاتىسۋشىلاردىڭ ءۇلكەن قىزىعۋشىلىعىن تۋعىزا ءبىلىپتى. تەك وسىنداي جاعدايدا عانا ساباقتار اسەرلى ءارى ناتيجەلى بولاتىنىنا كوز جەتكىزىپ ءجۇرمىز. ۇيىرمە مۇشەلەرى كوبىنە ۇلتتىق «حان تالاپاي» اسىق اتۋ ويىنى تۇرىندە وتكىزىلەتىن ساباقتاردا جاڭا سوزدەردى تەز ءارى شاپشاڭ مەڭگەرىپ الادى. ۇيىرمەگە كەلەتىن وزگە ەتنوس وكىلدەرى بالالارىنىڭ مەملەكەتتىك ءتىلدى ۇيرەنۋگە دەگەن قۇشتارلىقتارى جوعارى. ولاردىڭ قاي-قايسىسى دا قازاقستاندا تۇرعان سوڭ قازاق مەملەكەتىنىڭ ءتىلىن بىلۋگە ءتيىستىمىز دەگەن وزدەرىنىڭ جۇرەكجاردى تىلەكتەرىن ماعان دا ايتىپ جاتادى, – دەيدى ول.
تەمىر قۇسايىن,
«ەگەمەن قازاقستان».
ورال.