وتكەن اپتادا سپورتشىلارىمىز ايتارلىقتاي جەتىستىكتەرگە جەتتى, سولاردىڭ بىرقاتارىنا توقتالا كەتەيىك.
اناستاسيا گورودكو الەم كۋبوگىندە قولا مەدال الدى
الماتىداعى شىمبۇلاق تاۋ شاڭعىسى كۋرورتىندا فريستايلدىڭ موگۋل, پاراللەلدى موگۋل جانە شاڭعى اكروباتيكاسى تۇرلەرى بويىنشا الەم كۋبوگىنىڭ كەزەڭدىك سايىسى اياقتالدى. ءۇش تاۋلىككە سوزىلاتىن جارىستا 17 مەملەكەتتەن كەلگەن 100-دەن اسا سپورتشى ونەر كورسەتتى.
تاياۋدا عانا الەم كۋبوگىنىڭ كەزەڭىن قىتايدىڭ بەيدايحە قالاسى قابىلداعان ەدى. اسپاناستى ەلىندە جەرلەستەرىمىز ورەلى ونەرىمەن ءوز جانكۇيەرلەرىن قۋانتا المادى. بۇل باسەكەدە اناستاسيا گورودكو – التىنشى, پاۆەل كولماكوۆ – جەتىنشى جانە يۋليا گالىشەۆا – سەگىزىنشى ورىندا قاناعات تۇتتى. باسقا سپورتشىلاردىڭ ناتيجەسى ودان دا تومەن بولدى. سول سەبەپتى دە كەۋدە تۇپكىرىندە ء«وز ەلىمىزدە, ءوز جەرىمىزدە وتەتىن جارىستا جانارىمىزبەن جەر شۇقىپ قالمايمىز با؟» دەگەن كۇدىك باسىم بولدى.
العاشقى كۇنى موگۋلشىلار سايىسقا ءتۇستى. وكىنىشكە قاراي, جەرلەستەرىمىز سەنىم ۇدەسىنەن شىعا المادى. فينالعا شىققان اناستاسيا گورودكو بۇل جولى دا قىتايداعى كورسەتكىشىن قايتالاپ, التىنشى ورىنعا تابان تىرەدى. ودان كەيىنگى جەتىنشى ساتىعا يۋليا گالىشەۆا جايعاستى. بۇل باسەكەدە الەم چەمپيوناتىنىڭ قولا جۇلدەگەرى, امەريكالىق تەسس دجونسون دارا شىقتى. ونىڭ وتانداسى, بەيجىڭ وليمپياداسىنىڭ كۇمىس جۇلدەگەرى, الەم چەمپيوناتىنىڭ ءۇش دۇركىن ءفيناليسى دجالين كاۋف كۇمىسپەن كۇپتەلسە, جاپونيالىق رينو ياناگيموتو قولاعا قول سوزدى.
اۋا-رايىنىڭ قولايسىزدىعىنا بايلانىستى ەرلەر باسەكەسى ناعىز قىزعان شاعىندا توقتاتىلدى. سول سەبەپتى دە جەڭىمپازدار مەن جۇلدەگەلەر ىرىكتەۋ سايىستارىنىڭ قورىتىندىسى نەگىزىندە انىقتالدى. بۇل رەتتە مايكل كينگسبەريدىڭ باعى جاندى. وليمپيا ويىندارىندا ءۇش (1 التىن, 2 كۇمىس) جانە الەم چەمپيوناتىندا 13 (8 التىن, 3 كۇمىس, 2 قولا) رەت جەڭىس تۇعىرىنا كوتەرىلگەن كانادانىڭ اتاقتى سپورتشىسى الاتاۋ باۋرايىندا الدىنا جان سالمادى. وڭتۇستىككورەيالىق دا يون چجان مەن جاپونيالىق يكۋما حوريشيما كۇمىس پەن قولا مەدالدى يەلەندى. ءبىزدىڭ پاۆەل كولماكوۆ بەسىنشى ورىندا قالىپ قويدى.
كەلەسى كۇنى پاراللەلدى موگۋلدان باسەكەلەر ءوتتى. بۇل جولى 19 جاستاعى اناستاسيا گورودكو ءوز جانكۇيەرلەرىن قۋانتىپ, قولا مەدالى موينىندا جارقىراتتى. دۇنيەجۇزىلىك ۋنيۆەرسيادانىڭ ەكى دۇركىن جەڭىمپازى, الەم بىرىنشىلىگىڭ قولا جۇلدەگەرى شيرەك فينالدا ءوزىنىڭ كوماندالىق ارىپتەسى يۋليا گالىشەۆانى ۇتسا, جارتىلاي فينالدا دجەيلين كاۋفقا جول بەردى. ال ءۇشىنشى ورىن ءۇشىن تارتىستا اناستاسيا تەسس دجونسونعا سون سوقتىردى. كاۋف التىننان القا تاقسا, رينو ياناگيموتو كۇمىسكە قول سوزدى.
ابىلايحان جۇبانازار تاشكەنت گران-ءپرينىڭ قولا جۇلدەگەرى
دزيۋدودان تاشكەنتتە وتكەن گراند سلەم تۋرنيرىندە قازاقستاننىڭ 20 بالۋانى كۇش سىناسقانىمەن, سولاردىڭ اراسىنان ابىلايحان جۇبانازاردىڭ عانا جولى بولدى.
العاشقى كۇنى جارىس جولىنا شىققان بالۋانداردىڭ بارلىعى دا تۇساۋكەسەر كەزدەسۋلەرىندە ءسۇرىندى. اتاپ ايتساق, ءالجان ءنۇرادىل (60 كگ) مەن بوزشا ەرداۋلەت (66 كگ) تاتامي قوجايىندارى كامولليدين باحتيەروۆ پەن ابدۋراقىم نۋتفۋللوەۆقا, ەرجان ەرەنعايىپوۆ (66 كگ) ءباا-ءنىڭ وكىلى قازبەك ناگۋچەۆقا ەسە جىبەردى. عاليا تىنباەۆا (48 كگ) تاجىكستاندىق احيلا مۋمينوۆادان, ديانا بۋكرەەۆا (48 كگ) مەن باقىت قۇساقباەۆا (57 كگ) رەسەيلىك سابينا گيلليازوۆا مەن يرينا زۋەۆادان جەڭىلدى. قۇندىز جىلقىباي (52 كگ) يسپانيالىق ماريا لاپۋەرتا كوماستىڭ الدىندا جىگەرسىزدىك تانىتتى.
ەكىنشى كۇنى ابىلايحان جۇبانازار (81 كگ) كوپشىلىك كوڭىلىنەن شىعاتىنداي ونەر كورسەتتى. العاشقى اينالىمدا تاجىك سانوتۋلو مۇساەۆقا سان سوقتىرعان ول كەلەسى كەزەڭدە باحرەيننىڭ نامىسىن قورعاپ جۇرگەن رەسەلىك لەگيونەر گادجيمۇرات وماروۆقا ەسە جىبەردى. ودان كەيىن گەرمانيالىق تيمو كاۆەليۋس پەن جاپونيالىق سوتارو فۋدجيۆارونى جىققان ابىلايحان قولا مەدالدى موينىنا ءىلدى. ءدال سول مەجەدەن كورىنۋگە نازگۇل ماراتوۆانىڭ دا مۇمكىندىگى بولدى. بىراق ءۇشىنشى ورىن ءۇشىن باسەكەدە ونىڭ الەم چەمپيوناتىنىڭ ءۇل دۇركىن ءفيناليسى, فرانتسيالىق يۋليا تولوفۋاعا ءالى جەتپەدى.
ال ەسەت قۋانوۆ (73 كگ), باقىتجان ابدۋراحمانوۆ (73 كگ), ايدار اراپوۆتى (90 كگ), ەرماحان انۋاربەك (90 كگ), بەيبىت ماديەۆ (100 كگ), مارات بايقاموۆ (100 كگ) جانە ەلامان ەرعاليەۆ (+100 كگ) ەل سەنىمىن اقتاي المادى. سونداي-اق, قىزدارىمىز دا باستاپقى كەزدەسۋلەرىندە جەڭىلىستىڭ كەرمەك ءدامىن تاتتى.
فوتو: قايسار ەسەنوۆ, قازاق كۇرەسى فەدەراتسياسى
ءۇندىستاندا قازاق كۇرەسىنەن الەم چەمپيوناتى ءوتتى
ءۇندىستاننىڭ باس شاھارى – نيۋ-دەليدەگى «تياگارادج» ۇلتتىق ستاديونىندا قازاق كۇرەسىنەن الەم چەمپيوناتى اياقتالدى. ەكى كۇنگە سوزىلعان سايىستا جەر جاھاننىڭ 20-دان اسا مەملەكەتىنەن كەلگەن 200-گە جۋىق بالۋان باق سىنادى. ولار 16 سالماق دارەجەسى بويىنشا ءتۇرلى-ءتۇستى مەدالدى ساراپقا سالدى.
جارىستىڭ اشىلۋ سالتاناتىندا العاشقىلاردىڭ ءبىرى بولىپ ءسوز العان Qazaq Kuresi اسسوتسياتسياسىنىڭ باس ديرەكتورى دامير بەكبوسىنوۆ: ء«ۇندىستاندا قازاق كۇرەسىن بەلسەندى تۇردە دامىپ كەلەدى. وسى كۇنگە دەيىن اتالعان مەملەكەتتە سپورتتىڭ وسى ءتۇرى بويىنشا ءتورت رەت ەل چەمپيوناتى ۇيىمداستىرىلدى. سىزدەردىڭ ءتول ونەرىمىزگە جوعارى قىزىعۋشىلىق تانىتىپ جۇرگەندەرىڭىز – بىزدەر ءۇشىن ۇلكەن ماقتانىش. ەكىجىلدىقتىڭ باستى دوداسىندا باق سىنايتىن بالۋاندارعا ساتتىلىك, ال كورەرمەندەرگە جارقىن ەموتسيا تىلەيمىن, – دەپ ءتىل قاتتى.
ەرلەر اراسىنداعى باسەكەلەر سەگىز سالماقتا ءوتىپ, سونىڭ جەتەۋىندە ءبىزدىڭ جىگىتتەر قارسىلاس شاق كەلتىرمەدى. اتاپ ايتساق, بەكجان تولەپوۆ (55 كگ), مەيىرجان بەرەكەتوۆ (60 كگ), نۇر امانشۇكىروۆ (66 كگ), جۇماجان قوجامبەكوۆ (74 كگ), ەرسىن سەيىتقازىنوۆ (82 كگ), ايدوس عالىموۆ (90 كگ) جانە ەرسۇلتان مۇزافاروۆ (100 كگ) باس جۇلدەنى قانجىعالارىنا بايلادى. تەك اسا اۋىر سالماقتا قازاق بالۋاندارى توپ جارا المادى. فينالدا نۇرداۋلەت جارىلقاپوۆ جەڭىلىستىڭ كەرمەك ءدامىن تاتتى. ول وزبەكستاننىڭ الىبى مۇقسىن حۋسسيمۋدينوۆقا ەسە جىبەردى. ال جۇلدەلى ورىنداردى يەلەنگەندەر قاتارىندا ءۇندىستان, گرۋزيا, ازەربايجان, پولشا, تاجىكستان جانە ەستونيانىڭ اپايتوستەرى بار.
ايەلدەردىڭ سايىسىندا ايجان جىلقىباەۆا (48 كگ), راۋزا نۇرمۇحامبەتوۆا (56 كگ), زارينا ءزارىپوۆا (65 كگ) جانە ءالبينا باقيەۆا (+77 كگ) التىننان القا تاقتى. روزا نىسانتايقىزى (70 كگ) فينالدا نيدەرلاندتىق سەم ۆان دۋننان ۇتىلىپ, كۇمىس مەدالدى ەنشىلەدى. ارۋجان اداسقان (52 كگ) مەن گ ۇلىم ەلۋباي (60 كگ) قولا مەدالدى يەمدەندى. وزگە سالماق دارەجەلەرىندە سيتورا ەلمۇرودوۆا (52 كگ), ۇندىستاندىق اننۋ اننۋ (60 كگ) جانە گرۋزيالىق نينو ودزەلاشۆيلي (77 كگ) وزدى.
اتالعان سپورتتىق شارا بارىسىندا UWW تەحنيكالىق دەلەگاتى ونۋر شيمشەك Qazaq Kuresi اسسوتسياتسياسىنىڭ باس ديرەكتورى دامير بەكبوسىنوۆتىڭ بىرىككەن كۇرەس الەمىنىڭ (UWW) ۇلتتىق كۇرەس تۇرلەرى كوميتەتى اتقارۋشى كەڭەسىنىڭ مۇشەلىگىنە قابىلدانعانىن جاريالادى.
تاعى ءبىر ايتا كەتەرلىك جايت, تورتكۇل دۇنيەنىڭ 40-تان استام مەملەكەتىندە قازاق كۇرەسى فەدەراتسيالارى جۇمىس ىستەيدى. بۇگىنگە دەيىن سپورتتىڭ وسى تۇرىنەن 10 الەم چەمپيوناتى, 12 ازيا بىرىنشىلىگى, 6 الەم كۋبوگى مەن 6 ەۋروپا چەمپيوناتى ءوتتى. 2023 جىلى قازاق كۇرەسى ەر-رياد قالاسىندا وتكەن دۇنيەجۇزىلىك جەكپە-جەك ويىندارىنىڭ باعدارلاماسىنا تۇڭعىش رەت ەندى. ال 2024 جىلعى V دۇنيەجۇزىلىك كوشپەندىلەر ويىندارى اياسىنداعى قازاق كۇرەسى جارىسىنا 46 مەملەكەتتىڭ 300-دەن استام سپورتشى قاتىستى. ءسويتىپ, قازاق كۇرەسى – كەشەندى ويىندارداعى ەڭ كوپ سپورتشى قاتىسقان سپورت ءتۇرى بولىپ تانىلدى.
كونكيشى ەۆگەني كوشكين حەرەنۆەندە التىن الدى
كونكيدەن نيدەرلاندتىڭ حەرەنۆەن قالاسىندا ۇيىمداستىرىلعان الەم كۋبوگىندە ەۆگەني كوشكين 500 مەترلىك قاشىقتىقتى 34,46 سەكۋندتا جۇگىرىپ ءوتىپ, باس جۇلدەنى ولجالادى.
ەكىنشى جانە ءۇشىنشى ورىندى بەيجىڭ وليمپياداسىنىڭ كۇمىس جۇلدەگەرى, الەم چەمپيونى, كانادالىق لورەن ديۋبرەل (34,51) مەن جارىس قوجايىنى, الەم چەمپيوناتىنىڭ كۇمىس جۇلدەگەرى, ەۋروپا چەمپيونى ەننينگ دە بوو (34,52) ەنشىلەدى. ەستەرىڭىزگە سالا كەتەيىك, وسىنىڭ الدىندا عانا كوشكين حەرەنۆەندە قولا السا, وسىدان ءبىر اپتا بۇرىن پولشادا الدىنا جان سالمادى.
ۆيكتور درۋزين پاريجدە التىن الدى
فرانتسيانىڭ استاناسى – پاريجدە ارتىستىك جۇزۋدەن الەم كۋبوگىنىڭ كەزەڭدىك سايىسى اياقتالدى.
العاشقى كۇنى تەحنيكالىق باعدارلاما بويىنشا سىنعا تۇسكەن ەدۋارد كيم ۇلىبريتانيالىق رانجۋ تومبليننەن عانا قالىپ قويىپ, كۇمىسپەن كۇپتەلدى. ال كۇنى كەشە ۆيكتور درۋزين جەڭىس تۇعىرىنىڭ ەڭ بيىك ساتىسىنا كوتەرىلدى. ول جەكە باعدارلامادا تەڭدەسسىز دەپ تانىلدى. سايىستىڭ ءدال وسى تۇرىندە ارتۋر مايدانوۆ مەن ۆالەريا ستولبۋنوۆا جۇبى كۇمىس مەدالدى مويىندارىنا ءىلدى.
جۇلدە العانىمەن, جولداما بۇيىرمادى
سۋ دوبىنان قىتايدىڭ چجاوتسينىندە وتكەن ازيا چەمپيوناتىندا قازاقستاننىڭ ايەلدەر قۇراماسى قولا مەدالدى يەلەندى.
شەشۋشى سىندا ولار وزبەكستاندى 13:6 ەسەبىمەن ەڭسەردى. ءبىر وكىنشتىسى, ءبىزدىڭ قىزدار جۇلدە العانىمەن, الەم چەمپيوناتىنا قاتىساتىنداردىڭ تىزىمىنە قوسىلا المادى. ويتكەنى, اتالعان جارىستىڭ جولداماسى تەك فينالعا شىققان ۇزدىك قوس كومانداعا عانا بەرىلدى.