ءۋاليحانوۆ اۋدانى قىزىلجار ءوڭىرىنىڭ وڭتۇستىگىندە ورنالاسقان. اۋدان ورتالىعى – كىشكەنەكول اۋىلى. اۋدان ورتالىعىنان وڭتۇستىك-شىعىسقا قاراي 22 شاقىرىم جەردەگى اقبۇلاق اۋىلى تۇرعىندارىنىڭ قازاق-ورىسى ارالاس. 2010 جىلعا دەيىن اۋىل «چەحوۆ» اتالعان, ارتىنان تۇرعىنداردىڭ كەلىسىمىمەن وسى مەكەننىڭ ەجەلگى قازاقشا اتاۋى «اقبۇلاق» اتى بەرىلدى.
ءبىزدىڭ كەيىپكەرىمىز ۆيكتوريا وسى اۋىلداعى ولەگ ۆيۋشكيننىڭ وتباسىندا 2000 جىلى دۇنيەگە كەلگەن. ۇزاماي ۆيكتوريانىڭ اكەسى مەن شەشەسى اجىراسىپ, سۇيكىمدى نەمەرەسىن اجەسى تامارا الەكساندروۆنا الىپ قالىپ, ءوزى وسىرەدى. اجەسى – وسىنداعى مەكتەپتىڭ ديرەكتورى بولىپ ۇزاق جىلدار قىزمەت ىستەگەن, كوزى قاراقتى جان. ول مەكتەپتە قازاق سىنىپتارىن اشىپ, نەمەرەسى ۆيكتوريانى دا قازاقشاعا بەرەدى. ءتىلى ورىسشا شىققان, ۇيدە دە, تۇزدە دە ورىسشا سويلەپ جۇرگەن بالاعا قازاق ءتىلىن ۇيرەنۋ وڭاي بولماعان. الايدا اجەسى ونىڭ قازاق ءتىلىن ۇيرەنۋىن قاتتى قاداعالاپ, ءوزى بىلمەسە دە نەمەرەسىنىڭ ۇيرەنگەنىن باقىلاپ وتىرادى. تۇسىنىگى تەرەڭ ادام قازاقستاندا تۇرعان ادامداردىڭ ءبارى دە قازاق ءتىلىن بىلگەنىن قالايدى. ۇيىنە قازاق اقىن-جازۋشىلارىنىڭ كىتاپتارىن دا الىپ, ۆيكتورياعا وقىتىپ, مازمۇنىن سۇراپ, تىڭداپ وتىرادى.
اسىل اجەنىڭ ەڭبەگى دالاعا كەتپەدى, ۆيكتوريا مەكتەپتى «التىن بەلگىگە» اياقتاپ, ءوزى جاقسى كورەتىن ماماندىعى – پوليتسيانىڭ قوستانايداعى ۋنيۆەرسيتەتىنە تۇسەدى. قازاق قۇربىلارى ۆيكتوريانىڭ قازاق ءتىلىن بىلگەنىنە قىزىعا قارايدى ەكەن.
ۆيكتوريانىڭ ءوزى دە قازاقشانى جەتىك ءبىلىپ, ءتىپتى ورىس تىلىنە قاراعاندا ونى ۇزدىك يگەرىپ العان. ءتىپتى قازاقتىڭ ءدىلىن دە تانىپ, بويىنا سىڭىرەدى. ول ول ما, 2023 جىلى يسلام ءدىنىن قابىلداپ, مەشىتتە يمامنىڭ ازان شاقىرۋىمەن ءبادريسافا دەگەن مۇسىلمان ەسىمىن الادى. ء«بادريسافانى» قايدان الدىڭ دەگەن سۇراققا ۇلت ۇستازى احمەت بايتۇرسىن ۇلىنىڭ جارى, ورىس قىزى الەكساندرا يۆانوۆنانىڭ يسلام ءدىنىن قابىلداعاندا ء«بادريسافا» اتىن العانىن باسشىلىق ەتكەنىن ايتادى.
«قوستانايدا وقىپ جۇرگەندە, احمەت بايتۇرسىن ۇلى تۋرالى كينو كورگەن ەدىم. سول فيلمنەن ونىڭ جارى ء«بادريسافا» اتىن العانىن ءبىلدىم. سوندىقتان يسلام ءدىنىن قابىلداعاندا مەن دە ء«بادريسافا» بولۋدى قالادىم. بۇل ءسوزدىڭ ماعىناسى دا عاجاپ ەكەن, ء«بادرۋن» دەگەن تولىق ايدى, «سافا» (ساف) دەگەن كىرشىكسىز تازا دەگەندى بىلدىرەدى. سونىمەن, «كىرشىكسىز تازا تولىق اي» بولىپ ءجۇرمىن», دەيدى ءبادريسافا.
قازىر ءبادريسافا پەتروپاۆل قالالىق 1-پوليتسيا بولىمىندە ۋچاسكەلىك ينسپەكتور بولىپ ىستەيدى. پوليتسيانىڭ اعا لەيتەنانتى شەنى بار. بارلىق مادەني ءىس-شاراعا قاتىسىپ, دومبىرامەن ءان دە ايتادى. ءوزىنىڭ جۇمىسىنا دا جەتىك. قازىر رامازان ايىن توسىپ, ورازا تۇتۋعا دا دايىندالىپ جۇرگەن كورىنەدى. الداعى ارمانى جاقسى تاربيە كورگەن قازاق جىگىتىمەن وتاۋ قۇرۋ ەكەنىن دە ايتىپ قالدى. ءبىز ونىڭ ارمانى ورىندالىپ, قازاق وتباسىنىڭ وشاعىن تۇتاتىپ, باقىتتى كەلىن, ۇزدىك پوليتسيا قىزمەتكەرى اتانعانىن تىلەيمىز.
سولتۇستىك قازاقستان وبلىسى