اقتوبە ءتارتىپ ساقشىلارى اراسىندا شاڭعىدان جارىس ءوتتى

اقتوبە. 9 اقپان. اقتوبەدە ىشكى ىستەر ورگاندارى قىزمەتكەرلەرىنىڭ اراسىندا شاڭعىدان جارىس وتكىزىلدى. بۇل تۋرالى egemen.kz ءتىلششىسى حابارلادى. قالا ماڭىنداعى «كىرپىشتى» كەنتىندەگى شاڭعى بازاسىندا «دينامو» دەنە شىنىقتىرۋ سپورت قوعامنىڭ 90 جىلدىعىنا ارنالعان ىشكى ىستەر ورگانى قىزمەتكەرلەرى اراسىندا  شاڭعىدان جارىس وتكىزىلدى. جارىستى وبلىستىق ىشكى ىستەر دەپارتامەنتى ۇيىمداستىردى. سپورتتىق ءىس-شارانىڭ باستى ماقساتى - ىشكى ىستەر ورگانىندا دەنە شىنىقتىرۋ, سپورت جۇمىستارىن جەتىلدىرۋ, دەنساۋلىقتى كۇشەيتۋ, اعزانى شىنىقتىرۋ, شىدامدىلىققا, جىلدامدىققا, باتىلدىققا, تاباندىلىققا تاربيلەۋ ءۇشىن قىسقى سپورت تۇرلەرىن ناسيحاتتاۋ, سونداي-اق قازاقستان پوليتسياسىنىڭ ءيميدجىن كوتەرۋ بولىپ تابىلادى. بۇل جارىسقا تەك اتتەستاتتالعان پوليتسيا قىزمەتكەرلەرى قاتىستى. دوداعا بارلىعى 80 ادام قاتىستى, ولار 25 كومانداعا ءبولىنىپ, ءار كوماندادا ەكى ەر ادام, ءبىر ايەل ادام بولدى. سونىمەن قاتار, ايتا كەتۋ كەرەك جارىسقا ءبىرىنشى رەت قىلمىستىق اتقارۋ جۇيەسى دەپارتامەنتى, مامانداندىرىلعان كۇزەت قىزمەتى باسقارماسى, اقتوبە زاڭ ينستيتۋتىنىڭ قىزمەتكەرلەرى دە قاتىستى. سونداي-اق ىشكى ىستەر ورگانىنىڭ ارداگەرلەرى مەن زەينەتكەرلەرى دە جارىس جولىنا شىقتى. بارلىق جەڭىمپازدار مەن قاتىسۋشىلارعا باعالى سىيلىقتار, سپورتتىق كوستيۋمدەر, سپورتتىق فورمالار, سومكەلەر, سونداي-اق كۋبوك, مەدالدار مەن گراموتالار تابىستالدى. ساتىبالدى ءساۋىرباي. دەرەك: egemen.kz. سۋرەت: egemen.kz.