قىزىلجارداعى وبلىستىق امبەباپ, عىلىمي كىتاپحاناعا قازاق ادەبيەتىنىڭ كلاسسيگى, ايگىلى جازۋشى ءسابيت مۇقانوۆتىڭ ەسىمى قايتىس بولعاننان كەيىن 2-3 ايدان كەيىن بەرىلگەن. مۇنداي جەدەلدىكتىڭ سەبەبى – قىزىلجاردىڭ قاق ورتاسىنداعى وسى ءۇش قاباتتى تاماشا كىتاپحانانى جازۋشىنىڭ ءوزى دەپۋتاتتىق ساۋال جولداۋ ارقىلى سالدىرعان. ءتىپتى ءوز قالتاسىنان دا قاراجات قوسىپتى. سوندىقتان كىتاپحانا قىزمەتكەرلەرى 52 جىل بويى جازۋشىنىڭ جاقسىلىعىن ۇمىتپاي, ونىڭ ەسىمىن قۇرمەتتەپ كەلەدى.
قازاق ادەبيەتىنىڭ قارا نارى, تەلەگەي-تەڭىز دارىن يەسى ءسابيت مۇقانوۆتىڭ تۋعانىنا 125 تولۋىنا وراي بيىل وتكىزىلەتىن وبلىستاعى مادەني ءىس-شارالار جۋىردا «تاعدىرلى قالامگەر» دەگەن اتپەن وسى كىتاپحاناداعى ينتەراكتيۆتى كىتاپ كورمەسىمەن اشىلدى. مۇندا جازۋشىنىڭ جاس كەزىندەگى مول دەرەكتەر, ماسكەۋدەگى ادەبيەت جانە ونەر مەملەكەتتىك ارحيۆىنەن الىنعان ءومىرى مەن شىعارماشىلىعىنا قاتىستى ارحيۆ قۇجاتتارى, باسقا جەردە جاريالانباعان ماقالالارى, سوعىس كەزىندە سويلەگەن سوزدەرى جانە ت.ب. قىزعىلىقتى مۇرالار بار.
كورمەنىڭ بۇدان كەيىنگى بولىمىندە جازۋشىنىڭ وتباسىنان الىنعان سيرەك سۋرەتتەر قويىلعان. سونىڭ ىشىندە بايماعامبەت ءىزتولين, كەنەن ازىرباەۆ, جامبىل جاباەۆپەن تۇسكەن سۋرەتتەرى ورىن العان. كەڭەس وداعى ادەبيەتىنىڭ تارلاندارى ا.تولستوي, م.شولوحوۆ, ي.شۋحوۆ, ع.عۇلاممەن ت.ب. دەمالىس ساعاتتارىندا جۇرگەندە تۇسكەن قىزىقتى سۋرەتتەرى دە وقىرماندار مەن كورەرمەندەرگە ءتۇرلى وي سالادى.
ءسابيت مۇقانوۆتىڭ سوعىس جىلدارىندا «پراۆدا» گازەتىنىڭ ءتىلشىسى بولىپ مايدانعا بارعانىن كوپ ادام بىلە بەرمەيدى. وسى ساپاردا ول كوپتەگەن قازاقستاندىق قاھارماندارمەن, سونىڭ ىشىندە كەڭەس وداعىنىڭ باتىرى مالىك عابدۋللينمەن سۋرەتكە تۇسكەن ەكەن. كورمەدە سول سۋرەتتەردىڭ دە كوشىرمەلەرى تۇر.
سابەڭنىڭ توتە جازۋمەن جازا باستاعان «قىزىلجار» رومانىنىڭ قولجازباسى دا وسىندا قويىلعان. وكىنىشكە قاراي, روماننىڭ 26 بەتى عانا جازىلىپتى. جازۋشى وسى رومانىن الدەبىر سەبەپتەرمەن اياقتاي الماعان كورىنەدى. ال قولجازبانى س.مۇقانوۆتىڭ كوپجىلدىق تەرىمشىسى مايرا جانساەۆا اپايىمىز وقىپ بەرگەن. قولجازبانىڭ تۇپنۇسقاسى س.مۇقانوۆتىڭ الماتىداعى مەملەكەتتىك ادەبي-مەموريالدىق مۋزەي كەشەنىندە. ال كوشىرمەسىن جەرلەستەرىنە جازۋشىنىڭ نەمەرەسى ءنايلا ارىستانقىزى مۇقانوۆا بەرىپتى. قازىر روماننىڭ كوشىرمەسى «دارىننىڭ سانسىز قىرلارى» دەگەن اتپەن اشىلاتىن بولىمىنە ەكسپونات رەتىندە قويىلعان.
سابەڭ ادەبيەتتىڭ بارلىق جانرىندا ەڭبەك ەتكەن ادام ەكەنى بەلگىلى. ول ء«ومىر مەكتەبى» تريلوگياسىن, ء«مولدىر ماحاببات», «بوتاگوز», اققان جۇلدىز» جانە ت.ب. روماندارىن, «بالۋان شولاق» حيكاياتىن جازۋمەن قاتار «شوقان ءۋاليحانوۆ», «ساكەن سەيفۋللين», «قاشقار قىزى» درامالارىن, «سۇلۋشاش», «اقبوپە» پوەمالارىن, «ەسەيۋ جىلدارى» اتتى پۋبليتسيستيكالىق روماندارىن جانە ت.ب. جازعان. ل.حاميدي مەن ە.برۋسيلوۆسكي وپەرالارىنىڭ ليبرەتتاسىن, بىرنەشە اندەردىڭ سوزدەرىن دە شىعارعان. ونىڭ وسىناۋ شىعارمالارىنىڭ العاشقى نۇسقالارىنىڭ كوشىرمەلەرى كورمەگە تولىققا جۋىق قويىلعان.
وبلىستىق كىتاپحانادان باسقا مۋزىكالىق-درامالىق تەاتر, №32-مەكتەپ, ۇلكەن كوشە, تۋعان اۋىلى سابەڭنىڭ ەسىمىمەن اتالادى. ەكى-ءۇش ەسكەرتكىشى دە بار. كورمەدە وسىلار تۋرالى دا ايتىلىپ, ولاردىڭ بۇگىنگى تىنىس-تىرشىلىگىنەن دەرەكتەر كورسەتىلگەن. جاساندى ينتەللەكتىڭ الگوريتمدەرى قولدانىلىپ, QR-كود ارقىلى كەز كەلگەن كورەرمەن كورمەنىڭ ءاربىر بولىمىنەن مول دەرەكتەر الا الادى. ءتىپتى جازۋشىنىڭ داۋسىن دا ەستۋگە بولادى.
پەتروپاۆل