وسكەمەن. 9 اقپان. وسكەمەندە مەملەكەتتىك-جەكە ارىپتەستىك شەڭبەرىندە بالاباقشا اشۋ ماسەلەلەرى قاراستىرىلعان جيىن ءوتتى. بۇل تۋرالى egemen.kz ءتىلشىسى حابارلادى.
شاراعا بىرقاتار كاسىپكەرلەر شاقىرىلىپ, 2006 جىلدىڭ 7 شىلدەسىندە قابىلدانعان قر «كونتسەسسيالار تۋرالى» زاڭى اياسىنداعى بيزنەستىڭ جاڭا باعىتتارىن قۇرۋ مۇمكىندىكتەرى ءتۇسىندىرىلدى.
«شىعىس قازاقستان وبلىسى مەملەكەتتىك-جەكە ارىپتەستىك وڭىرلىك ورتالىعى» اق جەتەكشىسى ءاليا ماساقوۆا وبلىس پەن كاسىپكەرلەر اراسىنداعى بىرىككەن جوبالاردى دامىتۋ جونىندە اڭگىمەلەدى. اتالعان ورتالىق ءبىلىم سالاسىندا ەكى جوبانى – بالاباقشالار كەشەنىنىڭ قۇرىلىسى مەن پايدالانۋعا بەرىلۋىن جۇزەگە اسىرادى.
«وسكەمەندە 1640 ورىنعا ەسەپتەلگەن 6 بالاباقشا قۇرىلىسىن جۇرگىزۋ جوسپارلانىپ وتىر. كونتسەسسيونەردىڭ كىرىسى مەملەكەتتىك ءبىلىم بەرۋ تاپسىرىستارىن ورنالاستىرۋ جانە قوسىمشا ءبىلىم بەرۋ قىزمەتىن كورسەتۋ ەسەبىنەن تۇسەدى», – دەدى ءاليا ماساقوۆا.
سونداي-اق مەملەكەت كونتسەسسيونەردىڭ ينۆەستيتسيالىق شىعىنىنىڭ بەلگىلى كولەمىنە 7 جىلدىق كومپەنساتسيالىق قولداۋ ءتۇرىن ۇسىنادى. ودان وزگە ۋاقىتشا قايتارىمسىز پايدالانۋ قۇقى بار جەر تەلىمىن ۇسىنىپ, ينجەنەرلىك جەلىلەردى تارتۋعا كومەكتەسەدى.
جيىنعا قاتىسقان حالىقارالىق ساراپشى پەر يۆ ليۋك مۇنداي ارىپتەستىكتىڭ كاسىپكەرلەر ءۇشىن وتە پايدالى ەكەندىگىن ايتتى. «مەن بۇدان بيزنەستى قولداۋدىڭ ۇلكەن شارالارىن كورىپ تۇرمىن. قازاقستاندا ورتا قىزمەت كورسەتۋ, الەۋمەتتىك قىزمەت كورسەتۋ سالالارى وتە پايدالى, كەلەشەگى بار جوبالار بولىپ تابىلادى», – دەدى ول.
وسىدان كەيىن بيزنەس وكىلدەرى بىرقاتار ساۋالدارىن قويدى. ولارعا كاسىپكەر الماگۇل مىڭباەۆا جاۋاپ بەردى. قازىر ونىڭ وسكەمەندە ەكى بالاباقشاسى, زىرياندا ءبىر بالاباقشاسى بار. بالاباقشالاردىڭ ءبىرى سوگرا ىقشاماۋدانىندا ورنالاسقان. بۇل – قالانىڭ اتالعان بولىگىندە بۇلدىرشىندەردى ەكى تىلدە تاربيەلەيتىن جانە 1,5 جاستان باستاپ قابىلدايتىن جالعىز بالاباقشا. وندا 11 توپتان تۇراتىن 385 بالا تاربيەلەنەدى. 73 ادام جۇمىسپەن قامتىلىپ وتىر. كاسىپكەر ءۇش بالاباقشاعا 1020 ورىنعا مەملەكەتتىك ءبىلىم تاپسىرىسىن العان. وسى ارقىلى جالپى ەسەپتە 214 جاس مامانعا جۇمىس كوزىن تاۋىپ بەردى.
دۋمان اناش.
دەرەك: egemen.kz
سۋرەت: وسكەمەن قالامسى اكىمدىگىنىڭ ءباسپاسوز قىزمەتى.