سولتۇستىك قازاقستان وبلىسى قىزىلجار اۋدانىنداعى «قۇلاگەر» يپپودرومىندا قازاقستان رەسپۋبليكاسىنىڭ قۇسبەگىلەك ونەردەن كەزەكتى چەمپيوناتى اياقتالدى. ەكى كۇنگە سوزىلعان ساياتشىلاردىڭ سايىسىنا استانا مەن الماتى قالالارىنان جانە 12 وبلىستان ىرىكتەلگەن ۇزدىك قۇسبەگىلەر 62 بۇركىت, 29 قارشىعا جانە 17 يتەلگىسىن اكەلىپ قاتىستى.
جارىستىڭ العاشقى كۇنى بۇركىت قۇستارىنىڭ باسەكەسىمەن باستالدى. قۇسبەگىلەر بۇركىتتى قولعا شاقىرۋ, شىرعاعا سالۋ كەزەڭدەرىندە ءوز شەبەرلىكتەرىن كورسەتتى. جارىس قورىتىندىسى بويىنشا ۇزدىك شىققان 18 قۇسبەگى اقتىق مارەگە جولداما الدى.
سايىستىڭ ەكىنشى كۇنى قارشىعا مەن يتەلگىلەردىڭ سىنعا تۇسۋىمەن جالعاستى. بۇل جارىستاردا دا قۇستاردىڭ العىرلىعى, ۇشۋعا دايىندىعى, اڭ مەن قۇستى الۋ قابىلەتى جانە قۇسبەگىنىڭ باپتاۋ شەبەرلىگى ساراپقا سالىندى.
چەمپيونات قورىتىندىسىنا سايكەس بۇركىت قۇسى ساناتىندا باس جۇلدەنى اقمولا وبلىسىنىڭ وكىلى ەرلان كەنجەتاەۆ جەڭىپ الدى. ەكىنشى ورىندى اباي وبلىسىنىڭ وكىلى ەرزات بايقاداموۆ ەنشىلەدى. جۇلدەلى ءۇشىنشى ورىن اقمولا وبلىسىنىڭ تاعى ءبىر وكىلى رۋسلان تۋمىرزينگە بۇيىردى.
قارشىعانىڭ العىرلىعى مەن ەپتىلىگى سىنالعان جارىستا ءبىرىنشى ورىندى تۇركىستان وبلىسىنىڭ وكىلى ارشاباي داۋرەن الدى. ودان كەيىنگى ورىنداردى جامبىلدىق سەرىكبولسىن جالعاس ۇلى جانە تاعى ءبىر تۇركىستاندىق زاكي ماحمۇتحان قانجىعالارىنا بوكتەردى.
«يەگى يتەلگىنىڭ تاماعىنداي» دەپ سۇلۋ قىزدىڭ يەگىن سۋرەتتەگەندە قولدانىلاتىن شاعىن تۇرىقتى يتەلگىلەردىڭ سايىسىندا قاراعاندىلىق تاڭات وسپانقۇلوۆتىڭ قۇسى الدىنا جان سالمادى. ەكىنشى ورىندى پاۆلودارلىق ەرمەك يمانزايىپ جانە جۇلدەلى ءۇشىنشى ورىندى الماتى قالاسىنىڭ وكىلى سۇلتانسەرى ەسەنتاەۆتىڭ قۇستارى يەلەندى.
چەمپيونات كۇندەرىندە قىزىلجار ءوڭىرىنىڭ اسپانى جارقىراپ, ناعىز «قار اپپاق, تۇلكى قىزىل, بۇركىت قارا» دەپ سىپاتتالاتىن قانسونارداعى اسەم سۋرەت تۇردى. بۇل قۇسبەگىلەر مەن كورەرمەندەردىڭ دە دەلەبەسىن قوزدىرىپ, قىزۋلىقتارىن ارتتىردى. «ەشكىمگە زيانى جوق ءوزىم كورگەن ءبىر قىزىق ءىسىم ەكەن سۇم جالعاندا» دەپ ۇلى اباي ايتقانداي ۇلتىمىزدىڭ كەرەمەت ونەرىنىڭ ءبىرى حالىققا رۋحاني ءلاززات سىيلادى.
چەمپيوناتتى وتكىزۋگە رەسپۋبليكالىق قۇسبەگىلىك فەدەراتسياسىنىڭ باس سەرىكتەسى – «سامۇرىق قازىنا» ۇاق» اق, سونداي-اق, تۋريزم جانە سپورت مينيسترلىگى, سولتۇستىك قازاقستان وبلىسىنىڭ اكىمدىگى, «تۋريزم يندۋسترياسى مەن سپورتتى قولداۋ قورى» كق جانە قر ۇلتتىق سپورت قاۋىمداستىعى دەمەۋشىلىك جاساعانى بەلگىلى بولدى.