دۋبايدا وتكەن «The UAE SWAT Challenge 2025» ارنايى ماقساتتاعى بولىمشەلەر جارىسىندا قازاقستاننىڭ 5 كومانداسى العاشقى وندىققا ىلىكتى. وندا الەمنىڭ 80-نەن اسا ەلىنەن 106 كوماندا باق سىنادى. ەل نامىسىن قورعاۋعا كۇشتىك قۇرىلىمدارىنىڭ 12 كومانداسى قاتىستى.
ىشكى ىستەر مينيسترلىگىنىڭ «سۇڭقار» جانە «توميريس» كوماندالارى حالىقارالىق جارىستىڭ كۇمىس جۇلدەگەرى اتاندى. ال ۇلتتىق قاۋىپسىزدىك كوميتەتىنىڭ «ارىستان» كومانداسى ءتورتىنشى ورىنعا يە بولدى. مەملەكەتتىك كۇزەت قىزمەتى مەن قورعانىس مينيسترلىگىنىڭ كوماندالارى دا شەبەرلىكتىڭ ۇزدىك ۇلگىسىن كورسەتتى.
وسى ورايدا قورعانىس ءمينيسترى, گەنەرال-پولكوۆنيك رۋسلان جاقسىلىقوۆ بىرىككەن اراب امىرلىكتەرىندەگى ارنايى ماقساتتاعى بولىمشەلەر جارىستارىنا قاتىسقان بىرقاتار وفيتسەرگە «ەل قورعانى» مەدالىن تابىستادى. سونداي-اق ارنايى وپەراتسيالار كۇشتەرىنىڭ بەلگىسى مەن العىس حاتتار بەردى. ال ەرەكشە كوزگە تۇسكەن اسكەري قىزمەتشىلەر مەرزىمىنەن بۇرىن اسكەري اتاعىن الدى. وسىلايشا سالا باسشىسى ارنايى وپەراتسيالار كۇشتەرىنىڭ اسكەري قىزمەتشىلەرىن قۇتتىقتادى.
– مۇنداي حالىقارالىق دەڭگەيدەگى جارىس اسكەريلەردىڭ جاۋىنگەرلىك قابىلەتىن شىڭداۋعا, تاجىريبە الماسۋعا ىقپال ەتەدى. ەڭ باستىسى ەلدەر اراسىنداعى قاۋىپسىزدىك سالاسىنداعى ءوزارا ءىس-قيمىلدى نىعايتادى. ارنايى وپەراتسيالار كۇشتەرىنىڭ «جاۋباسار» كومانداسى العاش رەت ەليتالىق بولىمشەلەردىڭ جارىستارىنا قاتىسىپ وتىر. جارىس باعدارلاماسى ارنايى پوليتسيا كۇشتەرىنە ارنالعان. دەگەنمەن جاقسى ناتيجە كورسەتتى. الدا يوردانياداعى اسكەري ارنايى ماقساتتاعى بولىمشەلەردىڭ جانە ۇلىبريتانياداعى «كەمبري ءپاترۋلى» جارىستارى ۇيىمداستىرىلادى. ونىڭ ناتيجەلەرىنەن ساربازداردىڭ كاسىبي دايارلىقتارىن كورە الامىز, – دەيدى ر.جاقسىلىقوۆ.
قازاقستاندىق اسكەري دەلەگاتسيا ساپارى اياسىندا IDEX جانە NAVDEX-2025 حالىقارالىق قورعانىس تەحنولوگيالارى كورمەسىنىڭ جۇمىسىمەن تانىسىپ, زەردەلەدى. ADNEC كورمە ورتالىعىندا ولار قارۋ-جاراق, اسكەري تەحنيكا ۇلگىلەرىن جانە قورعانىس ماقساتىنداعى تەحنولوگيالار ۇسىنعان ءىرى اسكەري-ونەركاسىپتىك كومپانيالاردىڭ پاۆيلوندارىن ارالادى.
كورمە الاڭىندا رۋسلان جاقسىلىقوۆ ءباا ۆيتسە-پرەمەرى جانە قورعانىس ءمينيسترى شەيح حامدان يبن مۇحاممەد ءال ماكتۋممەن كەزدەستى. تاراپتار ەكىجاقتى ءوزارا ءىس-ارەكەت باعىتتارىن تالقىلاپ, قورعانىس سالاسىنداعى ىنتىماقتاستىقتى دامىتۋعا بەيىلدىلىگىن راستادى.
بۇعان قوسا قازاقستاننىڭ قورعانىس ءمينيسترى قورعانىس ونىمدەرىنىڭ جەتەكشى وندىرۋشىلەرىنىڭ باسشىلارىمەن كەلىسسوز جۇرگىزدى.