استانا. 8 اقپان. باسكەتبولدان ۆتب ليگاسىندا ەل نامىسىن قورعايتىن «استانا» سىرت الاڭدا ۆولگوگرادتىڭ «كراسنىي وكتيابر» كومانداسىنان 84:72 ەسەبىمەن جەڭىلدى. بۇل تۋرالى egemen.kz حابارلادى.
وسى ويىن الدىندا «استانانىڭ» باس جاتتىقتىرۋشىسى اۋىستى. كلۋب باسشىلىعىنىڭ مۇنداي شەشىم قابىلداۋىنا «استانانىڭ» بيىلعى ماۋسىمداعى سۇرەڭسىز ويىنى سەبەپ بولدى. ءتىپتى, ۆتب ليگاسى مەن ەۆروچەللەدج ءتۋرنيرى اياسىنداعى سوڭعى بەس كەزدەسۋدە جەڭىلىس تاۋىپ, تۋرنير كەستەسىندەگى جاعدايى ابدەن ناشارلاپ كەتتى. ناتيجەسىندە, الەكساندر تريفۋنوۆيچ قىزمەتىنەن كەتىپ, ەلوردالىقتاردى ۆولگوگرادقا ليتۆالىق مامان رامۋناس بۋتاۋتاس باستاپ باردى. بۇل مامانمەن «استانا» ماۋسىم سوڭىنا دەيىن كەلىسىم شارت جاساستى. بۋتاۋتاس كەزىندە ليتۆا قۇراماسىن جاتتىقتىرىپ, 2008 جىلعى پەكين وليمپياداسىندا كومانداسىمەن بىرگە 4-ورىننان كورىنگەن. ودان بولەك, ليتۆانىڭ اتاقتى «جالگيريس» كومانداسىن دا جاتتىقتىرعان تاجىريبەلى مامان. لاتۆيا, ۋكراينا ەلدەرىندە دە جۇمىس ىستەگەنىن ايتا كەتەيىك.
ۆولگوگرادتاعى ويىن استانالىقتاردىڭ باسىمدىعىمەن باستالدى. ەسەپتى اشقان دا ءبىزدىڭ كوماندا. ءتىپتى 6:0 ەسەبىمەن العا شىقتى. ۇزىلىسكە دەيىن تىزگىندى ۋىستارىنان شىعارماعان «استانا» ويىنشىلارى ءبىرىنشى كەزەڭدى 20:15 ەسەبىمەن ءوز پايدالارىنا اياقتادى.
ەكىنشى كەزەڭدە الاڭ يەلەرىنىڭ ويىنىنا قان جۇگىرىپ, ءسات سايىن ۇپايلارىن مولايتا بەردى. اسىرەسە, كالپەپپەر-ۆيكتور-حەميلتون ۇشتىگى «استانانىڭ» قورعانىسىن بىرىنەن سوڭ ءبىرى بۇزىپ, ءوز جانكۇيەرلەرىنىڭ العىسىنا بولەندى. ۇلكەن ۇزىلىسكە دەيىن 24 ۇپاي جيعان ۆولگوگرادتىقتارعا ءبىزدىڭ باسكەتبولشىلار 14 ۇپايمەن عانا جاۋاپ بەردى. ەكى كەزەڭ قورىتىندىسى بويىنشا «كراسنىي وكتيابر» 39:34 ەسەبىمەن العا شىقتى.
نەمىس مامانى ديرك باۋەرمان جاتتىقتىراتىن جەرگىلىكتى كوماندا كەلەسى كەزەڭدە دە قارقىنىن جوعالتقان جوق. ءتىپتى, بۇل كەزەڭدە استانالىقتاردىڭ الاڭدا بار-جوعى بىلىنبەدى دەسەك, ارتىق ايتقاندىق ەمەس. سەبەبى, 10 مينۋت بويى ءبىزدىڭ كوماندا بار-جوعى التى-اق ۇپاي جيسا, «كراسنىي وكتيابر» قورجىندارىنا 19 ۇپاي سالىپ, جالپى ەسەپتى 58:40-قا جەتكىزدى.
شەشۋشى سوڭعى كەزەڭدە بۋتاۋتاس شاكىرتتەرى جيناقىلىق تانىتقانداي بولدى. دجەرري دجونسون, پاتريك كالاتەس, لۋكا اندريچ جانە راشيد ماحالباسيچتار ويىندى قۇتقارىپ قالۋ ماقساتىندا ايانىپ قالمادى. الايدا, ولاردىڭ بۇل تالپىنىستارى تىم كەش ەدى. ءتورتىنشى كەزەڭ 32:26 ەسەبىمەن «استانانىڭ» پايداسىنا اياقتالدى. دەسەك تە, بۇل كورسەتكىش ەكىنشى جانە ءۇشىنشى كەزەڭدەردە قاجەت ۇپايلارىنا قول جەتكىزگەن ۆولگوگرادتىقتارعا ويىندا جەڭىسكە جەتۋگە كەدەرگى بولمادى. ەلوردالىقتار ۆتب ليگاسىندا وسىمەن بەسىنشى مارتە قاتارىنان جەڭىلىسكە ۇشىرادى.
ويىن بارىسىندا ەڭ كوپ ۇپاي جيناعان سپورتشى «كراسنىي وكتيابر» ساپىنداعى لامونت حەميلتون. ول 40 مينۋتتىڭ ىشىندە 23 ۇپايدىڭ يەسى اتاندى. ال 18 ۇپاي جيناعان دجەرري دجونسون «استانا» ساپىنداعى ەڭ مەرگەن ويىنشى دەپ تانىلدى.
وسى جەڭىسىنەن كەيىن «كراسنىي وكتيابر» تۋرنير كەستەسىندە «استانانى» اينالىپ ءوتىپ, پلەي-وفف كەزەڭىنە جولداما بەرەتىن 8-ورىنعا جايعاستى. ءبىر ساتى تومەن سىرعىعان استانالىقتار بۇگىندە 11-ورىندا تۇر. قوس قارسىلاس ماۋسىم باسىندا استانادا سىنعا ءتۇسىپ, ءبىزدىڭ كوماندا 94:76 ەسەبىمەن جەڭىسكە جەتكەنىن ايتا كەتەيىك.
«استانا» ليگا اياسىنداعى كەلەسى ويىندى 13 اقپان كۇنى فينليانديالىق «بايزونس» كومانداسىنا قارسى وتكىزەدى. وعان دەيىن, ياعني, 11 اقپاندا ەۆروچەللەدج ءتۋرنيرىنىڭ توپتىق كەزەڭىندە يتاليانىڭ «برينديزي» كومانداسىمەن سىنعا تۇسەدى. بۇل ويىن استاناداعى «سارىارقا» رەسپۋبليكالىق ۆەلوترەگىندە وتەدى.
ەلامان قوڭىر.
دەرەك: egemen.kz.
سۋرەت: bcastana.kz.