استانا. 7 اقپان. تەننيستەن فەدەراتسيا كۋبوگى ءۇشىن جارىس اياسىندا قازاقستان جاپونيادان 2:0 ەسەبىمەن جەڭىلدى. بۇل تۋرالى egemen.kz حابارلادى.
وتاندىق تەننيسشىلەر اتالعان جارىستا ازيا جانە مۇحيت ايماعى ەلدەرىنىڭ ءبىرىنشى توبىندا ويناعانى بەلگىلى. «ۆ» توبىنا تۇسكەن قىزدارىمىز وسىعان دەيىنگى بارلىق ويىندارىندا جەڭىسكە جەتىپ, ءىى الەمدىك توپقا بەرىلەر جولداماعا تالاسۋعا مۇمكىندىك العان ەدى. ول ءۇشىن جاپونيانى جەڭسە بولعانى. دەگەنمەن, ءدال جاپون تەننيسشىلەرىمەن بولعان شەشۋشى تارتىستا ۇلتتىق قۇرامانىڭ كاپيتانى دياس دوسقاراەۆ كوماندا قۇرامىنا وزگەرىس ەنگىزدى. سوعان سايكەس, جاپونياعا قارسى جەكەلەي سىندا ەلىمىزدىڭ ءبىرىنشى, الەمنىڭ 33-راكەتكاسى زارينا دياس شىققان جوق. كاپيتان ونى جۇپتىق كەزدەسۋدەگى ويىنعا ساقتاۋدى ءجون كورىپتى.
ناتيجەسىندە, جەكەلەي سىندا ياروسلاۆا شۆەدوۆا مەن WTA رەيتينگىندە 111-ساتىدا تۇرعان, تاجىريبەسى از يۋليا پۋتينتسەۆاعا سەنىم ارتىلدى. وسى جارىس بارىسىندا جەكەلەي سىنعا العاش رەت شىعىپ تۇرعان يۋليا قارسىلاسى ميساكي دويعا 6:1, 6:3 ەسەبىمەن ەسە جىبەردى. سونداي-اق, جاپونيانىڭ كوشباسشىسى كۋرۋمي نارامەن باسەكەگە تۇسكەن شۆەدوۆا دا العاشقى سەتتى 6:2 ەسەبىمەن جەڭگەنىمەن, قالعان ەكى كەزەڭدە 6:7, 3:6 ەسەبىمەن جول بەردى. وسىلايشا ەكى ويىندا قاجەت ۇپايلارىن ولجالاعان جاپونيا تەننيسشىلەرى مەرزىمىنەن بۇرىن جەڭىسكە جەتتى. كەزدەسۋ تاعدىرى شەشىلگەندىكتەن قوس كوماندا اراسىنداعى جوسپارلانعان جۇپتىق ويىن بولعان جوق. بۇل تارتىستا جوعارىدا ايتقانىمىزداي, زارينا دياس پەن سلاۆا شۆەدوۆا شىعۋى ءتيىس بولاتىن.
ەندى ەرەجەگە سايكەس جارىستى ءارى قاراي جاپونيا جالعاستىرادى. ولار ءىى الەمدىك توپتىڭ ەڭ وسال كومانداسىمەن شەبەرلى بايقاسادى. جەڭگەنى اتالعان توپتىڭ جولداماسىنا يە بولادى.
فەدەراتسيا كۋبوگى جارىسىنىڭ ازيا جانە مۇحيت ايماعى ەلدەرى اراسىنداعى باسەكەسىندە قازاقستان وسىمەن جاپونيادان ءۇشىنشى رەت جەڭىلىپ وتىر. العاش رەت 2000 جىلى كەزدەسىپ, ءبىزدىڭ قىزدار 3:0 ەسەبىمەن جەڭىلگەن ەدى. ول كەزدە جارىستىڭ جاپونيادا وتكەنىن ايتا كەتەيىك. كەلەسى تارتىس 2011 جىلى تايلاند جەرىندە ءوتتى. بۇل جولى وتاندىق تەننيسشىلەر ءبىر ويىندا جەڭىسكە جەتكەنىمەن, جالپى ەسەپتە 2:1 ەسەبىمەن قارسىلاستارىنا ەسە جىبەردى.
ەلامان قوڭىر.
دەرەك: egemen.kz.
سۋرەت: facebook.com.