استانا. 7 اقپان. ەلوردالىق «بارىس» سىرت ايدىندا نيجني نوۆگورودتىڭ «تورپەدوسىنا» 2:1 ەسەبىمەن ەسە جىبەردى. بۇل تۋرالى egemen.kz حابارلادى.
ويىنعا «بارىستىڭ» شابۋىلشىسى نيكولاي انتروپوۆ قاتىسقان جوق. سونداي-اق, استانالىقتاردىڭ باس جاتتىقتىرۋشىسى اندرەي نازاروۆ قاقپاشى يان لاتسونى ءبىرىنشى مينۋتتان باستاپ ايدىنعا شىعاردى.
قۇرلىقتىق حوككەي ليگاسى اياسىندا وتكەن ويىن ايدىن يەلەرىنىڭ باسىمدىعىمەن باستالدى. ءتىپتى, نەبارى 2-مينۋتتا «بارىس» ءتورت ويىنشىمەن قالدى. سەبەبى, قولىنداعى ويىن تاياعىن تىم بيىك كوتەرگەنى ءۇشىن كونستانتين رۋدەنكو ەكى مينۋتتىق ايىپ ۋاقىتىمەن جازالاندى. قۋانىشىمىزعا وراي, بۇل مۇمكىندىكتەن «تورپەدو» حوككەيشىلەرى ناتيجە شىعارا المادى. تارتىستىڭ 6-مينۋتىندا ايدىن يەلەرىنىڭ كەزەكتى سوققىسى قاقپا ماڭدايشاسىنان كەيىن سەرپىلدى. تەك كەزەڭنىڭ ورتا تۇسىنا اۋعان كەزدە قوناقتار ءوز ويىن ورنەگىن تاپتى. ۇزىلىسكە دەيىن «بارىس» ەكى مارتە ويىنشى باسىمدىعىنا يە بولعانىمەن, ەسەپ اشىلمادى.
كەلەسى كەزەڭ دە العاشقىسىنداي تەڭ جاعدايدا ءوربىدى. دەگەنمەن, بۇل جولى جانكۇيەرلەر سوعىلعان شايبانىڭ كۋاسى بولدى. ويىننىڭ 25-مينۋتىندا «بارىس» ساپىنداعى وسكارس بارتۋليس الىستان قاقپاعا سوققى باعىتتاپ كوردى. «تورپەدو» قاقپاشىسى يۆان كاسۋتيننىڭ ءدال الدىنا كەلە جاتىرعان شايبانىڭ باعىتىن وزگەرتىپ ۇلگەرگەن كونستانتين پۋشكارەۆ ناتيجەلى سوققىنىڭ اۆتورى اتاندى. ەكىنشى ۇزىلىسكە دەيىن ايدىن يەلەرى ەكى رەت ويىنشى باسىمدىعىن پايدالانا المادى. ءوز كەزەگىندە «بارىس» ويىنشىلارى ءبىر مارتە سونداي باسىمدىققا يە بولعانىمەن, ەسەپ وزگەرىسسىز قالدى.
شەشۋشى كەزەڭ «تورپەدونىڭ» شابۋىلىمەن باستالدى. ماتچتىڭ 43-مينۋتىندا «بارىس» ساپىنان كەۆين داللمەن ەكى مينۋتقا ايدىننان قۋىلدى. دەسەك تە, ول بار بولعانى 13 سەكۋندتان كەيىن ويىنعا قايتا قوسىلدى. سەبەبى, پەتەريس سكۋدرا جاتتىقتىراتىن قارسىلاستارىمىزعا باسىمدىقتى جۇزەگە اسىرۋ ءۇشىن وسىنشا ۋاقىت جەتكىلىكتى بولدى.
تارازى باسى تەڭەسكەننەن كەيىن قوس كوماندانىڭ قارقىنى كۇشەيىپ, ويىننىڭ جىلدامدىعى ارتتى. الايدا, بۇل تارتىستا «تورپەدونىڭ» باعى باسىم بولىپ, ماڭىزدى ءۇش ۇپايعا قول جەتكىزدى. جەڭىس شايباسىن كەزدەسۋدىڭ 54-مينۋتىندا ساكاري سالمينەن ەسىمدى حوككەيشى سوقتى.
«بارىس» جەڭىلگەنىنە قاراماستان شىعىس كونفەرەنتسياسىنداعى 6-ورنىن ساقتاپ قالدى. ال «تورپەدو» باتىس كونفەرەنتسياسىندا ءبىر ساتى جوعارى ورلەپ, 8-ورىنعا جايعاستى. استانالىق كوماندا كەلەسى ويىندى 11 اقپان كۇنى سىرت ايدىندا نوۆوكۋزنەتسكىنىڭ «مەتاللۋرگىنە» قارسى وتكىزەدى.
ەلامان قوڭىر.
دەرەك: egemen.kz.
سۋرەت: khl.ru.