ناۋرىز مەيرامى قارساڭىندا «جولاۋشىلار تاسىمالى» اق قازاقستان مەن وزبەكستان اراسىنداعى تۋريستىك قاتىناستى كەڭەيتۋ ماقساتىندا «كەرۋەن ەكسپرەسس», «Jibek Joly» پويىزدارىن ىسكە قوسادى.
جولاۋشىلار ناۋرىز مەيرامى تۋىسقان ەكى ەلدە قالاي تويلاناتىنىن تاماشالاپ, ۇلتتىق داستۇرلەردىڭ ەرەكشە ۇيلەسىمىن سەزىنە الادى. «كەرۋەن ەكسپرەسس» تۋريستىك پويىزى الماتىدان جول تارتىپ, الماتى – تۇركىستان – تاشكەنت – سامارقاند – تاراز –الماتى باعىتىندا جۇرەدى. ساياحات ۇزاقتىعى – 7 كۇن, 21–27 ناۋرىز ارالىعىندا جول تارتادى.
«Jibek Joly» پويىزى دا الماتىدان جولعا شىعىپ, الماتى-تۇركىستان – تاشكەنت – سامارقاند – الماتى باعىتىمەن قاتىنايدى. تۋر 6 كۇنگە سوزىلادى, 20–25 ناۋرىز ارالىعىندا وتەدى.
تۋريستىك پويىزدار زاماناۋي وتاندىق وندىرىستەن شىققان جاڭا ۆاگونداردان قۇرالعان, ءىشى-سىرتى ۇلتتىق ويۋ-ورنەكتەرمەن بەزەندىرىلگەن. «كەرۋەن ەكسپرەسس» پويىزىندا 5 ۆاگون بار: 4 كۋپە, 1 مەيرامحانا ۆاگونى. «Jibek Joly» پويىزى 7 ۆاگوننان تۇرادى: 6 كۋپە, 1 مەيرامحانا ۆاگونى.
تۇركىستاندا تۋريستەر كيەلى ورىندار مەن تاريحي ساۋلەت ونەرىنىڭ جاۋھارلارىمەن تانىسادى. ولاردىڭ قاتارىندا يۋنەسكو-نىڭ بۇكىلالەمدىك مۇرالار تىزىمىنە ەنگەن قوجا احمەت ياساۋي كەسەنەسى, ۇلى جىبەك جولى ءداۋىرىنىڭ ەرەكشە اتموسفەراسىن قايتا جاڭعىرتقان «كەرۋەن-ساراي» كەشەنى بار.
تاشكەنتتە تۋريستەر حازراتي يمام تاريحي كەشەنى, باراق حان مەدرەسەسى, ءابۋ باكىر كاففال شاشي, تولە بي كەسەنەلەرى سىندى تاريحي ورىنداردى ارالاپ, كونە ساۋلەت ونەرىنىڭ سىرلارىنا قانىعادى. سونىمەن قاتار «Magic City» تاقىرىپتىق ساياباعى, باسقا دا زاماناۋي دەمالىس ورىندارىندا ۋاقىتتارىن قىزىقتى وتكىزە الادى.
سامارقاندتا تۋريستەر شاحي-زيندا كەشەنى, گۋر-ەمير كەسەنەسى, ايگىلى رەگيستان الاڭىنداعى شەر-دور, ءتىللا-كاري, ۇلىقبەك مەدرەسەلەرىن ارالاپ, كونە وركەنيەتتىڭ تاريحي مۇرالارىمەن جاقىنىراق تانىسادى.
تۋريستىك پويىزدىڭ قورىتىندى ايالداماسى – ەلىمىزدىڭ كونە شاھارلارىنىڭ ءبىرى تاراز قالاسى. مۇندا تۋريستەر ءوڭىردىڭ تاريحي-مادەني مۇرالارمەن تانىسىپ, باي ارحيتەكتۋرالىق جادىگەرلەرىن تاماشالاي الادى.
تۋرپاكەت قۇنىنا كومفورتتى تۋريستىك پويىزداعى جول ءجۇرۋ, جوعارى دەڭگەيدەگى سەرۆيس, كاسىبي گيدتەر جەتەكشىلىگىندەگى ەكسكۋرسيالار, تاماقتانۋ, كىرۋ بيلەتتەرى, ترانسفەر قىزمەتتەرى قامتىلعان.
تۋر قتج-نىڭ ۇيىمداستىرۋىمەن, «وزبەكستان تەمىر جولدارى» كومپانياسى, تۋريزم كوميتەتى, كولىك مينيسترلىگى, «Kazakh Tourism», تاراز قالاسى, تۇركىستان وبلىسى اكىمدىكتەرىنىڭ قولداۋىمەن جۇزەگە اسىرىلادى.