كورنەكتى فولكلورتانۋشى, فيلولوگيا عىلىمدارىنىڭ دوكتورى ەدىگە تۇرسىنوۆتىڭ جەكە كىتاپحاناسى Almaty Management University-دە اشىلدى. كىتاپتاردى ۋنيۆەرسيتەتكە عالىمنىڭ قىزى قارلىعاش تۇرسىنوۆا سىيعا تارتتى. ءىس-شارا «Open Library AlmaU», «اسپانداۋ» عىلىمي ءبىلىم بەرۋ قورى, «ادىرنا» ۇلتتىق ەتنوگرافيالىق بىرلەستىگى جانە «جولشى» فيلوسوفيالىق قوعامىنىڭ قولداۋىمەن «دالا ءىلىمى» تۇركى عىلىمي سەمينارى اياسىندا ۇيىمداستىرىلدى.
كەزدەسۋدى جىلى ەستەلىكتەرمەن باستاعان مودەراتور, PhD, «جولشى» فيلوسوفيالىق قوعامىنىڭ توراعاسى نۇرجان ق ۇلىمجانوۆ عالىمنىڭ ءادىسناماسى ەپوستانۋ, ەتنومۋزىكولوگيا, ەتنوگرافيا, ەتنوپسيحولوگيا, فولكلورتانۋ مەن ادەبيەتتانۋدىڭ دامۋىنا ايتارلىقتاي اسەرى حاقىندا وي ءوربىتىپ, قاتىسۋشىلاردىڭ نازارىن وسى باعىتتاعى ەڭبەكتەرىنە اۋداردى.
كىتاپحانانىڭ اشىلۋىنا قاتىسقان «AlmaU» پرەزيدەنتى اسىلبەك قوجاحمەتوۆ «ەدىگە تۇرسىنوۆ – ءوز ءومىرىن قازاق اۋىز ادەبيەتى مەن فولكلورىن زەرتتەۋگە ارناعان كورنەكتى زەرتتەۋشى. كىتاپحانامىز ونىڭ كوپ جىلعى ەڭبەكتەرى مەن عىلىمي ىزدەنىستەرىنىڭ ناتيجەلەرى جينالاتىن ورىنعا اينالارى ءسوزسىز», دەپ اتاپ ءوتتى.
قازىرگى ۋاقىتتا «AlmaU» قورىنا قالانعان ەدىگە تۇرسىنوۆتىڭ جەكە كىتاپحاناسى 2 مىڭعا جۋىق كىتاپپەن تولىقپاق. جيىندا تاريح عىلىمدارىنىڭ دوكتورى مارات سەمبين عالىمنىڭ ەلىمىز تاۋەلسىزدىك العانعا دەيىنگى عىلىمداعى ءومىرى, تاباندىلىعى مەن بىلىمگە دەگەن قۇشتارلىعىنىڭ ارقاسىندا مول مۇرا جيناعانىن تىلگە تيەك ەتتى. بۇل وسكەلەڭ ۇرپاقتىڭ تاريحىمىز بەن ادەبيەتىمىز تۋرالى سيرەك قورمەن تانىسۋىنا مۇمكىندىك بەرەدى.
ءال-فارابي اتىنداعى قازاق ۇلتتىق ۋنيۆەرسيتەتىنىڭ پروفەسسورى, تۇركىتانۋشى قايرات جاڭاباەۆ عالىم ەدىگە تۇرسىنوۆتىڭ ەرەكشە وقىرمان بولعانىن ەسكە الدى. «عىلىمي باسپادان شىققاننىڭ ءبارىن كەيىنگە قالدىرماي, قارىنداشپەن بەلگىلەپ وتىرىپ, سىن-ەسكەرتپەلەر, تولىقتىرۋلارىن ەنگىزىپ, بىردەن وقۋعا تىرىساتىن. ءوز كىتاپحاناسى ءۇشىن دە, وقىرمان ءۇشىن دە ەڭ جاقسى عىلىمي ادەبيەتتەردى تاڭداۋعا كاسىبي كوزقاراسپەن قارادى», دەدى ول.
فيلوسوفيا عىلىمدارىنىڭ دوكتورى, مادەنيەتتانۋشى, قۇرمانعازى اتىنداعى قازاق ۇلتتىق كونسەرۆاتورياسىنىڭ پروفەسسورى الميرا ناۋرىزباەۆا: «ەدىگە تۇرسىنوۆ قازاق فولكلورىنىڭ شىنايى بايلىق ەكەنىن تۇسىنۋگە شابىتتاندىردى. ءبىز سياقتى وتكەن عاسىردىڭ 70-جىلدارداعى ۇرپاقتارىن مادەني مۇرانى قۇرمەتتەۋگە ۇندەدى. ول فولكلوردى زەرتتەۋدە عانا ەمەس, ەلىمىزدىڭ الەۋمەتتىك-گۋمانيتارلىق عىلىمىنىڭ ءادىسناماسىندا سەرپىلىس جاساعان عالىم», دەدى. ءىس-شارا ستۋدەنتتەردىڭ مۋزىكالىق جانە تەاترلاندىرىلعان قويىلىمىنا ۇلاستى.
الماتى