الماتى وبلىستىق بالىق اۋلاۋ فەدەراتسياسى قوناەۆ قالاسى اكىمدىگىمەن بىرلەسىپ, قاپشاعاي سۋقويماسىندا بالىق اۋلاۋدان اشىق بىرىنشىلىك ۇيىمداستىردى.
جارىسقا الماتى وبلىسىنىڭ بىرنەشە وڭىرىنەن, الماتى, قوناەۆ قالالارىنان كاسىبي بالىقشىلار قاتىستى. بارلىعى 15 كوماندا (ارقايسىسى 3 ادامنان) جەكە جانە كوماندالىق ەسەپ بويىنشا ءوزارا سىنعا ءتۇستى. بىرىنشىلىك 5 ساعاتقا سوزىلدى. ناتيجەسىندە, ەڭ ۇلكەن بالىق اۋلاعان بالىقشى ە.كەمباەۆ «Big Fish» جشس-نىڭ ارنايى جۇلدەسىن جەڭىپ الدى. كوماندالىق ەسەپتە «قوناەۆ-3» كومانداسى 3-ورىندى, «ناۋتيلۋس» كومانداسى 2-ورىندى, «Feeder.kz» كومانداسى 1-ورىندى قانجىعاسىنا بايلادى.
«فەدەراتسيانىڭ قۇرىلعانىنا ءبىر جىلدان ەندى استى. وسى ۋاقىت ىشىندە مۇشەلەر سانى ايتارلىقتاي ارتتى. جىلىنا 6-7 رەت بالىق اۋلاۋ جارىسىن ۇيىمداستىرىپ وتىرامىز. بۇل جولى قولداۋ كورسەتكەن قوناەۆ قالاسى اكىمدىگىنە العىس بىلدىرەمىز», دەدى فەدەراتسيا باسشىسىنىڭ ورىنباسارى دامير سەرگىباەۆ.
جارىس بارىسىندا بارلىق قاۋىپسىزدىك تالاپتارى ساقتالدى, مۇزدىڭ قالىڭدىعى 70 سم بولدى. ايتا كەتەرلىگى, بالىقشىلار دەمالىستان كەيىن سۋقويماسىنىڭ ۇستىندەگى قوقىستاردى جيناپ كەتۋگە مىندەتتى. تابيعاتقا جاناشىرلىق ءار دەمالۋشىنىڭ جاۋاپكەرشىلىگىنەن باستالادى. قورشاعان ورتانى لاستاعانعا اكىمشىلىك جازا قاراستىرىلعانىن ءاردايىم ەستە ۇستاعان ءجون.
الماتى وبلىسى