بۇگىن ۇكىمەت وتىرىسىندا پرەمەر-مينيستر ۇلىتاۋ وبلىسى «جومارت» كەنىشىندە قازا بولعان جۇمىسشىلاردىڭ وتباسىنا كوڭىل ايتتى, دەپ جازادى Egemen.kz.
ولجاس بەكتەنوۆ ۇكىمەت وتىرىسىن شاحتاداعى اپاتقا بايلانىستى ماسەلەلەردى تالقىلاۋدان باستادى.
«ۇكىمەت اتىنان شاحتاداعى اپات سالدارىنان قازا تاپقان كەنشىلەردىڭ تۋعان-تۋىستارى مەن جاقىندارىنا كوڭىل ايتامىن. مارقۇمداردىڭ وتباسىلارىنا بارلىق قاجەتتى كومەك كورسەتىلەدى. وقيعا ورنىندا ءتيىستى قىزمەتتەر جۇمىس ىستەپ جاتىر», دەدى ولجاس بەكتەنوۆ. مەملەكەت باسشىسىنىڭ تاپسىرماسىمەن اپاتتىڭ سەبەپتەرىن تەكسەرۋ جانە زارداپتارىن جويۋ بويىنشا ۇكىمەتتىك كوميسسيا قۇرىلدى. جۇرگىزىلىپ جاتقان جۇمىستار تۋرالى پرەمەر-ءمينيستردىڭ ورىنباسارى قانات بوزىمباەۆ ەسەپ بەردى. «وقيعانىنىڭ ءمان-جايىن مۇقيات تەكسەرىپ, زارداپتارىن جويۋ كەرەك. قانات الدابەرگەن ۇلى, جۇرگىزىلىپ جاتقان جۇمىستار بارىسى تۋرالى ۇنەمى بايانداپ وتىرىڭىز», دەدى ۇكىمەت باسشىسى.