قازىر مەكتەپتەر مەن ارنايى وقۋ ورىندارىندا جاستاردىڭ پاتريوتتىق سەزىمىن تاربيەلەۋ ماقساتىندا كوپتەگەن ۇيىم مەن ۇيىرمە قىزمەت اتقاراتىنى بەلگىلى. جەمىسى دە, جەڭىسى دە كوڭىلگە جىلىلىق ۇيالاتادى. جاقىندا كوكپەكتى اۋدانىنىڭ «جاس سارباز» سىنىبىنىڭ وقۋشىلارى كەيۋانانىڭ ءومىرىن ساقتاپ قالدى.
اۋدان ورتالىعىنداعى مەكتەپتىڭ وقۋشىلارى «ۇلكەنگە قۇرمەت» اكتسياسىنىڭ اياسىندا قاريالاردىڭ اۋلالارىن قاردان تازارتىپ, ءۇي جۇمىسىنا كومەكتەسىپ ءجۇرىپ وقىس وقيعانىڭ قاھارمانىنا اينالىپ شىعا كەلگەن. كەزەكتى مارتە قولعابىس ەتۋگە شىققان راسۋل باقتىبەكوۆ, ەرتاي ايىپقازى, ەراسىل ءداۋىتحان جالعىزباستى اۋىل تۇرعىنى فەليسادا ارابەج اجەيدىڭ ۇيىنە ارنايى باس سۇعىپ, ءبىر جاماندىقتى سەزگەن جاسوسىپىرىمدەر بىردەن ىسكە كىرىسەدى.
«اجەيدىڭ ۇيىنە وفيتسەر-تاربيەشىمىز تالعات توقتار ۇلىنىڭ جەتەكشىلىگىمەن باردىق. ءبىز كەلگەندە ءۇيدىڭ ىشكى جارىعى قوسىلىپ تۇردى. ەسىكتى قاعىپ, قوڭىراۋ سوعىپ ەدىك, جاۋاپ بولمادى. بۇل بىزگە كۇمان تۋعىزدى. كورشىلەردەن اجەيدى سوڭعى رەت قاشان كورگەنىن سۇرادىق. ولاردان قاريانى ەكى كۇننەن بەرى سىرتقا شىقپاعانىن ەستي سالا شۇعىل ارەكەت جاساۋعا شەشىم قابىلدادىق», دەيدى وقۋشىلاردىڭ ءبىرى ەرتاي ايىپقازى.
كورشىلەرمەن بىرگە تەرەزەنى سىندىرىپ, ىشكە ەنگەن وقۋشىلار اجەيدىڭ ەس-ءتۇسسىز جەردە جاتقانىن كورەدى. بىردەن جەدەل جاردەم شاقىرىپ, دارىگەرلەر قاجەتتى ەم-دومىن جاساعان. وسىلايشا, وقۋشىلار مەن تاربيەشىلەردىڭ قىراعىلىعى ارقاسىندا 85 جاستاعى قاريا ءولىم اۋزىنان امان قالدى. قازىر فەليسادا ارابەج ەمحانادان شىققان, جاعدايى بىرقالىپتى.
اۋدان اكىمدىگى كوكپەكتى ورتا مەكتەبىنىڭ «جاس سارباز» سىنىبىنىڭ وقۋشىلارى مەن جەتەكشىسىنە العىس ءبىلدىرىپ, ولاردىڭ ەرلىگى مەن ادامگەرشىلىگىنىڭ كوپكە ۇلگى ەكەنىن اتاپ ءوتتى. بۇگىندە جاس جەتكىنشەكتەر وبلىستىق ەرىكتىلەر فورۋمىنا شاقىرتۋ الىپ, ەلدىڭ قوشەمەتىنە بولەنىپ ءجۇر.
اباي وبلىسى