ەكىنشى دۇنيەجۇزىلىك سوعىس ارداگەرى ماريا ماتيۋشينا كەلەر جىلدىڭ قاڭتار ايىندا 100-گە كەلەدى. ول نەبارى 16 جاسىندا ءوز ەركىمەن سۇرانىپ, مايداندىق كۋرسقا جازىلادى دا, سوعىسقا اتتانىپ كەتە بارعان. جۋىقتا ۇلتتىق ۇلان وركەسترى عاسىر جاساعان سوعىس ارداگەرىنە مەرەكە سىيلادى.
«شىعىس» وڭىرلىك قولباسشىلىعىنا قاراستى 6679 اسكەري ءبولىمىنىڭ اسكەري قىزمەتشىلەرى مايدانگەر ماريا ماتيۋشينا تۇراتىن ءۇي اۋلاسىندا وركەسترمەن كونتسەرت قويدى. سوعىس جىلدارى ايتىلعان اۋەزدى اندەردى شىرقاپ, ەرلىكتى سيپاتتايتىن وركەسترلىك شىعارمالاردى ورىندادى. قاريا ۇلاندىقتاردىڭ ونەرىنە ريزاشىلىعىن ءبىلدىرىپ, باتاسىن بەردى.
ء«بىزدىڭ بۇگىنگى باستى مىندەتىمىز ءارى پارىزىمىز – سوعىس ارداگەرلەرىنىڭ ارقايسىسىنا قامقورلىق كورسەتۋ, ولاردىڭ ەرلىكتەرىنە شەكسىز العىسىمىزدى ءبىلدىرۋ. سوندىقتان اسكەري ءبولىم وركەسترى دە قاريانىڭ كوڭىلىن اۋلاپ, بويىن سەرگىتۋ ماقساتىندا سوعىس جىلدارىنداعى اۋەزدى اندەردەن پوپۋرري ورىندادى. ءبىز سوعىس ارداگەرلەرىنىڭ ۇيلەرىنە بارىپ, جاعدايىن سۇراپ تۇرامىز», دەيدى 6679 اسكەري ءبولىمى كومانديرىنىڭ تاربيە جانە الەۋمەتتىك-قۇقىقتىق جۇمىستار جونىندەگى ورىنباسارى مايور نازبەك مالىكوۆ.
ماريا الەكسەەۆنا 1926 جىلى 19 قاڭتاردا جۇمىسشى وتباسىندا دۇنيەگە كەلگەن. 1942 جىلى ون التى جاستاعى بويجەتكەن نوۆوموسكوۆسك قالاسىنا تاجىريبەگە كەلىپ, اتا-اناسىنان جاسىرىن تۇردە اسكەري «ماسكيروۆكا» كۋرسىنا ەرىكتى بولىپ جازىلادى. كەيىن مايدانعا الىنىپ, قورعانىس قۇرىلىسى باسقارماسىنىڭ 225-قۇرامىندا, 104-اسكەري قۇرىلىس جاساعىنىڭ ساپىندا بەلورۋسسياعا دەيىن جەتەدى. ارداگەر جەڭىستى فينليانديا شەكاراسىندا قارسى العان. سۇراپىل سوعىس اياقتالعاننان كەيىن تۇرمىس قۇرىپ, ءۇش ۇل مەن ءبىر قىز تاربيەلەپ وسىرەدى. كەيۋانانىڭ 11 نەمەرەسى, 29 شوبەرەسى, 3 شوپشەگى بار.
پاۆلودار وبلىسى