وزبەكستاندا تۇرمە جازاسىن قىسقارتۋ ءۇشىن كىتاپ وقۋ باعدارلاماسى ەنگىزىلۋى مۇمكىن. پارلامەنت بۇل باستامانى ءبىرىنشى وقىلىمدا ماقۇلدادى. جوباعا سايكەس, قىلمىستىق كودەكسكە سوتتالعانداردى «رۋحاني تۇزەتۋ» تۋرالى جاڭا باپ ەنگىزۋ قاراستىرىلعان.
اتالعان باعدارلاما اياسىندا سوتتالعاندار ارنايى بەكىتىلگەن ءتىزىمى بويىنشا كىتاپ وقىپ, كەيىننەن ەمتيحان تاپسىرۋ ارقىلى ءار وقىلعان كىتاپ ءۇشىن جازاسىن ءۇش كۇنگە قىسقارتا الادى.
«كوركەم ادەبيەتتى وقۋ سوتتالعاندارعا ءوز سەزىمدەرى مەن ەموتسيالارىن تۇسىنۋگە عانا ەمەس, سونىمەن قاتار قوعامداعى باسقا ادامداردىڭ دا سەزىمدەرى مەن كوزقاراستارىن, ولاردىڭ ومىرگە دەگەن ۇستانىمدارى مەن ۇمتىلىستارىن ۇعىنۋعا كومەكتەسەدى», دەيدى ەلدىڭ ىشكى ىستەر ءمينيسترىنىڭ ورىنباسارى رامازون اشراپوۆ.
ونىڭ ايتۋىنشا, وزبەكستانداعى 49 تۇرمەنىڭ بارلىعىندا كىتاپحانالار بار, وندا 230 مىڭنان استام كىتاپ قورى جيناقتالعان. ونىڭ ىشىندە 44,7 مىڭنان استامى – شەتەلدىك شىعارمالار.