سوڭعى بەس جىلدا اتىراۋدا يندۋستريالىق-يننوۆاتسيالىق دامۋ باعدارلاماسى اياسىنداعى يندۋستريالاندىرۋ كارتاسىمەن 35 ينۆەستيتسيالىق جوبا ىسكە اسىرىلدى. وبلىس اكىمىنىڭ ءبىرىنشى ورىنباسارى عۇمار دۇيسەمباەۆتىڭ ايتۋىنشا, بۇل جوبالارعا سالىنعان ينۆەستيتسيا كولەمى 76 ميلليارد تەڭگەنى قۇراپ, 2,5 مىڭنان استام جۇمىس ورنى اشىلدى. وسى كەزەڭدە يندۋستريالاندىرۋ كارتاسى شەڭبەرىندە كاسىپورىندار 33 ميلليارد تەڭگەنىڭ وتاندىق ءونىمىن ءوندىرىپ, قىزمەتىن كورسەتىپتى. الايدا, ىسكە قوسىلعان كاسىپورىنداردىڭ اراسىنان ەكەۋى عانا جوبالىق قۋاتىنا جەتە قويماعان. ارينە, مۇنىڭ سەبەپتەرى العا تارتىلادى.
ال بيىل 14 كاسىپورىننىڭ جوبالىق قۋاتىنا جەتۋىنە بايلانىستى يندۋستريالاندىرۋ كارتاسىنان شىعارىلاتىندىعى كۇتىلىپ وتىر. سونىمەن بىرگە, اعىمداعى جىلى 11 ينۆەستيتسيالىق جوبانى ىسكە قوسۋ جوبالانىپتى. بۇلارعا سالىنعان ينۆەستيتسيالىق قارجى – 226 ميلليارد تەڭگە. وسى جوبالار ىسكە قوسىلعاندا جاڭادان 1300-دەن اسا جۇمىس ورنىن قۇرۋدىڭ مۇمكىندىگى دە قاراستىرىلۋدا. بۇعان قوسا, 210 گەكتارلىق يندۋستريالىق ايماق قۇرۋ جوسپارى بار. مۇندا ەكونوميكانى ءارتاراپتاندىرۋعا بايلانىستى, اسىرەسە, مۇناي-حيميا ونەركاسىبىن وركەندەتۋگە قولايلى جاعداي جاسالماق.
دەگەنمەن, شاعىن ءوندىرىس ورنىن ءىرى كاسىپورىنعا اينالدىرعان كاسىپكەرلەر مەملەكەتتىڭ قولداۋىنا جۇگىنۋدەن ءالى باس تارتپايدى. مەملەكەت ولارعا قانداي قولداۋ كورسەتە الادى؟ ينۆەستيتسيالار جانە دامۋ ءمينيسترى اسەت يسەكەشەۆ پەن ەنەرگەتيكا ءمينيسترى ۆلاديمير شكولنيكتىڭ اتىراۋ وبلىسىنا ساپارى بارىسىندا ناق وسى ماسەلەگە ەكپىن ءتۇسىرىلدى. ويتكەنى, اتىراۋداعى ءىرى كاسىپورىن جەتەكشىلەرىنىڭ ايتۋىنشا, وڭىردەگى كاسىپورىنداردا تەندەر وتكىزۋدىڭ اشىقتىعى ءالى كوڭىلگە قونا قويمايدى. ال «قولجەتىمدى تۇرعىن ءۇي» باعدارلاماسىمەن تۇرعىن ءۇي قۇرىلىسىن جۇرگىزەتىن كاسىپورىندار ءۇشىن تۇرعىن ءۇي شارشى مەترىنىڭ باعاسىنا وزگەرىس ەنگىزىلگەنىن قالايدى.
وڭىردەگى وتاندىق كاسىپورىندار تىنىسىمەن كەڭىرەك تانىسىپ, ولاردىڭ باسشىلارىمەن جۇزدەسكەن مينيسترلەر مەملەكەت تاراپىنان وتاندىق كاسىپورىندارعا ۇدايى قولداۋ كورسەتىلىپ كەلە جاتقانىنا توقتالدى. «جۇمىس بەرۋشىلەردىڭ باستى ماقساتى – جۇمىس ورىندارىنىڭ قىسقارۋىنا جول بەرمەۋ, سونىمەن بىرگە, جەرگىلىكتى تاۋار وندىرۋشىلەردى قولداۋ», دەگەن ۇيعارىم جاسادى مينيسترلەر. وسىعان وڭىردەگى 82 جۇمىس بەرۋشىمەن ارادا مەموراندۋمعا قول قويىلدى. ءدال قازىرگى ۋاقىتتا بۇلاردا 38 مىڭنان استام ادام جۇمىس جاسايدى. ماقسات – جۇمىس ورىندارىن قىسقارتپاۋ جانە وتاندىق تاۋار وندىرۋشىلەردى قولداۋ.
جولداسبەك شوپەعۇل,
«ەگەمەن قازاقستان».
اتىراۋ وبلىسى.