سۇيەك وبىرى دا ەمدەلەدى

سيرەك كەزدەسەتىن دەرت كوبى­نەسە 10 جاستان اسقان بالالاردان تابىلىپ جاتادى. وسى 13 جىلدىڭ اياسىندا عىلىمي ورتالىقتىڭ التىن قولدى ونكو­حيرۋرگ­تەرى 100-دەن استام بالاعا اسا كۇردەلى مەگا-ەندوپروتەزدەۋ وپەراتسيالارىن جاساۋ بارىسىندا كىشكەنتاي پاتسيەنتتەردىڭ اياق-قولدارىن ساقتاپ قالدى. جىل سايىن ەلىمىزدە وستەوساركوما دەرتىنە شامامەن 20-25 بالا شالدىعاتىن بولسا, بۇل كەسەلدىڭ 50%-دان استامى تىزە بۋىنىندا, 30%-ى يىق-بۋىنىنا جاقىن ورنالاسادى ەكەن.

كەيىنگى جىلدارى سۇيەك ىسىكتەرىن ەمدەۋ بارىسىندا جوعارى مولشەرلى حيميوتەراپيانى ەنگىزۋدىڭ ارقاسىندا قاتەرلى جاسۋشانىڭ باسقا اعزالارعا شابۋى تومەندەپ, بالالار ءومىرى ۇزارا تۇسكەن. بۇل شارا زاقىمدانعان اياقتاردى 90%-دان استام جاعدايدا ساقتاپ قالۋعا مۇمكىندىك تۋدىرعان. ءبىر سوزبەن ايتقاندا, سۇيەكتىڭ سيرەك قاتەرلى ىسىگىنە دۋشار بولعان بالالاردىڭ, اسا ءبىر اسقىنعان جاعدايدا بولماسا, اياق-قولدارى كەسىلمەيدى. قازىردە وستەوساركومانى ەمدەۋدىڭ جاڭا ادىستەرىن ەنگىزۋ ەم-دوم تيىمدىلىگىن الەمدىك ناتيجەلەرگە جاقىنداتۋعا مۇمكىندىك بەرە باستادى.

وسىنداي اۋىر, ەرەكشە كۇردەلى وپەراتسيالاردى اتقا­راتىن №2 حيرۋرگيا ءبولىمىنىڭ مەڭگەرۋشىسى, جوعارى ساناتتى ونكوحيرۋرگ, ونكوورتوپەد باحرام جۇمادۇللاەۆ: «ورتا­لىق زاماناۋي مودۋلدىك ەندوپروتەزدەردى ساتىپ الۋعا قول جەتكىزىپ, جوعارى مولشەرلى حيميوتەراپيانى قولدانۋدىڭ ارقاسىندا اعزانى ساقتاپ قالا­تىن وپەراتسيالاردىڭ سانى ارتتى. بالالارداعى وستەوساركومانى بىرىكتىرىپ ەمدەۋ ناتي­جە­لەرى دە جاقساردى. اتاپ وتەر­لىك جايت, ونكولوگيالىق ەندوپروتەزدەر ورتوپەديالىق پروتەزدەرگە ۇقسامايدى, ەرەكشە مەگاپروتەزدەرگە جاتادى. قازىردە حيرۋرگيالىق ەمدەۋدىڭ وسى ءتۇرى وستەوساركوماعا شال­دىققان بالالاردىڭ 90%-دان استامىنا جاسالادى, ول ءوز كەزەگىندە بالانىڭ الەۋمەتتىك بەيىم­دەلۋىنە, جاعدايىنىڭ جاقسارۋىنا مۇمكىندىك بەرەدى», دەيدى.

ەلىمىزدە اياق-قولدى امان الىپ قالا وتىرىپ, ەمدەۋ اياق­تالعاننان كەيىن جالپى ساۋىعىپ كەتۋ جاعدايلارى – 71%. بۇل وستەو­ساركومانى زەرتتەۋ جونىندەگى حالىقارالىق مۋلتيورتالىقتار ناتيجەسىمەن سايكەسەدى.

كەيىنگى كەزدە بويى جاسى­نان قىسقا بالالارعا جەكە دايىندالعان از ءينۆازيۆتى ۇزارت­قىش پروتەزدەردى قول­دانۋ ارقىلى دەنە مۇشە­لەرىن ساقتاۋ وپەراتسيالارى ەنگىزىلدى. ونكولوگيا سالاسىن­داعى ەڭ كۇردەلى وپەراتسيا تەگىن مەديتسينالىق كومەكتىڭ كەپىل­­دەن­دىرىلگەن كولەمى نەگىزىندە تەگىن جاسالادى. ورتالىقتا اياققا عانا ەمەس, تىزە, يىق, جامباستىڭ قاتەرلى ىسىكتەرىنە دە ورگان ساقتاۋ وپەراتسيالارى جاسالىپ جاتىر. بىرەگەي وپەراتسيالاردىڭ ناتي­جەسىندە بالالاردىڭ اياق-قولدارى ساقتالىپ قانا قويماي, ءومىر ءسۇرۋ ساپاسى دا جاقساردى. بۇگىندە ولار ءوز قۇربى-قۇرداس­تارىمەن بىرگە مەكتەپكە بارىپ, ۋنيۆەرسيتەتتە وقىپ, ءتۇرلى قىزمەتتەر اتقارىپ ءجۇر. سپورتپەن اينالىسىپ, جاتتىعۋ زالدارىنا, باسسەيندەرگە بارىپ, بەلسەندى ءومىر سالتىن ۇستانادى. تۇرمىس قۇرىپ, 2–3 بالانىڭ اتا-اناسى اتانىپ جاتقان بالالار دا بار.

الماتى