قازاقستان ستۋدەنت سپورتشىلارى قازىرگى كۇندەرى يسپانيانىڭ گرانادا قالاسىندا ءوتىپ جاتقان قىسقى ۋنيۆەرسيادادا بۇرناعى كۇنى تاعى 2 التىن, 1 كۇمىس مەدالعا قول جەتكىزدى. ولاردى فريستايلدىڭ موگۋل ءتۇرى بويىنشا يۋليا گالىشەۆا (سۋرەتتە) مەن پاۆەل كولماكوۆ ءتۇسىردى. ال كۇمىس مەدالدى قورجىنعا دميتري رەيحەرد سالدى.
يۋليا گالىشەۆا ءبىرىنشى ورىندى 66,00 ۇپايمەن جەڭىپ الدى. ەكىنشى ورىنعا 59,90 بالمەن رەسەيلىك ماريكا پەرتاحيا ورنالاسسا, ءۇشىنشى ورىن 51,86 ۇپاي جيناعان كورەيالىق سو چجي ۆونعا تيەسىلى بولدى.
قازاقستانعا بۇل كۇنى ەكىنشى التىن مەدالدى الىپ بەرگەن فريستايلشى پاۆەل كولماكوۆ 72,45 بالمەن توپ جاردى. ەكىنشى ورىنعا ونىڭ كوماندالاسى دميتري رەيحەرد 68,73 ۇپايمەن جايعاستى. ال ءۇشىنشى تۇعىر رەسەيلىك سەرگەي شيمبۋەۆكە (62,11) بۇيىردى.
بۇل جولعى قىسقى ۋنيۆەرسيادانىڭ ەكىگە ءبولىنىپ ءوتىپ جاتقانى بەلگىلى. ونىڭ العاشقى ءبولىمى سلوۆاكيانىڭ وسربلە قالاسىندا وينالسا, سوڭعى كەزەڭى اقپان ايىنىڭ باسىنان باستاپ يسپان جەرىنە اۋىستى. وسى كەزگە دەيىن قازاقستان قۇراماسى ەكى جاقتان 10 مەدال الىپ ۇلگەردى. ولاردى 5 التىن جانە 5 كۇمىس مەدالدار قۇرايدى. وسىنشالىقتى مەدال قورىمەن ءبىزدىڭ سپورتشىلار كوماندالىق ەسەپتە رەسەي ستۋدەنتتەرىنەن كەيىنگى ەكىنشى ورىندا كەلەدى.
دامير قوجامقۇل.