اسىلدىڭ سىنىعى

«كەيىن پاۆلودارعا ادەيى ىزدەپ بارىپ, تانىسىپ قايتتىم. ولار قازىر استانادا تۇرادى. وسىنى جاريالاساق قايتەدى؟» دەپ ءجۇردى. 2024 جىلى 4 شىلدەدە ۋاتساپپەن «اسسالاۋماعالەيكۋم! سەمەيدەن سەرىك مالاەۆپىن. نۇراعا تۋرالى سويلەسسەك...» دەگەن حابارلاما كەلدى. ول الماس-الكەن اعانىڭ «ەكەي – بوتاقارا – اتاباي – تىلەندى – نۇرعيسا – الماس. الماستان – تيمۋر, نۇرلان» جۇيەدەگى شەجىرەسىن دە سالىپ جىبەرىپتى. 2024 جىلى 5 شىلدەدە سەرىك رامازان ۇلى ەكەۋمىز ۇزاق سويلەستىك. ول الماس بالاسى تۋرالى نۇرعيسا اعانىڭ تىكەلەي وزىنەن ەستىگەنىن, كەيىن پاۆلوداردا الماس-الكەن اعامەن, ونىڭ وتباسىمەن كەزدەسكەنىن كەڭىنەن اڭگىمەلەدى. «الماس-الكەن نۇرعيسا ۇلى ءسال ورىسشالاۋ, جۇبايى گالينا دايىربەكقىزى – جەڭگەمىز قازاقتىلدى, اڭقىلداعان اشىق ادام. ەكەۋى استانادا تۇرادى» دەپ, تەلەفونىن بەردى.

سۋرەتتى تۇسىرگەن – ەرلان ومار, «EQ»

ازان شاقىرىپ قويعان اتى – الماس ەكەن دە, بىراق رەسمي قۇجاتتا «تلەنديەۆ الكەن كايمولداەۆيچ» دەپ حاتتالىپتى. 27 شىلدەدە گالينا دايىربەكقىزىنا تەلەفون شالدىم. الدىمەن ءوزىمدى تانىستىرىپ, تەلەفون ءنومىرىن كىم بەرگەنىن ايتىپ, اعامەن كەزدەسۋدىڭ مۇمكىندىگىن سۇرادىم. قۇدايدىڭ قۇدىرەتى, ءبىر مولتەك اۋداندا تۇرادى ەكەنبىز, ارامىز – 400 مەتر شاماسى. تىپتەن ولاردىڭ ءبىر بالاسى ءبىزدىڭ «وربيتا» تۇرعىن ءۇي كەشەنىنىڭ تۇرعىنى بولىپ شىقتى. سودان ول كىسى: «كەشكە ۇيگە كەلىڭىز. جاقىن تانىسىپ, اڭگىمەلەسەيىك» دەپ, قوناققا شاقىردى. مەن ەسىكتەن كىرگەندە, الكەن اعا قۇشاق جايا قارسى الىپ, ەكەۋمىز كوپتەن كورمەگەن باۋىرداي قۇشاقتاسىپ امانداستىق. شىنىندا دا اعامىز سوم دەنەلى, قاراتورى, جايدارى ءجۇزدى ازامات, ال جەڭگەمىز اشىق-جارقىن كىسى ەكەن. امان-ساۋلىقتان كەيىن بىردەن شەشىلىپ اڭگىمەگە كىرىستىك. داستارقان ۇستىندە سالماقتى اڭگىمە ايتىلىپ, اراسىندا البومنان سۋرەتتەر كورىپ وتىردىق. مەن كىتاپتار مەن گازەتتەرگە ءۇڭىلىپ, كەيبىرىن پاراقتاپ, ءبىراز سىر بولىستىك. كەتەردە «اسىقپاي ۇيدە وقىپ شىعايىن» دەپ قىزىل پاپكاعا جيناقتالعان ماتەريالداردى ۋاقىتشا سۇراپ الدىم. ۇيگە كەلگەن سوڭ قاراسام, ىشىندە 2015 جىلى 17 قىركۇيەكتەگى «دات» گازەتىنە شىققان ەرلان احمەتسالىم ۇلىنىڭ «الماس تىلەنديەۆ كىمنىڭ ۇلى؟» اتتى ماقالاسى بار ەكەن. وندا نۇرعيسا اعامىزدىڭ پيانينوعا وڭ قولىنىڭ شىنتاعىمەن سۇيەنىپ, سول قولىنا نوتا قاعازىن ۇستاعان جانە ونىڭ استىندا الماس-الكەننىڭ اككوردەون تارتىپ وتىرعان سۋرەتى بەرىلىپتى. گازەتتىڭ 2-بەتىندە الكەن اعامىزدىڭ پەرزەنتتەرىنىڭ, نەمەرەلەرىنىڭ سۋرەتى جاريالانىپتى. وسى ماتەريالدان مىنا دەرەك اڭعارىلدى:

1) تىلەندى اتاباي ۇلى مەن ساليحا انامىزدان بايمولدا, قايمولدا, نۇرعيسا اتتى ءۇش ۇلى تۋعان; 2) تىلەندى اتاباي ۇلى 1932 جىلى دۇنيەدەن وتكەن; 3) قايمولدا اسكەري بورىشىن وتەپ كەلىپ, 1937–1938 جىلدارى فاتيما بايتاسقىزىنا ۇيلەنگەن; 3) قايمولدا مەن فاتيمانىڭ اراسىندا لاريسا اتتى قىز بالا بولعان; 4) بايمولدا, قايمولدا, نۇرعيسا تىلەنديەۆتەردىڭ ۇشەۋى دە ەكىنشى دۇنيەجۇزىلىك سوعىسقا قاتىسقان; 5) بايمولدا مەن قايمولدا مايداننان ورالماعان; 6) قايمولدا سوعىسقا كەتكەندە فاتيما كەلىنى قىزىمەن ەنەسى ساليحانىڭ قولىندا قالعان; 7) نۇرعيسا تىلەنديەۆ سوعىستا كۋرسكىدەن بەرلينگە دەيىن بارىپ, 1945 جىلى ەلگە امان-ەسەن كەلگەن; 8) ەكى بالاسى (بايمولدا مەن قايمولدا) بىردەي «قارا قاعاز» العاندا, شەرمەندە ساليحا انا قايمولدادان قالعان جالعىز نەمەرەسى لاريسانى جاتقا جىبەرمەۋدى ويلاپ, اتا سالتى امەڭگەرلىك جولىمەن جەسىر كەلىنى فاتيماعا ءتىرى كەلگەن كىشى ۇلى نۇرعيسانى قوسىپ, ءبارى الماتىداعى تەمىرجول ۆوكزالىنىڭ جانىندا تۇرعان; 9) نۇرعيسا 1945 جىلى الماتى كونسەرۆاتوريا­سىنا وقۋعا تۇسكەن; 10) ول قازاق راديوسى وركەسترىن باسقارعان; 11) 1949 جىلى ماسكەۋ كونسەرۆاتورياسىنىڭ وپەرا ديريجەرى ماماندىعىنا وقۋعا ءتۇسىپ, ونى 1952 جىلى بىتىرگەن.

«جاس الاش» گازەتىنە 2017 جىلى 30 ناۋ­رىزدا جاريالانعان سايلاۋ بايبوسىننىڭ «تۇلپاردان قالعان ءبىر تۇياق نەمەسە الماس كىمنىڭ بالاسى؟» اتتى ماتەريالى ىشىندە نۇرعيسا اعا مەن فاتيما اپامىزدىڭ مولدىرەگەن جاس كەزىندە بىرگە تۇسكەن سۋرەتى, ورتا شەنىندە الكەن اعا مەن گالينا جەڭگەمىزدىڭ سۋرەتى جانە نۇرعيسا اعانىڭ سوعىستا قازا تاپقان اسكەري فورماداعى اعاسى قايمولدا مەن فاتيما اپامىزدىڭ تاريحي سۋرەتى تايعا تاڭبا باسقانداي جارقىراپ تۇر. ءتورت دەرەك ەرەكشە ەستە قالادى: 1) ءجۋرناليستىڭ «نەلىكتەن وسى ۋاقىتقا دەيىن ءۇن-ءتۇنسىز ءجۇردىڭىز؟» دەگەن سۇراعىنا الكەن اعا: «مەنىڭ ماقساتىم قايتكەندە دە نۇرعيسانىڭ بالاسى ەكەنىمدى دالەلدەپ, اتىمدى شىعارۋ ەمەس, باۋىرىم. جەتپىستىڭ جوتاسىنا شىعىپ وتىرمىن. سوڭىمدا ءوسىپ كەلە جاتقان ۇرپاق بار. بالالارىم كەيدە ء«بىزدىڭ اتامىز كىم؟» دەسە, جاۋاپ بەرە الماي قينالىپ قالامىن. تولقۇجاتتا مەنىڭ تەگىم – تىلەنديەۆ الكەن قايمولدا ۇلى. مەن 1947 جىلى دۇنيەگە كەلىپپىن. انام سوعىستا قازا تاپقان ءبىرىنشى كۇيەۋى قايمولدانىڭ اتى ۇمىتىلماسىن دەپ, مەنى سول كىسىنىڭ اتىنا جازىپتى...» دەپ جاۋاپ قاتىپتى; 2) گالينا جەڭگەمىز سول كەزدەگى پرەزيدەنت ن.نازارباەۆتىڭ اتىنا حات جازىپتى; 3) سول كەزدەگى مەملەكەت باسشىسى بۇل حاتتى ءماجىلىس دەپۋتاتى بولىپ جۇرگەن سەرىك ۇمبەتوۆكە (بۇرىنعى الماتى وبلىسىنىڭ اكىمى) جولداپتى; 4) سەرىك ابىكەن ۇلى ەرلى-زايىپتى الكەن, گالينا تىلەنديەۆتەردى استاناعا شاقىرىپ سويلەسىپتى; 5) س.ۇمبەتوۆتىڭ كەڭەسىمەن الەكەڭ مەن گالينا جەڭگەي كەنجەسى نۇرلاندى, نەمەرەسى ءماديدى الىپ 2015 جىلى الماتى وبلىسى, جامبىل اۋدانىنداعى جامبىل مۇراجايىنان باس­تاپ نۇرعيسا اكەسىنىڭ باسىنا بارىپ ءتاۋ ەتىپ, تۋىستارىمەن, اۋلەت اقساقالدارىمەن جۇزدەسىپ, شەر تارقاتىپتى.

حالىق قاھارمانى, كسرو جانە قازاق كسر حالىق ءارتىسى, ءبىرتۋار كومپوزيتور, ديريجەر, دومبىراشى نۇرعيسا اتاباي ۇلى (تىلەندى ۇلى) تىلەنديەۆ سۇحباتتارىندا «اتاباي – اتام. اكەم – تىلەندى» دەگەن.

كەڭەس زامانىندا قازاقتىڭ تەگى مەن اكە ەسىمى ابدەن شاتاسقان كەز از بولماعان. مىسالى, كۇي-اناسى دينا نۇرپەيىسوۆانىڭ تەگى بولىپ جۇرگەن نۇرپەيىس – ونىڭ كۇيەۋىنىڭ اتى...

«قاھارمان نۇرعيسا» (الماتى, «سانات» باسپاسى, 1999) جيناعىنىڭ 20-بەتىندەگى: «اتا! ءسىزدى «حالىق قاھارمانى» اتاعىن الۋىڭىزعا بايلانىستى شىن جۇرەكتەن قۇتتىقتايمىز. وزىڭىزگە دەنساۋلىق, وتباسىڭىزعا اماندىق تىلەيمىز. تىلەنديەۆ الماس جانۇياسى, نەمەرەلەرىڭىز تيمۋر, التىناي, نۇرلان. باياناۋىل, 31.08.1998» دەگەن قۇتتىقتاۋ ءبىراز سىردى اڭعارتادى دەپ ويلايمىز.

الماتى وبلىسى ىلە اۋدانىنىڭ نۇرعيسا تىلەنديەۆ (بۇرىنعى شيلىكەمەر) اۋىلىندا تۇراتىن ونەر تۇلعاسىنىڭ سىنىپتاسى سارسەنباي قوجامجاروۆتىڭ جۇبايى ۇمىتشاق دوسپانبەتقىزى جازعان «جاقسىدان قالعان ءبىر تۇياق» اتتى قىسقا ەستەلىكتە امەڭگەرلىك سالتىمەن قوسىلعان جەڭگەسى فاتيما مەن نۇرعيسا اعامىزدىڭ ۇلى الماس-الكەن اعامىز تۋرالى ادەمى دەرەك ايتىلىپتى («وتكەن ءومىر». الماتى, 2022, 39-ب.) جازۋشى سايلاۋ بايبوسىن مەن گالينا تىلەنديەۆانىڭ «تۇلپاردان قالعان ءبىر تۇياق» اتتى كىتابىندا فاتيما اپاي مەن نۇرعيسا اعانىڭ بىرگە تۇسكەن سۋرەتى بار (استانا, «تسەنتر ەليت» باسپاسى, 10-ب). «شيلىكەمەردە» اتتى ەستەلىكتە دە نۇرعيسا تىلەنديەۆ پەن ونىڭ ۇلى الكەن-الماس تىلەنديەۆتىڭ تاعدىرى تۋرالى ايتىلعان (51-ب.). ەرەيمەنتاۋ اۋدانىنىڭ قۇرمەتتى ازاماتى, اقىن سايلاۋ جىلقىباەۆتىڭ «تىلەنديەۆتەردىڭ اۋلەتىنە» اتتى ولەڭىنىڭ دە ءمان-ماعىناسى تەرەڭ (96-ب.).

جاراتقاننىڭ بىزگە بۇيىرتقان مۇم­­كىندىگى شىعار, استاناداعى پاتەرىندە الكەن تىلەنديەۆپەن ەمەن-جارقىن سۇحبات­­­­­­­تاس­تىق. ەندى اسىلدىڭ سىنىعىنا قويعان سۇراعىم مەن ونىڭ قايتارعان جا­ۋابىنا نازار اۋدارىڭىزدار:

– اعا, جاس كەزىڭىزدە اكەڭىز تۋرالى جانە تەگىڭىزدىڭ كومپوزيتور نۇرعيسا تىلەنديەۆكە قاتىسى بار-جوعىن اناڭىزدان سۇراپ كوردىڭىز بە؟

– ءيا, جاس كەزىمدە سۇرادىم. مەنىڭ انام – قازاق قىزدارىنىڭ ىشىندەگى العاشقى زاڭگەرلەردىڭ ءبىرى فاتيما بايتاسوۆا. ءبىزدىڭ تۇسىنىگىمىزشە سوت, پروكۋرور, ميليتسيا, اسكەري ادامداردىڭ ءتۇسى سۋىق, مىنەزى قاتال بولادى عوي. مەنىڭ اكەم تۋرالى سۇراعىما «ول ءبىزدىڭ تۋىسقانىمىز» دەپ قىسقا قايىرعان.

– اناڭىز فاتيما اپاي مەن اكەڭىز نۇرعيسا اعانىڭ بىرگە تۇسكەن سۋرەتى «جاس الاش» گازەتىندە جاريالانعان. ول سۋرەت كىمدە؟

– ءبىزدىڭ ۇيدە.

– ولار بىرگە تۇرماي, ارالارى الشاقتاپ كەتكەنىنە نە سەبەپ بولدى دەپ ويلايسىز؟

– بىرىنشىدەن, انام فاتيما بايتاسقىزى – نۇرعيسا اكەمنىڭ جەڭگەسى ياعني قايمولدا اعاسىنىڭ ايەلى. اكەم نۇرعيسادان التى جاس ۇلكەن.

ەكىنشىدەن, اكەم بۇرىن ۇيلەنبەگەن اساۋ. تۇلا بويى تۇنعان ونەر ادامى. سەرى. ۇشىنشىدەن, ول سوعىستان امان-ەسەن قول-اياعى ساۋ كەلىپ, كونسەرۆاتورياعا تۇسكەن جالىنداعان 20 جاستاعى ستۋدەنت. تورتىنشىدەن, اينالاسى قىزعالداقتاي قۇل­پىرعان جاس قىزدار مەن كۇيەۋلەرى سوعىستان قايتپاعان, سور­ماڭداي, ەركەككە سۋساپ وتىرعان جاپ-جاس جەسىر كەلىنشەكتەر. بەسىنشىدەن, بۇرىن ۇيلەنبەگەن جاس جىگىت وزىمەن قاتار قىز-كەلىنشەكتەر تۇرعاندا وزىنەن اتتاي التى جاس ۇلكەن, بالالى ايەلمەن تۇرۋعا نامىستانعان شىعار. التىنشىدان, نۇرعيسا تىلەنديەۆ 1949 جىلى ماسكەۋ كونسەرۆاتورياسىنىڭ وپەرا ديريجەرى فاكۋلتەتىنە ءتۇسىپ, ونى 1952 جىلى بىتىرگەن. قايىن-كۇيەۋى تاعى ءۇش جىلعا ماسكەۋگە وقۋعا كەتسە, ءسۇيىپ قوسىلعان كۇيەۋىنەن ءولى ايرىلىپ, امەڭگەر كۇيەۋىنەن ءتىرى ايرىلىپ وتىرۋعا قانداي جاس, كوزى اشىق, زاڭگەر ايەل كونەدى؟ قالاي قۇر شاڭىراقتى كۇزەتىپ وتىرادى؟.. مىنە, وسى فاكتورلار اكەم مەن انامنىڭ بىرگە تۇرماي, ەكەۋى ەكى جاققا كەتۋىنە سەبەپشى بولعانى انىق.

– ءسىزدىڭ ارمانىڭىز قانداي؟

– ارمان كىمدە جوق دەيسىڭ؟ مەنىڭ جالعىز ارمانىم – جاسىم 80-گە تاياعان شاقتا گەنەتيكالىق اكەم نۇرعيسانىڭ اتىن الىپ, كوزىمنىڭ تىرىسىندە ونىڭ ۇرپاعى بار ەكەنىن دالەلدەۋ. ارينە, سوعىستا مەرت بولعان قايمولدا اكەمىزدى قاستەرلەيمىز, ۇمىتپايمىز. اللاعا شۇ­­كىر, ءوز دۇنيەم وزىمە جەتەدى. جاعدايىم جاقسى. « ۇلىم ۇيادا, قىزىم قيادا» دەگەندەي, نەمە­رە­لە­رىم بار. ودان باسقا مەندە ارمان جوق.

الەكەڭ  جۇبايى  گالينا  دايىربەكقىزى پەرزەنتى التىناي 1991 جىلى مەكتەپ بىتىرگەندە ەنەسى فاتيما بايتاسقىزى ەكەۋى الماتىعا نۇرعيسا اتاسىنىڭ ۇيى­­نە بارعانىن ايتادى. سونداي-اق ونەر تۇلعاسى «وتىرار سازى» وركەسترىمەن پاۆ­لودار وبلىسىنا گاسترولدىك ساپارعا بارعاندا باياناۋىلداعى شاڭىراقتارىنا ايالداعانىن ەسكە الىپتى. كونتسەرت باستالاردا جۇرتقا: «مىناۋ – مەنىڭ كەلىنىم. ءوزى ورىس بولسا دا, بالانى قازاقشا تابادى» دەپ, دۋ كۇلدىرگەنى دە بار ەكەن. ونداعىسى كەلىنىنىڭ شەشەسى ورىس ەكەنىن مەڭزەگەنى. «مارقۇم اتام «نەوردينارنىي» ادام ەدى عوي. حالىق تا ول كىسىنى ەركەلەتەتىن, ءوزى دە حالىققا ەركەلەپ جۇرەتىن» دەيدى گالينا جەڭگەمىز.

نۇرعيسا تىلەنديەۆ – تاۋسىلمايتىن داستان, اياقتالمايتىن ونەر ەپوپەياسى. ۇلت كورەرمەنى «Abai.tv» ارناسىنىڭ «بىرەگەي» باعدارلاماسىنان «نۇرعيسانىڭ جۇمباعى» اتتى دەرەكتى شىعارىلىمدى كورىپ, ءبىر مارقايىپ قالدى. مۇندا نۇرەكەڭ ءومىرىنىڭ سوڭعى كەزدەرى تۋرالى سەرىك ۇمبەتوۆ, بەكسۇلتان نۇرجەكە ۇلى, ءۋاليحان قاليجانوۆ, جۇماباي شاشتاي­­­ ۇلى, ەرمۇرات ۇسەنوۆ, جالعاسبەك بەگەن­دىكوۆ, دۇيسەباي شاشتاي ۇلى, ت.ب. قۇندى اڭگىمەلەر ايتتى. وسى حاباردا نۇرعيسا ۇلى تۋرالى دا از-كەم ماعلۇمات بەرىلدى. تىلەندىنىڭ ءىنىسى تىلەگەننىڭ ءبىر بالاسى جاپار ەكەن دە, سونىڭ ۇلى قۋاندىق: «2019 جىلدان الماس-الكەن اعامىزبەن ءجيى ارالاسىپ تۇرامىز. سەبەبى ول – نۇرعيسا اتامنىڭ تۇياعى عوي» دەپ ءبىر تۇيىندەدى.

2024 جىلى 20 ناۋرىزدا «Egemen Qazaqstan» گازەتىندە مۇرات قاپان ۇلىنىڭ «يسا اقىننان قالعان دومبىرا» اتتى ماقالاسى جارىق كوردى. ءيا, ءرامىزدى اقپارات. تاۋەلسىزدىگىمىزدىڭ ارقاسىندا تالاي-تالاي تۇلعانىڭ ۇستاعان, پايدالانعان بۇيىمى مەن جازباسى تابىلىپ, حالىق يگىلىگىنە اينالىپ جاتقانى – ءسوزسىز قۋانىشتى جاعداي. ال ەندى تىكەلەي تۇياعى تابىلىپ جاتسا, قالاي مارقايمايمىز؟ ەندەشە, قازىرگى «وتىرار سازى» مەم­لە­كەتتىك-فولكلورلىق وركەسترىنىڭ كوركەمدىك جەتەكشىسى ءارى باس ديريجەرى, قازاقستاننىڭ ەڭبەك سىڭىرگەن قايراتكەرى ءدىنزۋحرا نۇرعيساقىزى تىلەنديەۆا جالعىز ەمەس ەكەن. قانشاما ونەر تۇلعالارى شىققان كەرەكۋدىڭ باياناۋىلىندا ءونىپ-وسكەن, قازىر استانادا تۇراتىن الماس-الكەن نۇرعيسا ۇلى ەسىمدى تۋعان اعاسى ونىڭ ەشقاشان جالعىز بولمايتىنىن ايعاقتاعانداي.

الماس-الكەننەن تاراعان تيمۋر, التىناي, نۇرلان سىندى ۇل-قىز, ءدىنزۋحراداي تالانتتى قارىنداسىمىز مەتر نۇرعيسا تىلەنديەۆ ونەر اۋلەتىنىڭ, ءزاۋزاتىنىڭ جالعاسى بولارى ايدان انىق.

2024 جىلى 23 قىركۇيەكتە ىشكى ىستەر ورگاندارى مەن ۇلتتىق ۇلان اردا­گەر­لەرىنىڭ XI كونفەرەنتسياسىنا كەل­گەن وسى سالانىڭ الماتى قالاسى اردا­گەر­لەر كەڭەسىنىڭ توراعاسى, پوليتسيا گەنەرال-مايورى, ەل اعاسى ساعىنجان اسىل-كەنەيگە نۇرەكەڭ ۇرپاعى تۋرالى ايتقا­نىم­دا, ول كىسى: «كونفەرەنتسيادان سوڭ الماس نۇرعيسا ۇلىنا بارىپ تانىسىپ, سالەمدەسەيىن. بەس مينۋتقا بولسىن ۇيىنە كىرىپ شىعايىق» دەدى. بۇل از-كەم ۇشىراسۋ دا ساتىمەن ءوتتى. مىنە, اعايىندىق ارقاۋ. اسىل اعا تۇياعىنا دەگەن ساعىنىش.

وسى اڭگىمەنىڭ شەت جاعاسىن 30 قازاندا مەملەكەتتىك سىيلىقتىڭ لاۋرەاتى, تانىمال كومپوزيتور, قازاقستان اۆتورلار قوعامى كەڭەسىنىڭ توراعاسى بالنۇر قىدىربەككە حابارلاعانىمدا, ءسال ويلانىپ: «ە, تاعدىر-اي دەسەڭىزشى! نۇرعيسا اتاباي ۇلى ناۋقاستان قينالىپ جاتقاندا ماعان «باياناۋىلدا الماس دەگەن ءبىر باۋىرىڭ بار. شەشەسى – سۋديا» دەگەن ەدى...» دەدى.

ن.تىلەنديەۆ تۋرالى «نۇرعيسانىڭ جۇمباعى» اتتى دەرەكتى حاباردا ونەر تۇلعاسىنىڭ اسىل جارى داريعا جەڭگەمىز: « ۇلىمىز بولماعان سوڭ, تۋىسىمىزدان قالاپ دانياردى اسىراپ الىپ ەدىك, ول دا نۇراعادان كەيىن ءبىر جىلدان سوڭ ومىردەن ءوتتى» دەپ مۇڭايعانى ەسىمدە قالىپتى... بىراق اۋىر دا تاعىلىمدى تاعدىر ونەر كوريفەيىن قادىر تۇتقان حالىق الدىنا اينالدىرىپ كەلىپ اسىلدىڭ سىنىعى الماس-الكەن نۇرعيسا ۇلىن شىعاردى. ءبىزدىڭ ماقسات – رۋحانيات جانكۇيەرلەرى مەن تۇلپاردىڭ تۇياعى اراسىنا التىن كوپىر بولۋ. بيىل ۇلتىمىزدىڭ سۇيىكتى پەرزەنتى, دارىندى ديريجەر, داۋلەسكەر دومبىراشى, كورنەكتى كومپوزيتور نۇرعيسا تىلەنديەۆتىڭ 100 جىلدىق مەرەيتويى يۋنەسكو اياسىندا اتالىپ وتەدى. ماڭدايى اشىق, ءتۇپ-تۇقيان قادىر-قاسيەتىنە اسىق الماس نۇرعيسا ۇلى وتباسىمەن سول ەلدىك, الەمدىك ءىس-شارالاردىڭ جۋان ورتاسىندا داڭقتى اكەنىڭ ونەر تاعىلىمىن حالىقپەن بىرگە قىزىقتايدى دەپ سەنەمىز.

سلانقوجا قاراقىستىق,

پوليتسيا ارداگەرى, قازاقستاننىڭ ەڭبەك سىڭىرگەن قايراتكەرى, كومپوزيتورلار وداعىنىڭ مۇشەسى