پاۆلودار مۇناي-حيميا زاۋىتىندا سۇيىتىلعان كومىرسۋتەك گازىن ءسىلتىلى تازارتاتىن جاڭا كەشەن ىسكە قوسىلدى. تازارتۋ بارىسىندا «Merox» تەحنولوگياسى قولدانىلادى. ءادىس «Honeywell» كورپوراتسياسى قۇرامىنداعى «UOP» (Universal Oil Products) امەريكالىق كومپانياسىنان الىنعان. كەشەن ءونىم ساپاسىن جاقسارتىپ, شىعارىندىلاردى ازايتىپ, جىلىنا 100 مىڭ توننا سۇيىتىلعان كومىرسۋتەك گازىن مەركاپتان كۇكىرتىنەن تازارتۋعا مۇمكىندىك بەرەدى.
ءبىرىنشى توقساندا قۋاتى ساعاتىنا 12,5 مىڭ تەكشە مەتر سۋتەگى وندىرەتىن ەكىنشى قوندىرعىنىڭ قۇرىلىسىن باستاۋ جوسپارلانعان. قازىر زاۋىتتا قۋاتى ساعاتىنا 20 مىڭ تەكشە مەترلىك قوندىرعى جۇمىس ىستەپ تۇر.
ديزەل وتىنىن گيدروتازارتۋ قوندىرعىسىن رەكونسترۋكتسيالاۋدىڭ ەكىنشى كەزەڭى شەڭبەرىندە دەپارافيندەۋ بلوگىنىڭ قۇرىلىسى جۇرگىزىلىپ جاتىر. جوبانى جىل سوڭىنا دەيىن اياقتاۋ جوسپارلانعان.
«جوبا جازعى جانە ماۋسىمارالىق ديزەل وتىنىن عانا ەمەس, سونىمەن قاتار قوندىرعىنىڭ اعىمداعى قۋاتىن جىلىنا 2,3 ملن توننا دەڭگەيىندە ساقتاي وتىرىپ, قىسقى وتىندى دا شىعارۋعا مۇمكىندىك بەرەدى. «Air Liquide» كومپانياسىمەن بىرلەسكەن جوبانى ىسكە قوسۋ 2026 جىلدىڭ كۇزىنە جوسپارلانعان. وعان سالىناتىن ينۆەستيتسيا 80 ملن ەۋرودان اسادى دەپ باعالانادى. تەحنيكالىق سۋتەگى مۇناي وڭدەۋدە شەشۋشى ءرول اتقارادى. بەنزين, اۆياكەروسين جانە ديزەل وتىنىن وندىرۋدە شيكى مۇنايدى ازوتتان, كۇكىرتتەن جانە مەتالداردان تازارتۋ ءۇشىن قولدانىلادى», دەيدى زاۋىتتىڭ باس ديرەكتورى قۋانىش ءبيشىموۆ.
بىلتىر زاۋىت رەكوردتىق 5,5 ملن توننا مۇناي وڭدەگەن. بۇل جوسپارلى كورسەتكىشتەن 50 مىڭ تونناعا ارتىق. ونىڭ 1,61 ملن تونناسى – بەنزين, 327 مىڭ تونناسى – اۆياوتىن.
پاۆلودار وبلىسى