7 اقپان كۇنى ا.س. پۋشكين اتىنداعى شىعىس قازاقستان وبلىستىق كىتاپحانادا ەلىمىزدەگى العاشقى كىتاپحانالىق نەيرو-اسسيستەنت – DosAI تانىستىرىلدى. يننوۆاتسيالىق جوبانىڭ تۇساۋكەسەرىنە اۋدان جانە قالا كىتاپحاناشىلارى, IT ماماندارى, ستۋدەنتتەر مەن جاڭاشىلدىققا جانى قۇمار وقىرماندار قاتىستى.
DosAI – پايدالانۋشىلارعا كىتاپحانالىق قىزمەتتى جاڭا دەڭگەيدە ۇسىناتىن تسيفرلىق كومەكشى. ول كىتاپحانا وقىرماندارىنا اقپاراتتىق قولداۋ كورسەتىپ, قاجەتتى ادەبيەتتەردى تاڭداۋعا كومەكتەسەدى, كىتاپحانا رەسۋرستارى تۋرالى جىلدام ءارى ناقتى مالىمەت بەرەدى.
ءىس-شارادا جوبا ازىرلەۋشىسى كىتاپحانانىڭ بەلسەندى ۆولونتەرى ءارى تاجىريبەدەن ءوتۋشى, وسكەمەن ەكونوميكا جانە تەحنيكا كوللەدجىنىڭ ستۋدەنتى دەنيس كۋشنارەۆ جينالعان قاۋىمدى نەيرو-اسسيستەنتتىڭ جۇمىسىمەن تولىق تانىستىردى.
قاتىسۋشىلار DosAI-دىڭ مۇمكىندىكتەرىن وزدەرى بايقاپ كورىپ, كىتاپحانا كەڭەسشىلەرىنىڭ كومەگىمەن تەستىلەۋدەن وتكىزدى. نەيرو-اسسيستەنتتىڭ تيىمدىلىگى مەن قولايلىلىعىنا كوز جەتكىزگەن قوناقتار جاڭا تەحنولوگيانىڭ كىتاپحانا قىزمەتىن زاماناۋي ءارى قولجەتىمدى ەتۋدەگى ماڭىزىن ەرەكشە اتاپ ءوتتى.
DosAI – كىتاپحانا وقىرماندارىنىڭ سەنىمدى كومەكشىسى7 تسيفرلىق اسسيستەنت ا.س. پۋشكين اتىنداعى وبلىستىق كىتاپحانانىڭ نەگىزگى سايتىنا (www.pushkinlibrary.kz) بىرىكتىرىلگەن. DosAI كىتاپحاناعا كەلۋشىلەرگە:
كىتاپحانا جۇمىسىنىڭ ءتارتىبى جايلى اقپارات بەرەدى. وقىرمان بيلەتىن الۋ جولدارىن تۇسىندىرەدى. وتەتىن ءىس-شارالار مەن كورمەلەر تۋرالى حابارلايدى. ۇيىرمەلەر مەن كلۋبتاردىڭ قىزمەتى جايلى اقپارات بەرەدى. ولكەتانۋ باعىتىنداعى ماتەريالداردى ىزدەۋگە كومەكتەسەدى. وقىرمان تالعامىن سارالاپ, كىتاپ تاڭداۋعا جاردەمدەسۋ سياقتى كوپتەگەن قىزمەت تۇرلەرىن ۇسىنادى.ا.س. پۋشكين اتىنداعى وبلىستىق كىتاپحانا ديرەكتورى نازىم ەرنازارقىزى جاڭا جۇيەنىڭ مۇمكىندىكتەرىنە ەرەكشە توقتالدى.
«كىتاپحانانىڭ نەيرو-اسسيستەنتى وقىرماندارىمىز ءۇشىن تاپتىرماس كومەكشى بولماق. بۇل – پايدالانۋشىلارمەن ءوزارا بايلانىستى بارىنشا ىڭعايلى ءارى ءتيىمدى ەتىپ, كىتاپحانا رەسۋرستارىنا قولجەتىمدىلىكتى ارتتىرۋعا مۇمكىندىك بەرەتىن يننوۆاتسيالىق قۇرال. DosAI ەلەكتروندىق كاتالوگتار مەن اقپاراتتىق رەسۋرستاردى ىلگەرىلەتۋدە ماڭىزدى ءرول اتقارادى», دەدى نازىم ەرنازارقىزى.
DosAI – قازاقستانداعى كىتاپحانالىق قىزمەتتى تسيفرلاندىرۋداعى ماڭىزدى قادام. بۇل جۇيە وقىرمانداردىڭ ىزدەگەن اقپاراتىن وڭاي ءارى جىلدام تابۋىنا كومەكتەسىپ, كىتاپحانانىڭ مۇمكىندىكتەرىن بارىنشا ءتيىمدى پايدالانۋعا جاعداي جاسايدى.