بەكتاي سۇلەيمەنوۆ ەسىن بىلگەلى باۋ-باقشامەن اينالىسىپ كەلەدى. ول ءوزىنىڭ العاشقى اعاشىن (ورىك) ءۇش جاسىندا اكەسىمەن بىرگە وتىرعىزعان. وسىلايشا ول, اكەسى سالىپ بەرگەن جولمەن ءجۇرىپ, 1965 جىلى قازاق اۋىل شارۋاشىلىعى ينستيتۋتىنا ءتۇسىپ, وندا ورمان شارۋاشىلىعىنىڭ مامانى بولىپ شىعادى. بۇل رەتتە اقساقال, مەملەكەت باسشىسى باستاعان «تازا قازاقستان» اكتسياسىنىڭ بەلسەندى قاتىسۋشىسى.
zakon.kz جازۋىنشا, بيىل بەكتاي سۇلەيمەنوۆتىڭ ءوزىنىڭ شارۋا قوجالىعىن قۇرعانىنا 34 جىل تولادى. بۇل شارۋادا وعان ۇلدارىنىڭ ءبىرى كومەكتەسكەن.
«مەن 1940 جىلى شىمكەنت ماڭىنداعى شاردارا اۋدانىندا دۇنيەگە كەلدىم. ول كەزدە كولحوزدىڭ دۇركىرەپ تۇرعان كەزى, ءار ءۇيدىڭ الدىندا بۇتالار, گۇلدەر, جەمىس اعاشتارى ءوسىپ تۇراتىن. مەنىڭ اكەم تانىمال باعبان بولدى, ۇنەمى مەنى وزىمەن ەرتىپ ءجۇرىپ, سالانىڭ قىر-سىرىن ۇيرەتتى. وسىلايشا, مەكتەپتى تامامداعاننان كەيىن اكە جولىن قۋىپ, ورمانشى بولۋعا شەشىم قابىلدادىم. زەينەتكەرلىككە شىققانعا دەيىن مەن وبلىستىڭ ءۇش اۋدانىندا ورمانشى قىزمەتىن اتقاردىم. 1991 جىلى ءوزىمنىڭ شارۋاشىلىعىمدى اشتىم. تەرەك, ۇيەڭكى, قاراعاشتىڭ كوشەتتەرىن دايىنداپ ساتا باستادىم», دەيدى اقساقال.
باستاپقىدا 5 گەكتارمەن باستالعان شارۋا, 35 جىلدىڭ ىشىندە 25 گەكتارلىق فەرماعا اينالعان. مۇندا الما, المۇرت, شيە, ورىك, قارا ورىك, جيدەكتەر, ءجۇزىمنىڭ ءارتۇرلى سورتتارى, ارشا, تەرەك, ۇيەڭكى, قاراعاش پەن قاراعاي وسەدى.
«وسىلايشا, قىزىلوردادا قىلقان جاپىراقتى اعاشتاردى دا وسىرۋگە بولاتىندىعىن دالەلدەدىم دەسەم دە بولادى. ءوسىپ كەلە جاتىرعان بارلىق كوشەتتەردى بۋدانداستىرىپ, بەيىمدەدىم. ءتىپتى شىرشا مەن بالقاراعاي دا وسەدى. ەندىگى ارمانىم تۋبەركۋلەز ديسپانسەرىنىڭ اۋماعىندا قىلقان جاپىراقتى اعاشتار پاركىن قۇرۋ. سەبەبى, ولاردىڭ حوش ءيىسى وكپە اۋرۋلارى بار ناۋقاستار ءۇشىن وتە پايدالى», دەيدى ول.
ءبىزدىڭ ەكو-كەيىپكەرىمىز قىزىلوردانى قاراعايلى ورمانعا اينالدىرۋعا بولاتىنىنا سەنىمدى. ويتكەنى, قالانى قالاي كوگالداندىرۋعا بولاتىنى جايلى كوپتەگەن جوسپارى بار. ماسەلەن, قىزىلوردا اۋەجايىنا باراتىن جولداعى كوگال ونىڭ پيتومنيگىنەن باستالعان. ءبىر جارىم مەتر ارالىقپەن ءۇش قاتاردا وسەتىن اعاشتاردىڭ اۋماعى 6 كم-ءدى قۇرايدى. مۇنىڭ ءبارىن قاريا ءوز قولىمەن وتىرعىزىپ شىققان.
بەكتاي اتانى ءبىراز جىلدان بەرى ونىڭ قالا ماڭىنداعى باقشاسىنا اپاراتىن جول مازالايدى. ونىڭ ايتۋىنشا, اۋا-رايىنىڭ قولايسىزدىعى كەزىندە قوجالىققا جەتۋ مۇڭعا اينالادى. كوپشىلىك قالانى كوگالداندىرۋعا ۇلكەن ۇلەس قوسقان اقساقالدىڭ بۇل ءوتىنىشىن جەرگىلىكتى بيلىك نازارعا السا ەكەن دەيدى.