تاياۋدا ماسكەۋدە جاڭادان قۇرىلعان ەۋرازيالىق ەكونوميكالىق وداق (ەاەو) فورماتىندا ەۋرازيالىق ەكونوميكالىق كوميسسيا كەڭەسىنىڭ العاشقى وتىرىسى ءوتىپ, وعان قازاقستان رەسپۋبليكاسى پرەمەر-ءمينيسترىنىڭ ءبىرىنشى ورىنباسارى باقىتجان ساعىنتاەۆ قاتىستى, دەپ حابارلادى پرەمەر-ءمينيستردىڭ ءباسپاسوز قىزمەتى.
كوميسسيا كەڭەسىنىڭ كەزەكتى وتىرىسىنىڭ كۇن تارتىبىنە ەاەو قىزمەتىنىڭ تيىمدىلىگىن قامتاماسىز ەتۋگە باعىتتالعان نەعۇرلىم كوكەيكەستى ماسەلەلەر ەنگىزىلدى.
كەڭەس وتىرىسىنىڭ كۇن تارتىبىندەگى نەگىزگى ماسەلەلەردىڭ ءبىرى قىرعىز رەسپۋبليكاسىنىڭ ەاەو-عا قوسىلۋ شارتى تۋرالى حاتتامالار جوباسىن دايىنداۋ ماسەلەسى بولدى. ءبىز ءوزارا ءتيىمدى شەشىمدەرگە قول جەتكىزدىك جانە بۇتىندەي العاندا, قىرعىزستاننىڭ قوسىلۋى تۋرالى حاتتامالار دايىن. ەۋرازيالىق ەكونوميكالىق وداقتى ۇلعايتۋ, جالپى ەكونوميكالىق كەڭىستىكتى كەڭەيتۋدىڭ سىرتىندا, ينتەگراتسيالىق ءبىرلەستىكتىڭ تارتىمدىلىعىن قامتاماسىز ەتەدى. وداققا مۇشە مەملەكەتتەردىڭ ەكونوميكالارىنىڭ دامۋى ءۇشىن قوسىمشا تۇراقتىلىق بەرەدى. وعان وداقتاعى ونەركاسىپتىك جانە اگروونەركاسىپتىك بايلانىستاردى تەرەڭدەتۋ, كولىك-لوگيستيكالىق, كولىكتىك الەۋەتتى دامىتۋ نەگىز بولادى. قازىرگىدەي كۇردەلى ەكونوميكالىق جاعدايدا بۇلار وتە ماڭىزدى فاكتورلار, دەپ اتاپ ءوتتى باقىتجان ساعىنتاەۆ.
وتىرىس بارىسىندا ءاربىر مۇشە مەملەكەتتەر ءۇشىن جەكە-جەكە, سونداي-اق, بۇتىندەي وداق ءۇشىن نەگىزگى ساۋدا ارىپتەستەرىمەن اراداعى حالىقارالىق ىنتىماقتاستىقتى دامىتۋعا باعىتتالعان ماسەلەلەر قارالدى. بۇل ماسەلە 6 اقپاندا ەۋرازيالىق ۇكىمەتارالىق كەڭەستىڭ ۇكىمەت باسشىلارى دەڭگەيىندەگى وتىرىسىندا تالقىلاناتىن بولادى. ودان ارعى جەردە ەۋرازيالىق ەكونوميكالىق وداقتىڭ حالىقارالىق ىنتىماقتاستىعىن دامىتۋدىڭ نەگىزگى ۆەكتورلارى انىقتالماق.
سول سياقتى باقىتجان ساعىنتاەۆتىڭ ايتۋىنشا, 2015-2016 جىلدارعا ارنالعان جەڭىل ونەركاسىپ ونىمدەرىن تاڭبالاۋدىڭ قاناتقاقتى جۇيەسىن ساتىلاپ ەنگىزۋ ماسەلەسى بويىنشا ورتاق تۇسىنىستىككە قول جەتكىزىلدى. اتاپ ايتقاندا, باستاپقى ساتىدا كيىم جانە تابيعي تەرىدەن جاسالعان بۇيىمداردى تاڭبالاۋ جونىندە شەشىم قابىلداندى. بۇل ماسەلەنى دە 6 اقپاندا ۇكىمەت باسشىلارى قارايتىن بولادى.
ەۋرازيالىق ەكونوميكالىق وداقتىڭ كەدەن كودەكسىنىڭ جوباسىن دايىنداۋ جونىندەگى جۇمىستار بارىسى دا قارالدى. ونى قابىلداۋ كەدەندىك دەكلاراتسيالاۋدى ەلەكتروندى تۇردە جۇزەگە اسىرۋعا جاعداي جاسايدى, ال ول ءوز كەزەگىندە كەدەندىك تازارتۋدان ءوتۋ ۋاقىتىن جەدەلدەتەدى جانە سول ارقىلى بيزنەس ءۇشىن سالماقتى جەڭىلدەتەدى.
ونىڭ سىرتىندا ەۋرازيالىق ەكونوميكالىق وداقتىڭ ءتيىمدى قىزمەتىن قالىپتاستىرۋعا باعىتتالعان جەكەلەگەن شەشىمدەر دە قابىلداندى.
اتاپ ايتقاندا, سىرتقى ەكونوميكالىق قىزمەتكە قاتىسۋشىلار ءۇشىن ساۋدا پروتسەدۋرالارىن قاراپايىمداندىرۋ جانە جۇكتەمەنى تومەندەتۋ ماقساتىندا «بىرەگەي تەرەزە» مەحانيزمىنىڭ نەگىزگى باعىتتارىن دامىتۋدى جۇزەگە اسىرۋ جونىندەگى ءىس-شارالار جوسپارى بەكىتىلدى.