ۇلتتىق اكادەميالىق كىتاپحانادا مەملەكەت جانە قوعام قايراتكەرى, مەملەكەتتىك سىيلىقتىڭ لاۋرەاتى, توتەنشە جانە وكىلەتتى ەلشى, پروفەسسور مىرزاتاي جولداسبەكوۆتىڭ «كۇندەرىمنىڭ كۋاسى» التى تومدىق كىتابىنىڭ تۇساۋكەسەر ءراسىمى ءوتتى. سالتاناتتى جيىنعا پارلامەنت دەپۋتاتتارى مەن زيالى قاۋىم وكىلدەرى قاتىستى.
التى تومدىق كىتاپ اۆتوردىڭ 1993 جىلدان باستاپ ۇزدىكسىز جازىپ كەلە جاتقان كۇندەلىكتەرىنە نەگىزدەلگەن. وندا ەلىمىزدە بولىپ جاتقان اسا ماڭىزدى تاريحي وقيعالارعا ءمان بەرە كەلىپ, قوعامدىق ءومىر تۋرالى كوزقاراسىن كەستەلەيدى, ءار كەزەڭ مەن ۇرپاقتىڭ مىنەزى مەن كوڭىل كۇيى, وتكەن, قازىرگى جانە بولاشاق تۋرالى تولعانادى. ياعني جاڭا جيناق اۆتوردىڭ قاعاز بەتىنە تۇسكەن جان سىرى دەسەك بولادى. مىرزاتاي جولداسبەكوۆتىڭ ءوزى جازعانداي: «كۇندەلىك – سىرلاسىڭ. ونىمەن سىرلاسۋعا, سويلەسۋگە بولادى. ول – سەنىڭ سىڭارىڭ, جان دوسىڭ. مەن كۇندەلىك جازباعان كۇنى بىردەڭە جوعالتقانداي بولامىن».
اۆتوردىڭ ايتۋىنشا, كۇندەلىك نەبىر ويلارعا دا جەتەلەيدى. قولىڭا قالام الىپ, كۇندەلىكتىڭ بەتىن اشساڭ, ۋاقىت, زامان, ادام تۋرالى تولعاناسىڭ. كەيدە ونىڭ تۇڭعيىق تەرەڭىنە تۇسەسىڭ. جاستاردى جەردەن الىپ, جەرگە سالىپ جاتاتىندارعا تاڭىم بار. بۇگىن سەن تۇزەلسەڭ, ەرتەڭ ەل تۇزەلەدى, دەپ جازادى اۆتور.
كۇندەلىكتە كەستەلەنگەن ەل ومىرىندەگى ءاربىر وقيعا تاريحي شەجىرە ىسپەتتى. تۇساۋكەسەر بارىسىندا ايتىلعانداي, تاۋەلسىز ەلدىڭ تاسقا باسىلماعان پاراقتارى ۇلتتىق ەرەكشەلىكتى ساقتاۋدا اسا ماڭىزدى ءرول اتقارادى.
القالى جيىندا مەملەكەت جانە قوعام قايراتكەرلەرى, زيالى قاۋىم وكىلدەرى ءسوز الىپ, كوپتومدىقتىڭ ءمان-ماڭىزى جونىندەگى ويلارىن ورتاعا سالدى.