ۇكىمەت قاۋلىسىنا سايكەس ءاليا مولداعۇلوۆا اتىنداعى حالىقارالىق اۋەجاي بازاسىندا «اقتوبە» ارنايى ەكونوميكالىق ايماعى (اەا) قۇرىلدى, اتالعان ايماق 2049 جىلدىڭ سوڭىنا دەيىن جۇمىس ىستەمەك, دەپ حابارلايدى Egemen.kz وبلىس اكىمدىگىنىڭ ءباسپاسوز قىزمەتىنە سىلتەمە جاساپ.
اقتوبە وبلىسىندا اەا قۇرۋدىڭ نەگىزگى ماقساتى – ينۆەستيتسيا تارتۋ, وڭدەۋ ونەركاسىبىن دامىتۋ جانە يمپورتقا تاۋەلدىلىكتى تومەندەتۋ. جوبانى جۇزەگە اسىرۋ ارقىلى جاڭا جۇمىس ورىندارى قۇرىلىپ, وتاندىق تاۋارلاردىڭ باسەكەگە قابىلەتتىلىگى ارتادى, سونداي-اق ەكونوميكاداعى بايلانىستى سالالاردىڭ دامۋىنا ىقپال ەتەدى.
«اقتوبە» اەا نەگىزگى مىندەتتەرى ءوڭىردىڭ ەكونوميكالىق ءوسىمىن ىنتالاندىرۋعا, ينۆەستيتسيالىق احۋالدى جاقسارتۋعا, ونەركاسىپتىڭ جاڭا ءوسۋ نۇكتەلەرىن قالىپتاستىرۋعا باعىتتالعان.
ارنايى ەكونوميكالىق ايماق جالپى 858 گەكتار اۋماقتى قامتيدى.
كولىك-لوگيستيكالىق باعىتتاعى 9 نەگىزگى سالا مەن ونەركاسىپتىڭ 29 باعىتىن دامىتۋ جوسپارلانعان. قازىرگى زامانعى وندىرىستەر قۇرۋعا, يننوۆاتسيالىق تەحنولوگيالاردى ەنگىزۋگە جانە وتاندىق ءارى حالىقارالىق جەتەكشى كومپانيالاردى تارتۋعا باسا نازار اۋدارىلادى.
اەا قاتىسۋشىلارى رەتىندە ەكونوميكانىڭ ءتۇرلى سەكتورلارىندا قىزمەت ەتەتىن جەرگىلىكتى جانە شەتەلدىك ينۆەستورلار بولا الادى. سونداي-اق, بىرنەشە كومپانيا بىرلەسكەن جوبالار ازىرلەۋىنە, ورتاق رەسۋرستاردى پايدالانۋىنا مۇمكىندىك بەرەتىن كلاستەرلەر قۇرۋ كوزدەلگەن.
ال ينۆەستورلارعا جەڭىلدىكتەر مەن پرەفەرەنتسيالار قاراستىرىلعان: بىرىنشىدەن, كورپوراتيۆتىك تابىس سالىعىنان بوساتىلادى, ەكىنشىدەن, اەا اۋماعىندا ساتىلاتىن تاۋارلارعا ققس مولشەرلەمەسى – 0%, ۇشىنشىدەن, جەر جانە م ۇلىك سالىقتارىنان, سونداي-اق جەر ۋچاسكەسىن پايدالانعانى ءۇشىن تولەمنەن بوساتىلادى. تورتىنشىدەن, اەا اۋماعىندا ورنالاستىرۋعا نەمەسە پايدالانۋعا ارنالعان تاۋارلار ءۇشىن كەدەندىك باج سالىعىنان بوساتۋ; بەسىنشى - كۆوتاسىز جانە رۇقساتسىز شەتەلدىك جۇمىس كۇشىن تارتۋ; التىنشى اەا اياسىندا جوبالاردى ىسكە اسىرۋ ءۇشىن قاجەتتى ينجەنەرلىك-كوممۋنيكاتسيالىق ينفراقۇرىلىمدى قامتاماسىز ەتۋ جانە جەر تەلىمىن جالعا بەرۋ (اەا جۇمىس ىستەگەن مەرزىمى, كەيىننەن باسىم قۇقىقپەن ساتىپ الۋ مۇمكىندىگىمەن).
قازىرگى ۋاقىتتا «اقتوبە» ارنايى ەكونوميكالىق ايماعىنىڭ (اەا) سىرتقى جانە ىشكى ينجەنەرلىك جەلىلەرىنىڭ قۇرىلىسى ءالى باستالعان جوق. قۇرىلىس جۇمىستارى رەسپۋبليكالىق بيۋدجەتتەن 16 ملرد تەڭگە كولەمىندە قارجى بولىنگەن سوڭ, 2025-2026 جىلدارى جۇرگىزىلەدى.