وتكەن جىل الماتى ءتۋريزمى ءۇشىن جامان بولعان جوق, ايتارلىقتاي ءوسىم بار. بۇرناعى جىلعا قاراعاندا مەگاپوليسكە قىدىرىپ كەلەتىندەر سانى دا 14,2%-عا كوبەيدى. 2024 جىلدىڭ العاشقى ءۇش توقسانىندا 1,7 ميلليوننان استام ادامنىڭ الماتىعا جولى ءتۇسىپتى. بۇل كورسەتكىش قالا ەكونوميكاسىنا دا يگى اسەر ەتىپ وتىر. ناتيجەسىندە تۋريزم سالاسىنان تۇسكەن سالىق 11 ايدا 85,5 ميلليارد تەڭگەگە جەتىپ, وتكەن جىلعى كورسەتكىشتەن ەكى ەسەگە ارتتى.
نەگىزگى كاپيتالعا سالىنعان ينۆەستيتسيا 92,9 ميلليارد تەڭگە, بۇل كورسەتكىش تە بۇرناعى جىلعا قاراعاندا 12%-عا وسكەن. جەكە كاسىپكەرلەر سالعان قاراجاتتىڭ ارقاسىندا قالادا 35 جاڭا ورنالاستىرۋ نىسانى, ونىڭ ىشىندە 23 قوناقۇي, 4 گلەمپينگ, 8 حوستەل اشىلعان. بۇل دا بولسا قورداعى قوناقۇيلەرگە 836 بولمە قوسىپ, تۋريستەردى قابىلداۋ ينفراقۇرىلىمىن ايتارلىقتاي نىعايتقان.
«Mastercard» كومپانياسىنىڭ مالىمەتىنشە, 2024 جىلدىڭ 11 ايىندا الماتىعا تۋريستەردىڭ قاناعاتتانۋ يندەكسى 67-گە كوتەرىلگەن, بۇل دا ءتۋريزمنىڭ جاعدايى 2,7%-عا جاقسارعانىن بىلدىرەدى. تۋريستەر الدىمەن اتاپ وتكەن نەگىزگى فاكتورلاردىڭ قاتارىندا قاۋىپسىزدىك پەن قىزمەت كورسەتۋ ساپاسى بار.
ەڭ باستىسى, بىلتىر الماتىدا تۋريزم سالاسى ماماندارىنىڭ بىلىكتىلىگىن ارتتىرۋدا بىتقاتار شارۋالار اتقارىلدى. شىلدە مەن قاراشا ارالىعىندا كولىك تورابى, تۋريستەرمەن جۇمىس ىستەيتىن 400-دەي قىزمەتكەر اعىلشىن ءتىلى كۋرستارىنا تارتىلدى.
قاراشا ايىندا تۋريزم سالاسىنا قىزمەت ەتەتىن 420 مامانعا ارنالعان فاسيليتاتسيا ءدارىسى وتكىزىلدى. دارىستەر دۇنيەجۇزىلىك ساياحات جانە تۋريزم كەڭەسى (WTTC) ۇسىنعان حالىقارالىق ساراپشىلاردىڭ قاتىسۋىمەن ۇيىمداستىرىلدى.
سونىمەن قاتار قىركۇيەك, قازان ايلارىندا رەسپۋبليكالىق جەدەل-قۇتقارۋ جاساعى (رجقج) قۇتقارۋشىلارىنا ارنالعان باستاپقى دايىندىق باعدارلاماسى بويىنشا وقىتۋ ۇيىمداستىرىلدى. الماتى سياقتى تاۋلى ايماققا بۇل جاتتىعۋلار اسا كوكەيكەستى ەكەندىگى ايتپاسا دا تۇسىنىكتى.
الماتى حالىقارالىق تۋريستىك يندۋسترياداعى مارتەبەسىن نىعايتا وتىرىپ, الداعى ۋاقىتتا ساياحاتشىلارعا جاڭا مۇمكىندىك تۋدىرۋعا ۇمتىلادى. بيىل تاۋلى جەرلەردەگى, قالالىق ينفراقۇرىلىمدى دامىتۋعا 697,4 ملن تەڭگە ءبولىنىپ وتىر. جوسپاردا ناۆيگاتسيالىق نىساندارى بار 10 تاۋ مارشرۋتىن قۇرۋ, جەتۋ قيىن جەرلەردە كۇن پانەلدەرى بار 3 كەمپينگ-ايماقتاردى جايلاستىرۋ, «الما-اراسان» شيپالى بۇلاعىن جاڭارتۋ, تۋريستىك نىسانداردىڭ تاكتيلدى ۇلگىلەرىن دايىنداۋ, اقپاراتتىق ورتالىقتارعا, توتەمدەر مەن تەرمينالدارعا قىزمەت كورسەتۋ كىرەدى.
وتكەن جىلى الماتى قالاسىنىڭ تۋريزم باسقارماسى ون باعىتتى, اتاپ ايتقاندا, «تۇيىق سۋ» الپلاگەرىنە اپاراتىن سوقپاق جولدى, يۋننات كولى – بۋتاكوۆكا – ورمان اسۋىن, يۋننات سوقپاقتارىن, «اققايىڭ» شيپاجايى – كىشى الماتى شاتقالىن, ءۇاو – پوگرەبەتسكي شىڭىن, تۇيىق سۋ الپلاگەرى – «تۇيىق سۋ» مۇزدىعىن, بۋتاكوۆكا شاتقالىندا 2 شاقىرىمدىق سوقپاقتى اباتتاندىرۋدى اياقتادى. وزەندەرگە وتكەل جاسالىپ, مۇگەدەكتىگى بار ازاماتتارعا ارنالعان ورىندىقتار مەن ساكىلەر ورناتىلدى. مەدەۋدەگى باقىلاۋ پالۋباسى مەن قاراكۇنگەي جوتاسى («سەركەباي» شەڭبەرى) جاڭعىرتىلدى.
الماتىنىڭ تاۋداعى تۋريستىك باعىتتارىن اباتتاندىرۋداعى جۇيەلى قادامدار ءوزىن-ءوزى اقتاي باستاعانى قۋانتادى. مۇنىڭ جارقىن مىسالداردىڭ ءبىرى – تاۋ ءتۋريزمىن جاقسارتۋ جونىندەگى كەشەندى جۇمىستار اياسىندا 2023 جىلى مالىش شىڭىندا ورناتىلعان ورىندىق. مالىش شىڭى تۋريستەر مەن تابيعات اۋەسقويلارى اراسىندا وتە تانىمال. بىراق بۇل باعىتقا قىزىعۋشىلىقتى ارتتىرۋعا قوسىمشا ەكپىن قاجەت بولعاندىقتان, قازىر وسى ورىندىقتار كادىمگىدەي اجەتكە جاراپ, تۋريستەر دامىلدايتىن ادەمى مەكەنگە اينالىپ شىعا كەلدى.
الماتى