تايسيا ناۋموۆا باياناۋىلدىڭ تاۋ-تاسىن ۇنەمى ماقتان تۇتىپ جۇرەتىن جان. ءوزى تۇسىرگەن بەينەجازبالاردى الەۋمەتتىك جەلىدە ءبولىسىپ, بىلايعى جۇرت سول ارقىلى كورىكتى ولكە جايىندا كوپ مالىمەتتى كوكەيلەرىنە تۇيەدى. ول جۇكتەيتىن بەينەروليكتەر قاراپايىم بولعانىمەن, شىنايىلىعىنىڭ ناتيجەسىندە مىڭداعان جاننىڭ جۇرەگىن جاۋلادى.
باياناۋىل تۋرالى بەينەاقپارات ىزدەگەن كوپشىلىك Instagram-داعى @bayanaul_vibe پاراقشاسىنا ۇڭىلەتىنىن ءجيى بايقاپ ءجۇرمىز. مۇندا ارقاداعى ەرەكشە جاراتىلىس, تاسىن تۇرتسەڭ تاريحى سويلەي جونەلەتىن قۇتتى مەكەننىڭ تابيعاتى, كۇمىستەي جارقىراعان كولدەر, تاۋمەن تالاسا وسكەن ورمان-توعاي, اقبەتتاۋدىڭ باۋرايىن مەكەن ەتكەن جابايى جانۋارلار, تاعىسىن-تاعى تابيعات عاجايىپتارىن تاماشالاۋعا بولادى.
وسىنىڭ بارلىعىن ەرىنبەي-جالىقپاي تەلەفون كامەراسىنا تۇسىرۋگە داعدىلانعان تايسيا ناۋموۆا بۇگىندە اۋدان ورتالىعىندا شاپىق شوكين اتىنداعى №2 ورتا مەكتەپتە وقۋ ءىسىنىڭ مەڭگەرۋشىسى قىزمەتىن اتقارادى. ايتۋىنشا, بالا شاعىنان تابيعاتقا اڭسارى اۋىپ تۇرادى ەكەن. تۋعان جەرگە دەگەن سۇيىسپەنشىلىك پەن قورشاعان ورتاعا قامقورلىق ونى وسىدان بىرنەشە جىل بۇرىن موبيلوگرافيا سالاسىنا الىپ كەلگەن. ول كاسىبي موبيلوگراف ەمەس. دەگەنمەن جۇمىستان بوس ۋاقىتىندا تۋعان جەرىنىڭ اسەم جەرلەرىنە ارنايى بارىپ, تەلەفونىنىڭ كامەراسىنا ءتۇسىرىپ الۋدى كۇندەلىكتى ادەتىنە اينالدىرعان. كەي روليكتەرگە ءوزى مانەرلەپ وقىعان ولەڭدەرىنىڭ اۋديوسىن قوسا ۇسىنادى.
– ءوزىم تورايعىر اۋىلىنىڭ تۋماسىمىن. ۇلتىم ورىس بولسا دا, جانىم قازاق. قازاق حالقى تابيعاتقا, قورشاعان ورتاعا جاقىن بولاتىنىن بايقايمىن. مەنىڭ جان الەمىم دە سونى قالايدى. كىشكەنتاي شاعىمنان تۋعان اۋىلىمداعى قاندىاعاش توعايى, اۋليەبۇلاققا تونگەن ساكەن جارى, تاۋ باۋرايلارى, جارتاستاردا سەكىرىپ جۇرەتىن ارقارلار مەنى ەرەكشە قىزىقتىراتىن. ونىڭ ۇستىنە ءبىزدىڭ جەردەن ەدىگە, شورمان بيلەر, كورنەكتى اقىن سۇلتانماحمۇت تورايعىروۆ, قازاق مۋزىكا اسپابىن جاساۋدىڭ شەبەرى قامار قاسىموۆ سياقتى تانىمال تۇلعالار شىققان. وسىنداي قاسيەت قونعان ولكەدە تۇرىپ, تۋعان جەردى ماقتان ەتپەۋ مۇمكىن ەمەس. قورشاعان ورتانىڭ سۇلۋلىعىن كورە بىلۋگە, ونى ايالاۋعا ادامي تۇيسىك كەرەك. كورىكتى جەرلەردى كامەراعا ءتۇسىرىپ, الەۋمەتتىك جەلىدە بولىسسەم, ونى وزگە ادامدار كورىپ, تام-تۇمداپ مالىمەتتەر الىپ جاتسا, مەن ءۇشىن عانيبەت, – دەيدى ول.
تايسيا ناۋموۆا
قازىرگى ۋاقىتتا بۇل ويىنىڭ دۇرىس بولعانىنا كوزى جەتىپ وتىر. ەكى جىل ىشىندە پاراقشاسىنا جازىلۋشى سانى كوبەيە باستاعان. كەيدە تۇراقتى كورەرمەندەرى پىكىر جازىپ, انا جەردى ءتۇسىرىپ قايتىڭىزشى دەپ ءوتىنىش جاسايدى ەكەن. ونداي ادامداردىڭ مەسەلىن قايتارماۋعا تىرىسادى.
– جولداسىم ەكەۋمىز بالالارىمىزدى دا تابيعاتقا سۇيىسپەنشىلىكپەن قاراۋعا تاربيەلەيمىز. كوك قىلتيسا, اۋىل شەتىنە شىعىپ, ساماۋرىن قويىپ, دەمالعاندى ۇناتامىز. وسىنىڭ بارلىعى ادامنىڭ تابيعاتپەن ەتەنە بولۋى كەرەكتىگىن بىلدىرەدى – دەپ جالعاستىردى اڭگىمەسىن تايسيا.
ايتۋىنشا, وسىدان ءبىراز ۋاقىت بۇرىن كۇيەۋى درون سىيلاپتى. ەندى سونى پايدالانىپ, باياناۋىل توڭىرەگىندەگى بارلىق اۋىلدى بەينەجازباعا ءتۇسىرىپ, ەلدى مەكەندەردى تاريحىمەن قوسا پاراقشاسىندا جاريالاماق نيەتى بار. پاراقشاداعى بەينەبايانداردان جىلدار وتە كەيىنگى ۇرپاق وزىنە قاجەتتىسىن تاۋىپ, ەلىنىڭ وتكەنىن تانيدى دەپ ويلايدى.
– جۋىقتا اتاقتى قۇسبەگى, كسرو اڭشىلىق ءىسىنىڭ ۇزدىگى ءماۋيا ابىكەەۆ اتىنداعى قۇسبەگىلەر تۋرنيرىنە قاتىستىم. مەنى قىران قۇستىڭ ۇشۋى, اڭعا تۇسكەنى ايرىقشا قىزىقتىرادى. قازاقتا ەجەلدەن بار ساياتشىلىق ونەردىڭ قايتا جاڭعىرىپ, بۇگىنگى ۇرپاققا جالعاسقانى, مەنىڭشە قۋانتارلىق دۇنيە. قۇسبەگىلىكپەن جاستار كوپ اينالىسادى ەكەن, – دەپ اتاپ ءوتتى.
ءوزى تۇسىرگەن بەينەروليكتەردى كەيدە ساباق ۇستىندە دە پايدالانادى. بۇل ىسكە وقۋشىلاردى دا جۇمىلدىرىپ, جاقىندا «كوڭىلدى ساياحات» دەپ اتالعان حالىقارالىق سايىستا ءوزى ۇيلەستىرگەن بالالاردىڭ جۇمىسى 3-ورىندى جەڭىپ الدى. «بۇگىندە قىمبات تەلەفونعا اۋەس بالالار كوپ. تەك ونى پايدالى ىسكە جاراتا الاتىندار از», دەپ قىنجىلدى ۇستاز.
تايسيانى باياناۋىلداعى تۋريستىك ايماقتاردىڭ ءوز الدىنا دامي الماي وتىرعانى دا مۇڭايتادى. جاسىباي دەمالىس ايماعىندا قاراپايىم اجەتحانالاردىڭ جەتىسپەۋشىلىگى, سەرۆيستىڭ ناشارلىعى, اباتتاندىرۋ جۇمىسىنىڭ تومەن دەڭگەيدە جۇرگىزىلۋىنە تۇرعىن رەتىندە جانى اشيتىنىن جەتكىزدى. بۇل وسى ىسكە جاۋاپتى ورگاندار مەن جەكەلەگەن لاۋازىمدى تۇلعالاردىڭ ۇيلەستىرە الماۋىنان, جاۋاپكەرشىلىك پەن باقىلاۋدىڭ السىزدىگىنەن تۋىنداپ وتىرعان ماسەلە دەپ ويلايدى. وسى ورايدا حالقىمىزدىڭ «قالاۋىن تاپسا, قار جانادى» دەگەن ناقىلىن ەسكە سالدى.