الماتى وبلىسىنىڭ پوليتسەيلەرى ءىىم كيبەرقىلمىسقا قارسى ءىس-قيمىل دەپارتامەنتى مەن ءوڭىر پروكۋراتۋرانىڭ ۇيلەستىرۋىمەن الاياقتىق جولمەن الىنعان اقشانى كريپتوۆاليۋتاعا اۋدارۋمەن اينالىسقان ۇيىمداسقان دروپپەرلەر توبىنىڭ قىزمەتىن توقتاتتى.
تەرگەۋ بارىسىندا 20-دان اسا الاياقتىق سحەمانىڭ قاتىسۋشىسى انىقتالدى. ولاردىڭ اراسىندا دروپتار, دروپ-جەتەكشىلەر, كۋراتورلار جانە مەنەدجەرلەر بار.
ء«اربىر قاتىسۋشى 5-7 بانكتىك شوتتى پايدالانىپ, ءاربىر ترانزاكتسيادان 1%-دان 3%-عا دەيىن سىياقى الىپ وتىرعان. جاڭا دروپتاردى جيناۋ Telegram-ارنالارى ارقىلى جۇزەگە اسىرىلعان. جەدەل ءىس-شارالار ناتيجەسىندە 8 ملن تەڭگەدەن اسا سوماداعى قارجى قوزعالىسى توقتاتىلىپ, سحەمانىڭ ۇيىمداستىرۋشىسىنا تيەسىلى اي سايىنعى اينالىمى 100 ملن تەڭگەدەن اساتىن كريپتوكوشەليوك انىقتالدى. قازىرگى ۋاقىتتا بانكتەردەن قارجى وپەراتسيالارى تۋرالى اقپارات الۋ ءۇشىن سانكتسيالانعان سۇرانىس حاتتار جولداندى. انىقتالعان اكتيۆتەردى تاركىلەۋ ماسەلەسى قاراستىرىلىپ جاتىر», دەپ حابارلايدى الماتى وبلىستىق پوليتسيا دەپارتامەنتىنىڭ باستىعى, پوليتسيا پولكوۆنيگى مەيرام ابىكەەۆ.
جەدەل-ىزدەستىرۋ شارالارى بارىسىندا جەتى ادام, ونىڭ ىشىندە ءۇش كۋراتور, ءبىر مەنەدجەر جانە ءۇش دروپپەر ۇستالدى. بارلىعى ۋاقىتشا ۇستاۋ يزولياتورىنا قامالدى.
قۇقىق قورعاۋ ورگاندارى ازاماتتاردى ساق بولۋعا, بانكتىك شوتتاردى تىركەۋ نەمەسە بەيتانىس ادامداردان قارجىلىق وپەراتسيالارعا قاتىسۋ تۋرالى كۇماندى ۇسىنىستاردان باس تارتۋعا شاقىرادى.
«مۇنداي ارەكەتتەر الاياقتىق سحەمالارعا قاتىسۋ رەتىندە قاراستىرىلىپ, قىلمىستىق جاۋاپكەرشىلىككە اكەپ سوعۋى مۇمكىن. ەگەر ءسىز وسىنداي قىزمەتتىڭ قۇربانى نەمەسە كۋاگەرى بولساڭىز, دەرەۋ پوليتسياعا حابارلاسىڭىز», دەپ ەسكەرتەدى پوليتسيا وكىلدەرى.
الماتى وبلىسى