دۇزدجە قالاسىندا (تۇركيا) تۇراتىن مۇحاممەتالي بوزدى ءوز ورتاسىندا كوپشىلىك جاقسى تانيدى. نەگە دەسەڭىز, انا تىلىنەن بولەك تۇرىك, ساحا, اراب تىلدەرىن ەركىن مەڭگەرگەن ول ونەردەن دە قۇرالاقان ەمەس.
تالانتتى ءجاسوسپىرىم بۇگىندە ەلىمىزدەگى قوجا احمەت ياساۋي اتىنداعى حالىقارالىق قازاق-تۇرىك ۋنيۆەرسيتەتى تۇركولوگيا فاكۋلتەتىنىڭ 1-كۋرسىندا وقيدى. تاريحي وتانىنا كەلىپ وقۋداعى ماقساتى – ءوز اتا-باباسىنىڭ توپىراعىن باسۋ, سالت-ءداستۇرىن كوزبەن كورىپ, سەزىنۋ. مۇحاممەتالي بالا كەزىنەن ۇلتتىق داستۇرگە, ءوز حالقىنىڭ ونەرىنە ەرەكشە قىزىقتى. دومبىرا, شاڭقوبىز بەن باراباندا شەبەر ويناپ ۇيرەندى.
«مۋزىكاعا مەكتەپ كەزىنەن قىزىعا باستادىم. العاشقى ويناپ ۇيرەنگەن اسپابىم بارابان بولدى. بالا كەزىمدە ساحالىق شاڭقوبىز ورىنداۋشىسىنىڭ ونەرىن كورگەننەن كەيىن وسى اسپاپقا قىزىقتىم. بىراق ونى تۇركيادان تابۋ قيىنعا سوقتى. ءسويتىپ, 2019 جىلى شاڭقوبىز ساتىپ الىپ, عالامتورداعى بەينەساباقتار ارقىلى ءوز بەتىممەن ۇيرەندىم. كەيىن دومبىرانى دا مەڭگەردىم. «تۇران» توبىنىڭ مۋزىكانتى جانتۋ داداباەۆتان العان كەڭەستەرىم ونەرىمدى ودان ءارى جەتىلدىرۋگە كومەكتەستى», دەيدى ول.
21 جاسىندا اتاجۇرتىنا وقۋعا كەلگەن مۇحاممەتالي تاريحي مەكەنىنىڭ جانىنا جاقىن ەكەنىن بىردەن سەزگەن. قازىرگى تاڭدا ول ءبىلىم الىپ ءجۇرىپ, تۇركى حالىقتارىنىڭ مادەنيەتى مەن داستۇرلەرىن تەرەڭىرەك زەرتتەۋگە, جاڭا مۋزىكالىق اسپاپتاردى مەڭگەرۋگە بەل بۋىپ وتىر. بولاشاقتا تۇركولوگ مامان رەتىندە تۇركى حالىقتارىنىڭ مادەني مۇراسىن الەمگە تانىتىپ, «تۇران» توبىمەن ءبىر ساحنادا ونەر كورسەتۋدى ارماندايدى.
ء«ار سەمەستردەن كەيىن ۇيىمە قايتىپ, دەمالىسىمدى سول جاقتا وتكىزەمىن. اتاجۇرتتا قالۋ-قالماۋ جونىندە ناقتى شەشىم قابىلداعان جوقپىن. بىراق تۇركىستاندا ءوزىمدى دامىتۋعا بارلىق مۇمكىندىك بار. مەنى قولداعان بارشا جاقسى جاندارعا العىسىم شەكسىز», دەدى مۇحامەتالي.
تۇركيادا تۋىپ-وسكەن مۇحاممەتاليدىڭ تاريحي وتانىنا دەگەن ىستىق ىقىلاسى شەكسىز ەكەنى بىردەن بايقالادى. جاس دارىننىڭ ءار ءسوزى جاس ۇرپاققا ۇلتتىق قۇندىلىقتاردى قادىرلەۋگە جانە مادەني مۇرانى ساقتاۋ جولىندا تالماي ەڭبەك ەتۋگە ۇلگى بولارى انىق.
يۋنۋس وزكان,
ق.ا.ياساۋي ۋنيۆەرسيتەتىنىڭ ستۋدەنتى