قورعانىس ۆەدومستۆوسىنىڭ باسشىسى گەنەرال-پولكوۆنيك رۋسلان جاقسىلىقوۆ شىمكەنت گارنيزونىندا ارنايى وپەراتسيالار كۇشتەرىنىڭ بولىمشەسىنە بارىپ, جاۋىنگەرلەردىڭ مىزعىماس رۋحىنىڭ سيمۆولى – مونۋمەنتتىڭ اشىلۋىنا قاتىستى, دەپ حابارلايدى Egemen.kz.
تۇعىرعا بەس قارۋى ساي ارنايى جاساق جاۋىنگەرى قونعان. ونىڭ قولىندا قۋات-كۇشىن, ەركىندىك پەن جارقىن بولاشاققا دەگەن ۇمتىلىسىن بەينەلەيتىن قاناتتارى جايىلعان قۇدىرەتتى قىران بۇركىت. ەسكەرتكىشتىڭ تۇعىرىنا ء«بىزدىڭ كۇشىمىز – بىرلىكتە» ۇرانى جازىلعان.
ساپتىق پلاتستا جاۋىنگەرلىك تۋدى تابىستاۋعا ارنالعان سالتاناتتى ءراسىم ءوتتى. ونى قورعانىس ءمينيسترىنىڭ قولىنان 36814 اسكەري ءبولىمىنىڭ كومانديرى پولكوۆنيك ۇلىقبەك ساق قابىلدادى.
– بۇل اسكەري جادىگەر وتكەن, قازىرگى جانە بولاشاق جاۋىنگەرلەردىڭ ار-نامىسىن, ابىرويىن, داڭقى مەن جاۋىنگەرلىك داستۇرلەرىن بەينەلەيدى. بۇگىن سىزدەردىڭ ءبولىمنىڭ جاۋىنگەرلىك قىزمەتىنىڭ جاڭا بەتى باستالدى. اتا-بابالارىمىزدىڭ وسيەتىنە ادال بولىپ, ارنايى وپەراتسيالار كۇشتەرىنىڭ جاۋىنگەرى اتاعىن ماقتانىشپەن الىپ جۇرىڭىزدەر, – دەدى مينيستر.
جاۋىنگەرلىك تۋدى تاپسىرۋ ءراسىمى ءبولىمنىڭ باسقارۋ ورگانىنىڭ جاڭا مودۋلدىك عيماراتىنىڭ اشىلۋىنا جالعاستى. گەنەرال-پولكوۆنيك رۋسلان جاقسىلىقوۆ شتابتىڭ ورنالاسۋى ءۇشىن جاسالعان جاعدايدى تەكسەرىپ, جاڭارتىلعان تۇرعىن ءۇي قورىمەن تانىستى.
ۆەدومستۆو باسشىسى تاكتيكالىق قالاشىقتا جانە ارنايى جاساقتاردىڭ پراكتيكالىق ساباقتارى وتەتىن وقۋ-جاتتىعۋ كەشەنىندە بولدى. اسكەري قىزمەتشىلەر عيماراتتى تازارتۋ, اۆتوكولىككە, اۆتوبۋسقا شابۋىل جاساۋ, ساۋىتتى ماشينامەن «جارالىلاردى» ەۆاكۋاتسيالاۋ سەكىلدى ءىس-قيمىلداردى كورسەتتى. سونداي-اق, اۋە-دەسانتتىق دايىندىق ەلەمەنتتەرى كورسەتىلىپ, جۇمىلدىرۋ رەزەرۆىنە ساباق ءوتتى.
پسيحولوگيالىق كەدەرگىلەردى ەڭسەرۋ بارىسىندا وفيتسەرلەر كورىنۋى شەكتەۋلى جانە كۇرت وزگەرەتىن جاعدايدا جەدەل شەشىمدەر قابىلدادى.
ءبولىمنىڭ اسكەري قىزمەتشىلەرىن جاۋىنگەرلىك دايارلاۋ شارتتارىن زەردەلەگەن قورعانىس ءمينيسترى مەملەكەتتىڭ مۇددەلەرىن قورعاۋ مەن ونىڭ قورعانىس قابىلەتىن قامتاماسىز ەتۋ جونىندەگى نەعۇرلىم كۇردەلى تاپسىرمالاردى ورىنداۋعا ارنالعان بولىمشەنىڭ جاۋىنگەرلىك الەۋەتىن ارتتىرۋدى تاپسىردى.