سورەدە تۇرماسا دا, سۇراعانعا تابىلادى...

وسكەلەڭ ۇرپاقتىڭ ويىن ونعا, سانا­سىن سانعا ءبولىپ, سانسىراتاتىن بۇلدىرگى اقپاراتتار مەن دەنساۋلىققا زياندى دۇنيەلەر جەتكىلىكتى. سونىڭ ءبىرى – ۆەيپتەر. «ۆەيپسىز جاستىق شاق» الەۋمەتتىك جوباسى اياسىندا جاسوسپىرىمدەر 21 جاس­قا دەيىنگىلەر اراسىندا ۆەيپينگتى اۋىز­دىق­تاۋعا باعىتتالعان نەگىزگى ءىس-شارالار قو­رى­تىندىلاندى. جوبا «قازاق­ستاننىڭ با­لا­­لار قورى» قق باستاماسى­مەن استانا, الما­تى, قارا­عاندى, وسكەمەن, شىمكەنت قالا­لا­رىن­دا ىشكى ىستەر مينيستر­لىگى­نىڭ, بالالار­دىڭ قۇ­قىق­تا­رىن قورعاۋ كومي­تەتىنىڭ, ءبىلىم مي­نيستر­لى­گىنە قا­راستى رەسپۋب­لي­كالىق قو­سىم­شا ءبىلىم بەرۋ وقۋ-ادىستەمەلىك ورتالى­عى­نىڭ قول­دا­ۋىمەن جۇ­زە­گە اسىرىلدى.

رەسمي دەرەكتەرگە سۇيەنسەك, پوليتسيا مەن بالا قۇقىقتارى جونىن­دەگى وڭىرلىك ۋاكىلدەر ۆەيپ-شوپتاردى 98 رەت تەكسەرىپ, 21 جاسقا تولماعاندارعا ۆەيپتەردى ساتۋ تالاپتارىن بۇزعان ادامدارعا قات­ىستى 42 اكىمشىلىك حاتتاما تولتىرىلعان. ءبىلىم بەرۋ مەكە­مە­لەرىندە ۆەي­پينگتىڭ زيانى تۋرالى 48 سەمينار, اقپاراتتىق كەزدەسۋلەر ۇيىم­داس­تىرىلعان. مۇعالىمدەرگە, اتا-انالار مەن ساتۋشىلارعا, 4208 ارناۋلى ۆەيپشوپ پەن ساۋدا نۇكتەلەرىنە 19590 شاقتى ەسكەرتپە تاراتىلعان.

ىشكى ىستەر ورگاندارى قىزمەتىنىڭ ماسەلەلەرى جونىندەگى قوعامدىق كەڭەستىڭ مۇشەسى قۋات راحىمبەردين شىعىس قازاقستان وبلىسىندا «ۆەيپسىز جاستىق شاق» جوباسى جاستاردى, پەداگوگتەر مەن قۇقىق قورعاۋ ورگاندارىنىڭ قىزمەتكەرلەرىن ءبىر ماقساتقا جۇمىلدىرا العانىن مىسالعا كەلتىردى.

ادام قۇقىقتارى مەن زاڭدى­لىقتى ساقتاۋ جونىندەگى قازاقستان حالىقارالىق بيۋروسى وڭتۇستىك قازاقستان فيليالىنىڭ ديرەكتورى, جوبانىڭ شىمكەنت قالاسىنداعى ۇيلەستىرۋشىسى ءادىل سەيىتقازيەۆ جوبا ارقىلى جاسوسپىرىمدەر, اتا-انالار مەن تاربيەشىلەر ۆەيپتەردىڭ زيا­نى تۋرالى ناقتى حاباردار ەتىپ, ساۋدا نۇكتە­لە­رىنىڭ ساتۋشىلارىنا, ۆەيپتەردى ساتۋ, تاراتۋ ارە­كەت­تەرى جازالاناتىنى جونىندەگى اقپاراتتى جەتكىزۋ ماڭىزدى بولعانىن اتاپ ءوتتى.

دەگەنمەن, ءالى وڭ-سولىن تولىق تانىپ ۇلگەر­مەگەن جاس ۇرپاقتىڭ بويىندا سالاماتتى ءومىر سالتىن قالىپتاستىرۋعا قا­جەت­تى وسىنداي قادامدار تۇراقتى جاسالىپ جات­قا­نىنا قاراماستان, بۇل سالادا قوعامدى قىن­جىل­تا­تىن, ويلاندىراتىن وقيعالار تىيىلماي وتىر.

«ۆەيپتەردى اكەلۋگە, وندىرۋگە, ساتۋعا, تارا­تۋعا تىيىم سالىن­عا­نىمەن, جاسوسپىرىمدەر اراسىنداعى ۆەي­پينگ ماسەلەسى تولىعىمەن شەشىلگەن جوق, تەك بەتپەردەسىن وزگەرت­تى. ۆەيپتەرگە تىيىم سالىن­عاننان كەيىن زاڭسىز ساۋدا كوزدەرىن انىقتاۋ ماقساتىندا تانىمال ينتەرنەت-الاڭدار زەرتتەلدى. ەلدەگى ۆەيپ ونىمدەرىنىڭ ساۋدا-ساتتىعى OLX-تە, Telegram مەن Instagram سياقتى الەۋمەتتىك جەلىلەردە قىزىپ جاتقانى انىقتالدى», دەيدى «قازاقستاننىڭ بالالار قورى» قق ­ديرەكتورى, حالىقارالىق بالالار قورلارى قاۋىمداستىعىنىڭ ۆيتسە-پرەزيدەنتى ەلۆيرا ۆاتلينا.

ادام قۇقىقتارى مەن زاڭدىلىقتى ساقتاۋ جونىندەگى قازاقستان حالىقارالىق بيۋروسى­نىڭ استانا قالاسىنداعى زاڭگەرى ارتۋر الحاس­توۆ تا ۆەيپ­تەردى ەلگە اكەلۋگە, ساتۋعا تى­يىم سا­لىن­عانى­مەن, تۇپكىلىكتى جويىل­ما­عانىن, ۆەيپتەردىڭ كولەڭ­­كەلى بيزنەسى ينتەر­نەت­تىڭ ارتىنا جاسىرىنىپ وتىرعانىن راستادى.

ادام قۇقىقتارى مەن زاڭدى­لىقتى ساق­تاۋ جونىندەگى قازاقستان حالىقارالىق بيۋرو­سىنىڭ قاراعاندى فيليالىنىڭ ديرەكتورى يۋري گۋسا­­كوۆتىڭ پىكىرىنشە, ۆەيپتەرمەن كۇرەسۋدە ۇكى­مەت جان-جاقتى ويلاستىرىلماعان شەشىم قا­بىل­داعان. ونىڭ ايتۋىنشا, ۆەيپتەرگە تىيىم سال­عان­­­نان كەيىن ساتۋشىلارعا قولدارىنداعى تاۋار­دى ساتۋعا جەتكىلىكتى ۋاقىت بەرگەندە بۇل ەلدەگى جاع­دايعا باسقاشا اسەر ەتىپ, كولەڭكەلى ساۋدا كەمي­تىن ەدى.

«دەگەنمەن قۇقىق قورعاۋ ورگاندارىنىڭ جۇمىسىن جوققا شىعارا المايمىز, وڭىرلەردە پوليتسەيلەرمەن قويان-قولتىق جۇمىس ىستەۋگە ۇمتىلدىق. زاڭدى بەلدەن باسىپ, ۆەيپ ساۋداسىن جۇرگىزىپ جاتقاندار جازالانعانىمەن, ول ونىمدەر ەلگە ءالى دە بولسا كەلىپ جاتىر», دەيدى الماتى قالاسىنداعى «ۆەيپسىز جاستىق شاق» جوباسىنىڭ ۇيلەستىرۋشىسى مارات سايبەكوۆ.

الماتى